കാലവര്‍ഷം കേരളത്തിനരികെ, കന്യാകുമാരി കടലിലും ശ്രീലങ്കയിലും അറബിക്കടലിലുമെത്തി

തെക്കുപടിഞ്ഞാറന്‍ മണ്‍സൂണ്‍ (കാലവര്‍ഷം) കേരളത്തിന് തൊട്ടടുത്തെത്തി. കന്യാകുമാരി കടലിലും തെക്കുകിഴക്കന്‍ അറബിക്കടലിലും കാലവര്‍ഷം എത്തിയതായി കേന്ദ്ര കാലാവസ്ഥാ വകുപ്പ് സ്ഥിരീകരിച്ചു. ശ്രീലങ്കയിലും ഇതിനകം കാലവര്‍ഷം വ്യാപിച്ചു.

വരും ദിവസങ്ങളില്‍ തെക്കു കിഴക്കന്‍ അറബിക്കടലിലെ കൂടുതല്‍ പ്രദേശങ്ങളിലേക്ക് കാലവര്‍ഷം വ്യാപിക്കും. ആന്‍ഡമാന്‍ കടലിന്റെ കൂടുതല്‍ മേഖലകള്‍, നിക്കോബാര്‍ ദ്വീപുകള്‍ പൂര്‍ണമായും ഈ മാസം 18 നകം കാലവര്‍ഷം വ്യാപിക്കും.

ആന്‍ഡമാന്‍ നിക്കോബാര്‍ ദ്വീപുകളില്‍ ഈ മാസം 16 നാണ് കാലവര്‍ഷം എത്തിയത്. സാധാരണ ഇവിടെ കാലവര്‍ഷം എത്തേണ്ടത് മെയ് 22 നാണ്. ആറു ദിവസം മുന്‍പാണ് ഇത്തവണ കാലവര്‍ഷം ആന്‍ഡമാന്‍ ദ്വീപിലെത്തിയത്. മ്യാന്‍മറിന്റെ ഭാഗങ്ങളിലും ഇതോടൊപ്പം കാലവര്‍ഷം എത്തിയിട്ടുണ്ട്.

മെയ് 16 ന് തന്നെ കാലവര്‍ഷം തെക്കന്‍ ശ്രീലങ്കയില്‍ എത്തിയിരുന്നു. കഴിഞ്ഞ ദിവസം മുതൽ ശ്രീലങ്കയുടെ തെക്കന്‍ മേഖല പൂര്‍ണമായും കാലവര്‍ഷം വ്യാപിച്ച് മധ്യ ശ്രീലങ്കയില്‍ വരെ എത്തിയിട്ടുണ്ട്. സാധാണ മെയ് 26 നാണ് ശ്രീലങ്കയിലെ മധ്യ, വടക്കന്‍ മേഖലയില്‍ കാലവര്‍ഷം എത്തുന്നത്.

ഇത്തവണ മെയ് 26 ന് കേരളത്തില്‍ കാലവര്‍ഷം എത്തുമെന്നാണ് കേന്ദ്ര കാലാവസ്ഥാ വകുപ്പിന്റെ പ്രവചനം. ജൂണ്‍ 1 നാണ് കേരളത്തില്‍ സാധാരണ കാലവര്‍ഷം എത്തേണ്ടത്. നാലു ദിവസത്തെ മോഡല്‍ വ്യതിയാനം പ്രവചനത്തിനുണ്ട്. ആന്ധ്രാപ്രദേശ് തീരത്ത് അന്തരീക്ഷച്ചുഴി നിലനില്‍ക്കുന്നുണ്ട്.

ഇത് കാലവര്‍ഷക്കാറ്റിനെ വേഗത്തില്‍ കേരളത്തിലേക്ക് കൊണ്ടുവരുമോയെന്നാണ് നിരീക്ഷിക്കേണ്ടത്. തെക്കുകിഴക്കന്‍ അറബിക്കടലില്‍ നിന്ന് ലക്ഷദ്വീപ് മേഖലയിലേക്ക് ചക്രവാത ചുഴിയും നിലനില്‍ക്കുന്നു. കേരളത്തില്‍ കാലവര്‍ഷത്തിന് സമാനമായ അന്തരീക്ഷ സാഹചര്യമാണ് ഇന്നലെയും ഇന്നും ഇതുകാരണം ഉടലെടുത്തത്. മഴയില്ലെങ്കിലും ആകാശം മേഘാവൃതവും തണുത്ത അന്തരീക്ഷവുമായിരുന്നു.

English Summary : The Southwest Monsoon is rapidly advancing toward the Kerala coast, making an early entry into the Kanyakumari Sea, the South-East Arabian Sea, and Sri Lanka. According to the India Meteorological Department (IMD), the monsoon hit the Andaman and Nicobar Islands six days ahead of schedule on May 16 and is currently covering central Sri Lanka.