കാലവർഷത്തിൽ 28% മഴക്കുറവ്; കേരളത്തിൽ വരൾച്ച പ്രഖ്യാപനത്തിന് നടപടി തുടങ്ങി

തെക്കുപടിഞ്ഞാറൻ കാലവർഷത്തിൽ അതായത് എടവപ്പാതിയിൽ ഇത്തവണ 28 ശതമാനം മഴ കുറഞ്ഞുവെന്നാണ് കാലാവസ്ഥാ സ്ഥിരീകരണം. അതിനാൽ കേരളത്തിൽ വരൾച്ച പ്രഖ്യാപിക്കാനുള്ള നടപടികൾ ആരംഭിച്ചു കഴിഞ്ഞു. സംസ്ഥാന ദുരന്തനിവാരണ അതോറിറ്റി ഒന്നാംഘട്ട പ്രഖ്യാപനത്തിനുള്ള ശുപാർശയും നൽകിയിട്ടുണ്ട്.

പൂർണ്ണപരിശോധനയ്ക്ക് ശേഷം രണ്ടാം ഘട്ടം

നദികൾ ഉൾപ്പെടെയുള്ള ജലാശയങ്ങളിലെ ജലനിരപ്പ്, ഭൂഗർഭ ജലനിരപ്പ്, കൃഷിനാശം എന്നിവ പരിശോധിച്ച ശേഷമായിരിക്കും രണ്ടാംഘട്ട വിലയിരുത്തൽ. ഒക്ടോബറിന് ശേഷമാകും ഈ പരിശോധന. ഇതിന് പിന്നാലെ സംസ്ഥാനമാകെയോ, തിരഞ്ഞെടുത്ത ജില്ലകളെയോ വരൾച്ചബാധിത പ്രദേശങ്ങളായി ഔദ്യോഗികമായി പ്രഖ്യാപിക്കും.

ജൂൺ മുതൽ സെപ്റ്റംബർ വരെയുള്ള എടവപ്പാതിയിൽ കേരളത്തിൽ 2018.6 മില്ലിമീറ്റർ മഴയാണ് പ്രതീക്ഷിച്ചിരുന്നത്. എന്നാൽ ലഭിച്ചത് 1446.5 മില്ലിമീറ്റർ മാത്രം.

El Nino Threatens Kerala Agriculture: എൽ നിനോ ശക്തമാകുന്നു; കാർഷിക കേരളം ആശങ്കയിൽ, ഒക്ടോബർ പകുതിയോടെ തുലാവർഷമെത്തുമെന്ന് കലാവസ്ഥാ വകുപ്പ്
ഈ വർഷം അവസാനത്തോടെ രാജ്യത്ത് എൽ നിനോ (El Nino) പ്രതിഭാസം ശക്തമാകുമെന്ന മുന്നറിയിപ്പാണ് കാലാവസ്ഥാ ഗവേഷകർ നൽകുന്നത്.
https://metbeatnews.com/thullavarsham-crop-losses-and-market-declines

ഏഴാമത്തെ വരണ്ട കാലവർഷം

1901ന് ശേഷമുള്ള ഏഴാമത്തെയും 2001ന് ശേഷമുള്ള നാലാമത്തെയും ഏറ്റവും ശോഷിച്ച എടവപ്പാതിയാണ് ഇത്തവണ പിന്നിട്ടതെന്ന് കാലാവസ്ഥാ നിരീക്ഷണകേന്ദ്രം പറഞ്ഞു. 2023ൽ 34.3 ശതമാനം മഴക്കുറവാണ് രേഖപ്പെടുത്തിയത്. അന്നും എൽ-നിനോ വർഷമായിരുന്നു. 2016ൽ 33 ശതമാനം മഴ കുറഞ്ഞപ്പോൾ സംസ്ഥാനത്താകെ വരൾച്ച പ്രഖ്യാപിച്ചിരുന്നു.

ഇത്തവണ എല്ലാ ജില്ലകളിലും മഴക്കുറവ്

സംസ്ഥാനത്തെ എല്ലാ ജില്ലകളിലും ഇത്തവണ മഴ കുറഞ്ഞു. വയനാട്ടിലാണ് ഏറ്റവും മഴക്കുറവ് രേഖപ്പെടുത്തിയത്, 53 ശതമാനം. അതേസമയം, ആറ് ജില്ലകളിൽ മഴ സാധാരണ തോതിനോട് അടുത്തുനിന്നു.

കാസർകോട് 17 ശതമാനം, കണ്ണൂർ 12 ശതമാനം, കോഴിക്കോട് 17 ശതമാനം, കോട്ടയം 17 ശതമാനം, പത്തനംതിട്ട 12 ശതമാനം, തിരുവനന്തപുരം 15 ശതമാനം എന്നിങ്ങനെയാണ് പ്രധാന ജില്ലകളിലെ മഴക്കുറവ്.

തുലാവർഷത്തിലും മഴ കുറയും; ചൂട് കൂടും

ഒക്ടോബർ മുതൽ ഡിസംബർ വരെയുള്ള വടക്കുകിഴക്കൻ കാലവർഷമായ തുലാവർഷത്തിലും കേരളത്തിൽ മഴ കുറയുമെന്നാണ് വിലയിരുത്തൽ. തെക്കൻ ജില്ലകളിലെ ചില പ്രദേശങ്ങളിൽ സാധാരണ തോതിൽ മഴ ലഭിച്ചേക്കാമെങ്കിലും വടക്കൻ കേരളത്തിൽ മഴ കുറയാൻ സാധ്യതയുണ്ട്.

സംസ്ഥാനത്ത് ചൂടും സാധാരണയേക്കാൾ കൂടുതലായിരിക്കുമെന്നാണ് പ്രവചനം. ഒക്ടോബറിലും വളരെ കുറച്ച് പ്രദേശങ്ങളിൽ മാത്രമേ സാധാരണ തോതിൽ മഴ ലഭിക്കാൻ സാധ്യതയുള്ളൂ. സമുദ്രോപരിതല താപനില ഉയരുന്ന എൽ-നിനോ പ്രതിഭാസം സജീവമായിരിക്കുന്നതും മഴയുടെ കുറവിന് കാരണമാകുന്ന ഘടകങ്ങളിലൊന്നാണ്.

English Summary : Kerala has initiated formal procedures to declare a drought following a 28% rainfall deficit during the Southwest Monsoon (Edavapathi). The State Disaster Management Authority has issued preliminary recommendations, with a comprehensive second-phase review scheduled after October to assess groundwater levels, river storage, and agricultural loss. Wayanad recorded the highest deficit at 53%, driven by the active El Niño phenomenon.