സുമാത്രയിലെ പ്രളയം: മരണ സംഖ്യ 417 ആയി, തായ്‌ലന്റില്‍ 170 മരണം

ഇന്തോനേഷ്യയിലെ സുമാത്രയില്‍ സെന്‍ യാര്‍ ചുഴലിക്കാറ്റ് കരകയറിയതിനെ തുടര്‍ന്നുള്ള പ്രളയത്തിലും ഉരുള്‍പൊട്ടലിലും കൊല്ലപ്പെട്ടവരുടെ എണ്ണം 417 ആയി. ഞായറാഴ്ച വരെ മരണ സംഖ്യ 313 ആയിരുന്നു. ഇന്ന് വൈകിട്ടുള്ള കണക്കനുസരിച്ചാണ് മരണ സംഖ്യ 400 കവിഞ്ഞത്.

സുമാത്രയില്‍ കനത്ത നാശംവിതച്ചാണ് സെന്‍യാര്‍ തായ്‌ലന്റിലേക്ക് പോയത്. പ്രധാന റോഡുകള്‍ ഇപ്പോഴും ഗതാഗത യോഗ്യമായിട്ടില്ല. വൈദ്യുതി വിതരണവും മിക്കയിടത്തും മുടങ്ങിയ നിലയിലാണ്. ഇന്തോനേഷ്യയിലുടനീളം കഴിഞ്ഞ കുറച്ചു ദിവസങ്ങളിലായി ഇന്റര്‍നെറ്റ് തടസ്സം നേരിടുന്നതായി അവിടെയുള്ളവര്‍ പറയുന്നുണ്ട്.

ഇന്തോനേഷ്യയില്‍ മഴക്കാലം പ്രളയമയം

ഇന്തോനേഷ്യയിലെ മഴക്കാലമാണിപ്പോള്‍. തെക്കനേഷ്യന്‍ രാജ്യങ്ങളില്‍ കനത്ത മഴയാണ് കഴിഞ്ഞ കുറച്ചു ആഴ്ചകളായി പെയ്യുന്നത്. തായ്‌ലന്റില്‍ ഇതുവരെ 170 മരണം സെന്‍യാറിനെ തുടര്‍ന്ന് റിപ്പോര്‍ട്ട് ചെയ്യപ്പെട്ടിട്ടുണ്ട്. മലേഷ്യയിലെ വടക്കന്‍ മേഖലയായ പെര്‍ലിസിലും രണ്ടു പേര്‍ മരിച്ചു. ശ്രീലങ്കയില്‍ ഡിറ്റ് വ ചുഴലിക്കാറ്റിനെ തുടര്‍ന്ന് മരണം 190 കവിഞ്ഞു.

തായ്‌ലന്റില്‍ 300 വര്‍ഷത്തെ ഏറ്റവും വലിയ മഴ

തായ്‌ലന്റിലെ സൊന്‍ഖഹ്ല പ്രവിശ്യയില്‍ ജലനിരപ്പ് 3 മീറ്ററാണ് കൂടിയത്. ഇവിടെ 145 പേര്‍ മരിച്ചു. സമീപകാല പതിറ്റാണ്ടുകളിലെ ഏറ്റവും വലിയ പ്രളയത്തെയാണ് തായ്‌ലന്റ് അഭിമുഖീകരിക്കുന്നത്. 10 പ്രവിശ്യകളെയാണ് പ്രളയം ബാധിച്ചത്. 38 ലക്ഷം പേരെ പ്രളയം ബാധിച്ചു. ഹാറ്റ് യായ് പ്രവിശ്യയില്‍ ഒരു ദിവസം 33.5 സെ.മി മഴ പെയ്തു. 300 വര്‍ഷത്തെ ചരിത്രം പരിശോധിക്കുമ്പോള്‍ ഈ പ്രദേശത്ത് പെയ്ത റെക്കോര്‍ഡ് മഴയാണിത്.

photo credit : Getty Image

English Summary: Thailand, 170 deaths have been reported so far due to Senyar. Two people also died in the northern Malaysian state of Perlis. In Sri Lanka, the death toll from Cyclone Dit Va has exceeded 190.