ദുബൈയിലെ വാടകകാർക്ക് വലിയ ആശ്വാസം; വാടക ഇനി ഗഡുക്കളായി അടയ്ക്കാം

താങ്ങാൻ പറ്റാവുന്നതിൽ അപ്പുറമാണ് ദുബൈയിലെ വാടക. മൊത്തം രൂപ വാടക നൽകാൻ കഴിയാത്തവർക്ക് ഇനിയങ്ങോട്ട് ആശ്വസിക്കാം. ഇപ്പോഴിതാ ദുബൈയിലെ റെസിഡൻഷ്യൽ കമ്മ്യൂണിറ്റികളിൽ താമസിക്കുന്ന വാടകക്കാർക്ക് ആശ്വാസമായി വാടക ചെറിയ ഗഡുക്കളായി അടയ്ക്കാനുള്ള പുതിയ സംവിധാനം എത്തിയിരിക്കുന്നു. വാർഷിക വാടക ഒറ്റത്തവണയായോ ഏതാനും വലിയ ഗഡുക്കളായോ അടയ്ക്കുന്നതിന് പകരം ചെറിയ പേയ്മെന്റുകളായി വിഭജിച്ച് നൽകാൻ അവസരമൊരുങ്ങും.

22 റെസിഡൻഷ്യൽ കമ്മ്യൂണിറ്റികളിലാണ് പദ്ധതി

ദുബൈ ഹോൾഡിംഗ് അസറ്റ് മാനേജ്മെന്റിന് കീഴിലുള്ള ദുബൈ റെസിഡൻഷ്യൽ, യുഎഇ ആസ്ഥാനമായ ഫിൻടെക് പ്ലാറ്റ്ഫോമായ റെന്റിഫൈയുമായി സഹകരിച്ചാണ് പുതിയ ഡിജിറ്റൽ പേയ്മെന്റ് സംവിധാനം അവതരിപ്പിക്കുന്നത്. 1.46 ലക്ഷത്തിലധികം ആളുകൾ താമസിക്കുന്ന 22 റെസിഡൻഷ്യൽ കമ്മ്യൂണിറ്റികളിലാണ് പദ്ധതി നടപ്പാക്കുന്നത്. പുതിയ താമസക്കാർക്കും നിലവിലുള്ള വാടകക്കാർക്കും സേവനം പ്രയോജനപ്പെടുത്താം.

നാലുമാസം കൂടുമ്പോൾ 20,000 ദിർഹം

നിലവിൽ നാല് തുല്യ ഗഡുക്കളായി ചെക്കുകൾ മുഖേന വാർഷിക വാടക അടയ്ക്കുന്നവർക്ക് ആദ്യ ഗഡുവിനെ വീണ്ടും ചെറിയ തുകകളായി വിഭജിച്ച് അടയ്ക്കാനാകും. ഉദാഹരണത്തിന്, പ്രതിവർഷം 80,000 ദിർഹം വാടകയുള്ള ഒരാൾ നാലുമാസം കൂടുമ്പോൾ 20,000 ദിർഹം വീതം നൽകുന്നതിന് പകരം ആദ്യ ഗഡുവായ 20,000 ദിർഹം ചെറിയ പേയ്മെന്റുകളായി അടയ്ക്കാം.

തിരഞ്ഞെടുത്ത ബാങ്കുകളുടെ ക്രെഡിറ്റ് കാർഡുകൾ ഉപയോഗിച്ചാണ് ഈ സൗകര്യം ലഭ്യമാകുക. ബ്ലൂവാട്ടേഴ്സ്, സിറ്റി വാക്ക്, നാദ് അൽ ഷെബ വില്ലാസ്, ദി ഗാർഡൻസ്, റെംറാം, ലയാൻ, ഘോറൂബ്, ഷോറൂഖ് തുടങ്ങിയ പ്രമുഖ റെസിഡൻഷ്യൽ കമ്മ്യൂണിറ്റികൾ പദ്ധതിയുടെ ഭാഗമാകും. ബാങ്കുകളുടെയും റെന്റിഫൈയുടെയും വ്യക്തിഗത യോഗ്യതാ മാനദണ്ഡങ്ങൾ അനുസരിച്ചായിരിക്കും സേവനലഭ്യത.

വാടക കരാറുകൾ പുതുക്കാനും വാടക അടയ്ക്കാനും അറ്റകുറ്റപ്പണികൾക്കായി അപേക്ഷിക്കാനും സൗകര്യമുള്ള ദുബൈ റെസിഡൻഷ്യലിന്റെ ഔദ്യോഗിക മൊബൈൽ ആപ്പിലൂടെയും പുതിയ പേയ്മെന്റ് സംവിധാനത്തിന്റെ സേവനം ലഭ്യമാകും. അതേസമയം, സൗകര്യം ഉപയോഗപ്പെടുത്തുന്നതിന് മുമ്പ് ബാധകമായ പ്രോസസിങ് ഫീസും മറ്റ് നിരക്കുകളും പരിശോധിക്കണമെന്ന് നിർദേശമുണ്ട്.

English Summary : Dubai Holding Asset Management's Dubai Residential has partnered with the UAE fintech platform Rentify to introduce a digital payment system allowing tenants across 22 residential communities—such as Bluewaters, City Walk, and Remram to break down their annual rent into smaller, manageable payments instead of large lump sums or traditional post-dated checks.