കള്ളക്കടൽ പ്രതിഭാസം, കൊല്ലം–തിരുവനന്തപുരം തീരങ്ങളിൽ ജാഗ്രത നിർദ്ദേശം

സംസ്ഥാനത്തിന്റെ തെക്കൻ തീരപ്രദേശങ്ങളിൽ അടുത്ത ദിവസങ്ങളിൽ കള്ളക്കടൽ (swell surge) പ്രതിഭാസത്തിന് സാധ്യതയുണ്ടെന്ന് Indian National Centre for Ocean Information Services (INCOIS) മുന്നറിയിപ്പ് നൽകി. പ്രത്യേകിച്ച് കൊല്ലം ജില്ലയുടെയും തിരുവനന്തപുരം(Thiruvananthapuram) ജില്ലയുടെയും തീരങ്ങളിൽ കടലാക്രമണ സാധ്യത ഉയർന്നതായി അധികൃതർ അറിയിച്ചു.

തിരുവനന്തപുരത്തെ കാപ്പിൽ മുതൽ പൊഴിയൂർ(Pozhiyoor ) വരെയുള്ള തീരപ്രദേശങ്ങളിലും, കൊല്ലത്തെ ആലപ്പാട്(Alappad )മുതൽ എടവ(Edava) വരെയുള്ള തീരങ്ങളിലും ഇന്ന് മുതൽ മാർച്ച് 16 രാത്രി 11.30 വരെ കടലാക്രമണ സാധ്യതയുണ്ടെന്നാണ് അറിയിപ്പ്. ഈ സമയത്ത് 0.9 മുതൽ 1.0 മീറ്റർ വരെ ഉയരമുള്ള തിരമാലകൾ ഉണ്ടാകാൻ സാധ്യതയുണ്ടെന്നും മുന്നറിയിപ്പിൽ പറയുന്നു.

അതേസമയം കന്യാകുമാരി(Kanyakumari)തീരത്തും സമാനമായ രീതിയിൽ മാർച്ച് 16 രാത്രി വരെ ഉയർന്ന തിരമാലകളും കടലാക്രമണ സാധ്യതയും നിലനിൽക്കുന്നതായി ഗവേഷണ കേന്ദ്രം വ്യക്തമാക്കി.

മത്സ്യത്തൊഴിലാളികൾക്ക് ജാഗ്രത നിർദേശം

കടലാക്രമണ ഭീഷണി നിലനിൽക്കുന്ന സാഹചര്യത്തിൽ മത്സ്യത്തൊഴിലാളികളും തീരദേശവാസികളും അതീവ ജാഗ്രത പാലിക്കണമെന്ന് അധികൃതർ നിർദ്ദേശിച്ചു. കടൽക്ഷോഭം ശക്തമാകാൻ സാധ്യതയുള്ള അപകട മേഖലകളിൽ താമസിക്കുന്നവർ അധികൃതരുടെ നിർദേശപ്രകാരം ആവശ്യമായാൽ സുരക്ഷിത പ്രദേശങ്ങളിലേക്ക് മാറി താമസിക്കാൻ തയ്യാറാകണമെന്നും മുന്നറിയിപ്പ് നൽകിയിട്ടുണ്ട്.

വള്ളങ്ങളും ബോട്ടുകളും കടലിലേക്ക് ഇറക്കരുത്

ഈ കാലയളവിൽ ചെറിയ വള്ളങ്ങളും ബോട്ടുകളും കടലിലേക്ക് ഇറക്കുന്നതും കരക്കടുപ്പിക്കുന്നതും അപകടകരമായതിനാൽ അത് പൂർണ്ണമായും ഒഴിവാക്കണമെന്ന് നിർദ്ദേശിച്ചിട്ടുണ്ട്. മത്സ്യബന്ധന യാനങ്ങൾ—ബോട്ടുകൾ, വള്ളങ്ങൾ തുടങ്ങിയവ—ഹാർബറുകളിൽ സുരക്ഷിതമായി കെട്ടിയിട്ട് സംരക്ഷിക്കണം. വള്ളങ്ങൾ തമ്മിൽ കൂട്ടിയിടി ഒഴിവാക്കാൻ മതിയായ അകലം പാലിക്കണമെന്നും നിർദേശം നൽകിയിട്ടുണ്ട്.

ബീച്ചുകളിലേക്ക് പോകുന്നതും ഒഴിവാക്കണം

ജാഗ്രതാ നിർദ്ദേശം പിൻവലിക്കുന്നതു വരെ ബീച്ചുകളിലേക്കുള്ള യാത്രകളും കടലിൽ ഇറങ്ങിയുള്ള വിനോദ പ്രവർത്തനങ്ങളും പൂർണ്ണമായും ഒഴിവാക്കണമെന്ന് അധികൃതർ അറിയിച്ചു. ശക്തമായ തിരമാലകൾ തീരശോഷണത്തിനും കടൽ തീരത്തെ മണ്ണൊലിപ്പിനും കാരണമാകാൻ സാധ്യതയുള്ളതിനാൽ തീരദേശവാസികൾ കൂടുതൽ ജാഗ്രത പുലർത്തണമെന്നും മുന്നറിയിപ്പിൽ പറയുന്നു.

സംസ്ഥാന ദുരന്തനിവാരണ സംവിധാനങ്ങളും പ്രാദേശിക ഭരണകൂടങ്ങളും സ്ഥിതിഗതികൾ നിരീക്ഷിച്ചു കൊണ്ടിരിക്കുകയാണെന്നും ആവശ്യമായ മുൻകരുതൽ നടപടികൾ സ്വീകരിക്കാൻ ബന്ധപ്പെട്ട വകുപ്പുകൾക്ക് നിർദേശം നൽകിയിട്ടുണ്ടെന്നും അധികൃതർ വ്യക്തമാക്കി.

English Summary : The Indian National Centre for Ocean Information Services (INCOIS) has issued a high-priority warning regarding a "Kallakkadal" (Swell Surge) phenomenon expected to impact the southern coast of Kerala. Authorities have placed Thiruvananthapuram and Kollam districts on high alert through March 16, 11:30 PM.