തുലാദി വിഷുവം നാളെ, പകലും രാത്രിയും തുല്യം, ഇതിന്റെ ശാസ്ത്രമറിയാം

നാളെ സെപ്റ്റംബര്‍ 22 ന് ആണ് ഈ വര്‍ഷത്തെ തുലാദി വിഷുവം ( autumnal equinox). തുല്യമായ പകലും രാത്രിയും ഭൂമധ്യ രേഖാ പ്രദേശത്ത് അനുഭവപ്പെടുന്നത് വര്‍ഷത്തില്‍ രണ്ടു തവണകളിലായി ഉണ്ടാകുന്ന വിഷുവം ദിനങ്ങളിലാണ്. മേഷാദി വിഷുവം അഥവാ മഹാ വിഷുവം (vernal equinox) കഴിഞ്ഞ മാര്‍ച്ച് 20 നായിരുന്നു. സൂര്യന്‍ ദക്ഷിണാര്‍ധ ഗോളത്തില്‍ നിന്ന് ഉത്തരാര്‍ധ ഗോളത്തിലേക്ക് പോകുമ്പോഴാണ് മേഷാദി വിഷുവം സംഭവിക്കുന്നത്. സൂര്യന്‍ ഉത്തരാര്‍ധ ഗോളത്തില്‍ നിന്ന് ദക്ഷിണാര്‍ധ ഗോളത്തിലേക്ക് തിരികെ വരുമ്പോഴാണ് തുലാദി വിഷുവം autumnal equinox സംഭവിക്കുന്നത്.

ഉത്തരാര്‍ധ ഗോളത്തിലെ വേനല്‍ തീരുന്നു

ഉത്തരാര്‍ധ ഗോളത്തിലെ വേനലിന്റെ തുടക്കമറിയിച്ചാണ് മാര്‍ച്ച് 20 ന് മേഷാദി വിഷുവം അഥവാ മഹാവിഷുവം നടക്കുന്നത്. അന്നും ഭൂമധ്യരേഖാ പ്രദേശത്ത് പകലും രാത്രിയും തുല്യമായിരിക്കും. നിലവില്‍ ഭൂമിയുടെ വടക്കന്‍ അര്‍ധഗോളത്തില്‍ വേനല്‍ക്കാലമാണ്. നാളെത്തോടെ വേനലില്‍ നിന്ന് ശൈത്യകാലത്തിലേക്ക് ഋതുമാറ്റം സംഭവിക്കും. ധ്രുവപ്രദേശങ്ങളില്‍ നിന്ന് ശൈത്യകാലം ഭൂമധ്യ രേഖാ പ്രദേശത്തേക്ക് പതുക്കെ വ്യാപിക്കും വരും മാസങ്ങളില്‍. അതേസമയം, സൂര്യന്‍ വീണ്ടും ദക്ഷിണാര്‍ധ ഗോളത്തിലേക്ക് നീങ്ങുന്നതിനാല്‍ അവിടെ ഇനിയുള്ള കാലം വേനലാണ്. ആസ്‌ത്രേലിയ, ന്യൂസിലാന്റ് തുടങ്ങിയ രാജ്യങ്ങളില്‍ ഋതുമാറുകയാണ്.

ഖഗോളം (celestial sphere) കടന്ന് സൂര്യന്റെ സഞ്ചാരം

ഭൂമിക്കു ചുറ്റും ഒരു വലിയ ഗോളമായി ആകാശത്തെ സങ്കല്‍പ്പിക്കുക. ഇതാണ് ഖഗോളം (celestial sphere) എന്ന് വിളിക്കുന്നത്. അതില്‍ കിഴക്കുപടിഞ്ഞാറു ദിശയില്‍ ഭൂമധ്യരേഖയ്ക്കു സമാന്തരമായി സങ്കല്‍പിക്കാവുന്ന ഖഗോള മധ്യരേഖയുണ്ട് (celestial equator). ഇതൊരു ആകാശവൃത്തം രൂപപ്പെടുത്തുന്നു. സൂര്യന്‍ ഭൂമിക്കു ചുറ്റും ഒരു വര്‍ഷംകൊണ്ട് പൂര്‍ത്തിയാക്കുന്നതായി അനുഭവപ്പെടുന്ന സഞ്ചാരപഥമാണ് ക്രാന്തിവൃത്തം (ecliptic) എന്നറിയപ്പെടുന്നത്.

