അതിതീവ്ര മഴയെ കുറിച്ച് പഠനം: കുസാറ്റ് ശാസ്ത്രജ്ഞര്‍ക്ക് കേന്ദ്ര അംഗീകാരം

കൊച്ചിന്‍ ശാസ്ത്ര സാങ്കേതിക സര്‍വകലാശാലയിലെ (കുസാറ്റ്) ശാസ്ത്രജ്ഞര്‍ക്ക് കേന്ദ്ര ഭൗമശാസ്ത്ര മന്ത്രാലയത്തിന്റെ അംഗീകാരം. രാജ്യത്തെ അതി തീവ്ര മഴയില്‍ ഉഷ്ണമേഖലാ തരംഗങ്ങളുടെ സ്വാധീനം പഠിക്കുന്ന പദ്ധതിക്കാണ് അംഗീകാരം.

ഈ ഗവേഷണ പദ്ധതിക്ക് 44 ലക്ഷം രൂപയുടെ ഗ്രാന്റ് ആണ് അനുവദിച്ചിരിക്കുന്നത്. അഡ്വാന്‍സ്ഡ് സെന്റര്‍ ഫോര്‍ അറ്റ്‌മോസ്‌ഫെറിക് റഡാര്‍ റിസര്‍ച്ചിലെ ശാസ്ത്രജ്ഞന്‍ ഡോ. അജില്‍ കോട്ടയില്‍ പ്രിന്‍സിപ്പല്‍ ഇന്‍വെസ്റ്റിഗേറ്ററായും അറ്റ്‌മോസ്‌ഫെറിക് സയന്‍സസ് വിഭാഗത്തിലെ പ്രൊഫസര്‍ ഡോ. കെ. സതീശന്‍ കോ-പ്രിന്‍സിപ്പല്‍ ഇന്‍വെസ്റ്റിഗേറ്ററായി പ്രവര്‍ത്തിക്കും.

ഡോ. അജിൽ കോട്ടയിൽ

ഡോ. കെ സതീശൻ

ഇന്ത്യന്‍ മേഖലയിലെ അതിതീവ്ര മഴ എങ്ങനെ ഉഷ്ണമേഖലാ തരംഗങ്ങളാല്‍ സ്വാധീനിക്കപ്പെടുന്നു എന്ന് പരിശോധിക്കുന്നതാണ് പദ്ധതിയുടെ പ്രധാന ലക്ഷ്യം. മൂന്ന് വര്‍ഷം ദൈര്‍ഘ്യമുള്ള ഈ ഗവേഷണത്തില്‍, ഇതുവരെ താരതമ്യേന കുറച്ച് മാത്രം പഠനവിധേയമായിട്ടുള്ള ഉഷ്ണമേഖലാ തരംഗ പ്രവര്‍ത്തനങ്ങള്‍ ഇന്ത്യയിലെ അതിതീവ്ര മഴ എങ്ങനെ സ്വാധീനിക്കുന്നു എന്നതിനെ കുറിച്ച് ആഴത്തിലുള്ള പഠനം നടത്തും.