ഈ ചൂടിൽ രുചിയുള്ള തണ്ണിമത്തൻ ടെറസിലും വളർത്താം

ഈ ചൂടിൽ ഒരു തണ്ണിമത്തൻ ജ്യൂസിന് വേണ്ടി കടയിൽ പോകേണ്ട. നിരത്തുകളിലും കടകളിലും ലഭിക്കുന്ന തണ്ണിമത്തൻ ഇനി വീടിൻ്റെ ടെറസിലും ഉണ്ടാക്കാം. ഇതിന് സ്ഥലപരിമിതി ഒരു പ്രശ്നമല്ല. ഇതിനായി ചെറിയ സ്ഥലത്ത് വളരുന്ന ചെറിയ തണ്ണിമത്തൻ ഇനങ്ങളാണ് അനുയോജ്യം.

വലുപ്പത്തിൽ ചെറുത് രുചിയിൽ കേമൻ

ഷുഗർ ബേബി, ബുഷ് ഷുഗർ ബേബി’ തുടങ്ങിയ ഇനങ്ങൾ ആണ് പ്രധാനമായും ടെറസുകളിൽ നടുന്നത്. ഇവയ്ക്ക് വളരാൻ ഒരുപാട് സ്ഥലത്തിൻ്റെ ആവശ്യമില്ല. ഈ ഇനം തണ്ണിമത്തൻ ആളൊരു കുള്ളനാണ്. പക്ഷേ രുചിയിൽ കേമനാണ്. അത്രയധികം മധുരമാണ് ഈ തണ്ണിമത്തനുള്ളത്.

കുള്ളൻ തണ്ണിമത്തൻ എങ്ങനെ നടാം

വേരുകൾ നന്നായി പടരുന്നതിനായി കുറഞ്ഞത് 16 മുതൽ 20 ഇഞ്ച് വരെ ആഴവും വീതിയുമുള്ള വലിയ പാത്രങ്ങൾ തെരഞ്ഞെടുക്കണം. ശേഷം വെള്ളം കെട്ടിനിൽക്കാതിരിക്കാൻ പാത്രത്തിന്റെ അടിയിൽ ആവശ്യമായ ദ്വാരങ്ങളുണ്ടാക്കുക. തോട്ടമണ്ണ്, കമ്പോസ്റ്റ്, കൊക്കോപീറ്റ് എന്നിവ തുല്യ അളവിൽ ചേർത്ത ജൈവസമ്പുഷ്ടമായ മിശ്രിതമാണ് തണ്ണിമത്തന് അനുയോജ്യം. കാരണം ഇത് വേരുകളുടെ വളർച്ചയ്ക്കും മണ്ണിലെ ഈർപ്പം നിലനിർത്താനും സഹായിക്കും.

സൂര്യപ്രകാശം പ്രധാനം

ദിവസവും 6 മുതൽ 8 മണിക്കൂർ വരെ നേരിട്ട് സൂര്യപ്രകാശം ലഭിക്കുന്ന വെക്കേണ്ടത്. ആവശ്യത്തിന് സൂര്യപ്രകാശം ലഭിക്കുന്നത് വള്ളികളുടെ ആരോഗ്യകരമായ വളർച്ചയ്ക്കും പഴങ്ങളിൽ മധുരം കൂടാനും സഹായിക്കും. ആദ്യഘട്ടത്തിൽ മണ്ണിൽ ആവശ്യത്തിന് ഈർപ്പം നിലനിർത്തുന്ന രീതിയിൽ വേണം നനയ്ക്കാൻ. ഇത് പൂക്കൾ വിരിഞ്ഞുതുടങ്ങുന്നതു വരെ തുടരാം. പിന്നീട് അമിതമായ നന ഒഴിവാക്കി ആവശ്യത്തിന് മാത്രം വെള്ളം ഒഴിക്കുക. വള്ളികൾ കൂടുതൽ പടർന്നുപിടിക്കാതിരിക്കാൻ താങ്ങുകൾ ഉപയോഗിച്ച് മുകളിലേക്ക് വളർത്താം. ഇത് സ്ഥലം ലാഭിക്കുന്നതിനൊപ്പം വള്ളികൾ മണ്ണുമായി നേരിട്ട് സമ്പർക്കത്തിൽ വരുന്നത് കുറച്ച് ഫംഗസ് രോഗങ്ങളുടെ സാധ്യതയും കുറയ്ക്കും.

കായ്കളുടെ രൂപീകരണം മെച്ചപ്പെടുത്താം

ടെറസ് ഗാർഡനുകളിൽ സ്വാഭാവിക പരാഗണം കുറയാൻ സാധ്യതയുണ്ട്. അതിനാൽ കൈകൊണ്ടുള്ള പരാഗണം നടത്തുന്നതാണ് ഗുണകരം. ബ്രഷോ കോട്ടൺ സ്വാബോ ഉപയോഗിച്ച് ആണ്‍പൂക്കളിൽ നിന്നുള്ള പരാഗം പെൺപൂക്കളിലേക്ക് എത്തിച്ചാൽ കായ്കളുടെ രൂപീകരണം മെച്ചപ്പെടുത്താം.

എപ്പോൾ വിളവെടുക്കാം

തണ്ണിമത്തൻ വിളവെടുക്കാൻ പാകമായെന്ന് തിരിച്ചറിയാൻ പഴം മണ്ണിൽ തൊട്ടിരിക്കുന്ന ഭാഗത്ത് മഞ്ഞനിറം പ്രത്യക്ഷപ്പെടുകയും തണ്ടിനോട് ചേർന്നുള്ള വള്ളി ഉണങ്ങിത്തുടങ്ങുകയും ചെയ്താൽ വിളവെടുപ്പിന് പാകമായതായി കണക്കാക്കാം.
നല്ല പരിചരണവും ശ്രദ്ധയും നൽകിയാൽ കുറഞ്ഞ സ്ഥലത്തും സ്വന്തം ആവശ്യത്തിനുള്ള തണ്ണിമത്തൻ വളർത്തിയെടുക്കാം. രാസവളങ്ങളുടെ ഉപയോഗം ഒഴിവാക്കി ജൈവരീതിയിൽ കൃഷി ചെയ്താൽ വീട്ടിൽ തന്നെ വിളവെടുക്കുന്ന ശുദ്ധമായ തണ്ണിമത്തന്റെ മധുരവും ആസ്വദിക്കാം.

English Summary : Learn how to grow sweet, organic watermelons on your terrace with this simple container gardening guide. Discover compact varieties like 'Bush Sugar Baby', ideal potting soil mixes, hand pollination techniques, and sunlight requirements to maximize your yield in small urban spaces.