രാത്രിയിൽ കടലിൻ്റെ നിറം മാറും, വർഷം മുഴുവൻ ശക്തമായ കാറ്റും

ചൈനയുടെ ഫുജിയാൻ പ്രവിശ്യയിലെ ഏറ്റവും വലിയ ദ്വീപും ചൈനയിലെ അഞ്ചാമത്തെ വലിയ ദ്വീപുമാണ് ഹൈതാൻ എന്നറിയപ്പെടുന്ന പിങ്താൻ. തയ്വാനുമായി ഏറ്റവും അടുത്ത ചൈനീസ് ഭൂമേഖല ആയതിനാൽ ഇവിടം കേന്ദ്രീകരിച്ചാണ് ചൈനയുടെ നാവിക പ്രകോപനങ്ങൾ ഇപ്പോൾ അരങ്ങേറുന്നത്. 2009ൽ സമഗ്ര പരീക്ഷണ മേഖലയായി പ്രഖ്യാപിക്കപ്പെട്ട പിങ്താൻ എന്നാൽ ഇതിനെല്ലാമപ്പുറം പ്രകൃതിയുടെ ഒരു സ്വർഗഭൂമി കൂടിയാണ്.

സഞ്ചാരികളെ ആകർഷിപ്പിക്കുന്ന കടൽ

400 കിലോമീറ്ററിലധികം നീണ്ട തീരവും വെൺമണൽ ബീച്ചുകളുമുള്ള ഈ ദ്വീപിനെ 'ചൈനയുടെ മാലദ്വീപ്', 'കിഴക്കിന്റെ ഹവായ്' എന്നിങ്ങനെ വിശേഷിപ്പിക്കാറുണ്ട്. തെളിഞ്ഞ നീലക്കടലും കടലിൻ്റെ പ്രവർത്തനത്താൽ രൂപംകൊണ്ട പ്രകൃതിദത്ത ശിലാരൂപങ്ങളും സഞ്ചാരികളെ ഇങ്ങോട്ട് ആകർഷിക്കുന്നു. രാത്രിയിൽ കടലിന് നീലനിറം നൽകുന്ന 'നീലക്കണ്ണീർ' എന്ന അപൂർവ പ്രതിഭാസവും ഇവിടുണ്ട്. പ്രകാശിക്കുന്ന പ്ലവകങ്ങളാണ് ഇതിനു കാരണം

Pingtan Island sparkles in blue under the starry night in SE China's Fujian. (Photo:X/@PDChina)

വർഷം മുഴുവൻ വീശുന്ന കാറ്റ്

ചൈനയിലെ ഏറ്റവും നീളമേറിയതും മനോഹരവുമായ ലോങ്ഫെങ്ടൂ ബീച്ച്, തന്നാൻ ഉൾക്കടൽ, ഹൈതാൻ ഉൾക്കടൽ എന്നിവയൊക്കെ ഇവിടത്തെ പ്രധാന ആകർഷണങ്ങളാണ്. നീന്തലിനും സൂര്യസ്നാനത്തിനും ജലകായിക വിനോദങ്ങൾക്കും ഇവിടം പേരുകേട്ടതാണ്. വർഷം മുഴുവൻ വീശുന്ന ശക്തമായ കാറ്റ് പിങ്താനെ കൈറ്റ് സർഫിങ്ങിന്റെ ആഗോള കേന്ദ്രമാക്കി മാറ്റുന്നു. കൊടുങ്കാറ്റിനെ അതിജീവിക്കാൻ ഗ്രാനൈറ്റ് കല്ലുകളിൽ പണിത 'കൽവീടുകൾ' മറ്റൊരു വിസ്മയം.

തനതായ വാസ്തുവിദ്യാ ശൈലിയിലുള്ള പരമ്പരാഗത കൽഗ്രാമങ്ങൾ ഇവിടെയുണ്ട്.കടലിനു കുറുകെയുള്ള ലോകത്തിലെ ഏറ്റവും നീളമേറിയ റോഡ് -റെയിൽ പാലമായ പിങ്താൻ സ്ട്രെയിറ്റ് ബ്രിഡ്‌ജ്, ദ്വീപിനെ പ്രധാന കരയുമായി ബന്ധിപ്പിക്കുന്നു. നിരവധി രാജ്യാന്തര മത്സരങ്ങൾക്കും മേളകൾക്കും ദ്വീപ് വേദിയാകാറുണ്ട്. ബെയ്ഗാങ് ഗ്രാമത്തിലെ ബസാൾട്ട് പാറക്കൂട്ടങ്ങൾ, 'സിയാൻറെൻ വെൽ' തുടങ്ങിയ ഭൂമിശാസ്ത്രപരമായ വിസ്മയങ്ങൾ ദ്വീപിന്റെ പ്രത്യേകതയാണ്.

English Summary : Strong winds throughout the year make Pingtan a global center for kite surfing. Another wonder is the 'stone houses' built of granite rocks to survive the storm.