കേരളത്തിൽനിന്ന് കാലവർഷം പൂർണമായും പിൻവാങ്ങിയിട്ടില്ലെങ്കിലും ഇത്തവണ വേഗത്തില്‍ തുലാവര്‍ഷമെത്തും. അടുത്തയാഴ്ച തന്നെ വടക്കു കിഴക്കന്‍ മണ്‍സൂണ്‍ (തുലാവര്‍ഷം) എത്താനാണ് സാധ്യത. മധ്യ, കിഴക്കന്‍ സംസ്ഥാനങ്ങളില്‍ നിന്ന് കാലവര്‍ഷത്തിന്റെ (തെക്കു പടിഞ്ഞാറന്‍ മണ്‍സൂണ്‍) വിടവാങ്ങല്‍ വരും ദിവസങ്ങളില്‍ പുരോഗമിക്കും. സിസ്റ്റങ്ങള്‍ നിലവിലില്ലാത്തതിനാല്‍ ഈ മേഖലയില്‍ അന്തരീക്ഷത്തില്‍ ഈര്‍പ്പതോത് കുറയുന്നുണ്ട്.

കേരളത്തില്‍ നിന്ന് അടുത്ത ആഴ്ചയോടെ കാലവര്‍ഷം പൂർണ്ണമായും വിടവാങ്ങുമെന്നാണ് സൂചന. ഒക്ടോബര്‍ 19 -21 ന് തുലാവര്‍ഷം കേരളത്തിലും മഴ നൽകിയേക്കും. 22 ആകുമ്പോഴേക്കും തുലാവര്‍ഷം എത്തിയതായി കാലാവസ്ഥ വകുപ്പിന്റെ ഔദ്യോഗിക പ്രഖ്യാപനം വന്നേക്കാം. ഇത്തവണ തുലാവര്‍ഷം കുറയാന്‍ സാധ്യതയില്ല. വടക്കന്‍ ജില്ലകളില്‍ ഉള്‍പ്പെടെ മഴ തകര്‍ത്തു പെയ്യും. ഇടിമിന്നല്‍ ശക്തിപ്പെടാനും തീവ്രമാകാനും സാധ്യതയുണ്ട്. ഇപ്പോഴത്തെ അന്തരീക്ഷത്തിന്റെ ചൂട് ഇത്തരം സൂചനകൾ ആണ് നല്‍കുന്നത്.

വേനലിലെന്ന പോലെ ചൂട് ഇപ്പോള്‍ അനുഭവപ്പെടുന്നുണ്ട്. ചൂടുള്ള ഉപരിതല വായുവും തണുത്ത ഉയര്‍ന്ന നിലയിലെ കാറ്റും അന്തരീക്ഷ അസ്ഥിരത (Instability) സൃഷ്ടിക്കും. ചൂടുള്ള ഈര്‍പ്പമുള്ള വായു പെട്ടെന്ന് ഉയരുകയും മേഘരൂപീകരണം സൃഷ്ടിക്കുകയും ചെയ്യും.
രാവിലെ ഉപഗ്രഹ ചിത്രത്തില്‍ ആകാശം ക്ലിയര്‍ ആണെങ്കില്‍ ഉച്ച കഴിഞ്ഞ് പെട്ടെന്ന് അന്തരീക്ഷം മാറി ഇടിയും മഴയും ചിലപ്പോള്‍ മലവെള്ളപ്പാച്ചിലും വരെ ഉണ്ടായേക്കാം.

പെട്ടെന്ന് പെയ്യുന്ന മഴയിൽ റോഡുകളിൽ വെള്ളക്കെട്ട് അനുഭവപ്പെടാനും സാധ്യതയുണ്ട്. ഇടിമിന്നല്‍, മഴ സജീവമാകുമ്പോള്‍ കിഴക്കന്‍ മലയോര മേഖലയില്‍ വിനോദ സഞ്ചാരം അധികൃതർ നൽകുന്ന നിർദ്ദേശങ്ങൾക്കനുസരിച്ച് മാത്രം പ്ലാൻ ചെയ്യുക. അരുവികളിലും തോടുകളിലും മലവെള്ളപ്പാച്ചില്‍ സാധ്യതയുള്ളതിനാല്‍ സുരക്ഷ കൈവിട്ടുള്ള കാര്യങ്ങൾക്കൊന്നും തയ്യാറാവരുത്. അധികൃതർ നൽകുന്ന നിർദ്ദേശങ്ങൾ കൃത്യമായി പാലിക്കണം.

അതേ സമയം, കേരളത്തിൽ ശക്തമായ മഴ തുടരാൻ സാധ്യതയെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. പത്തനംതിട്ട, ഇടുക്കി, മലപ്പുറം, വയനാട്, കണ്ണൂർ ജില്ലകളിൽ ഇന്ന് യെല്ലോ അലർട്ട് പ്രഖ്യാപിച്ചു. ശക്തമായ കാറ്റിനും കടൽ പ്രക്ഷുബ്ധമാകാനും സാധ്യതയുള്ളതിനാൽ കേരള കർണാടക ലക്ഷദ്വീപ് തീരങ്ങളിൽ മീൻപിടുത്തത്തിന് വിലക്ക് ഏർപ്പെടുത്തി. മലയോര മേഖലകളിൽ ഇടിമിന്നലും കാറ്റോടും കൂടിയ മഴയ്ക്കാണ് സാധ്യത.

ഇടിമിന്നലിനോടൊപ്പം മണിക്കൂറിൽ 30 മുതൽ 40 കിലോമീറ്റർ വരെ വേഗതയിൽ കാറ്റ് വീശാനും സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചിരിക്കുന്നത്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അർത്ഥമാക്കുന്നത്

Metbeat news