ഈ രണ്ടു വൃത്തങ്ങളും തമ്മില്‍ 23.5 ഡിഗ്രി ചരിവുള്ളതിനാല്‍ അവ രണ്ടു സ്ഥാനങ്ങളില്‍ സന്ധിക്കും. ഇങ്ങനെയുണ്ടാകുന്ന സന്ധികളാണ് വിഷുവസ്ഥാനങ്ങള്‍. ഭൂമിയുടെ ഇരുവശങ്ങളിലുമായി 180 ഡിഗ്രി വ്യത്യാസത്തിലാണ് ഇവ രണ്ടും കാണുക. ഇതില്‍ ആദ്യത്തേത് വസന്ത വിഷുവം (vernal equinox) എന്നും രണ്ടാമത്തേത് ശരത് വിഷുവം (autumnal equinox) എന്നും അറിയപ്പെടുന്നു.

ഖഗോള മധ്യരേഖ (celestial equator)

സൂര്യന്‍ ക്രാന്തിപഥത്തിലൂടെയുള്ള സഞ്ചാരത്തിനിടെ മാര്‍ച്ച് 21ന് (മീനം 7) വസന്ത വിഷുവത്തിലെത്തും. അന്ന് സൂര്യന്‍ ഭൂമധ്യരേഖയ്ക്കു മുകളിലായതുകൊണ്ട് ഭൂമധ്യരേഖാപ്രദേശത്ത് സൂര്യരശ്മികള്‍ കുത്തനെ പതിക്കുന്നു. ആ ദിവസം ഭൂമധ്യ രേഖാ പ്രദേശത്തും സമീപ മേഖലയിലും രാത്രിയും പകലും തുല്യമായി അനുഭവപ്പെടും. അന്നുമുതലാണ് ഉത്തരായനം തുടങ്ങുന്നത്. സൂര്യന്‍ ഭൂമധ്യ രേഖ കടന്ന് വടക്കോട്ടുള്ള സഞ്ചാരമാണ് ഉത്തരായനം.

അയനാന്തങ്ങള്‍, ഉദയ അസ്തമയ ദിശ മാറുന്നത്

മാര്‍ച്ച് 21 കഴിഞ്ഞാല്‍ സൂര്യന്റെ ഉദയാസ്തമയ സ്ഥാനങ്ങള്‍ ദിവസേന ഏകദേശം നാലിലൊന്ന് ഡിഗ്രി വീതം വടക്കോട്ട് നീങ്ങിത്തുടങ്ങും. അങ്ങിനെ, ജൂണ്‍ 22ന് (മിഥുനം 8) 23.5 ഡിഗ്രി വടക്കുമാറിയുള്ള ഉത്തരായന രേഖയുടെ മുകളിലെത്തും. അന്നാണ് ഉത്തരായനാന്തം (summer solstice). അയനാന്തമെന്നാല്‍ സൂര്യന്‍ ഭൂമിയെ പരിക്രമണം ചെയ്യുന്നതിന്റെ പരമാവധി അകലം. ഉത്തരഅയനാന്തത്തില്‍ സൂര്യന്‍ ഭൂമിയുടെ വടക്കേ അറ്റത്തായിരിക്കും. ദക്ഷിണഅയനാന്തത്തില്‍ തെക്കേ അറ്റത്തുമായിരിക്കും.

വിഷുവം ദിനത്തിൽ രാത്രിയും പകലും തുല്യം - ഉപഗ്രഹ ചിത്രം

പകലിന്റെ നീളം കൂടുന്നു, രാത്രി കുറയും

മാര്‍ച്ച് 21 മുതല്‍ ഉത്തരാര്‍ധ ഗോളത്തില്‍ പകലിന്റെ നീളം ക്രമാനുഗതമായി വര്‍ധിച്ച് ജൂണ്‍ 22ന് പാരമ്യത്തിലെത്തുന്നു. ചൂടിന്റെ ആധിക്യവും കൂടിവരും. ജൂണില്‍ മഴ കുറയുമ്പോള്‍ കേരളത്തില്‍ പൊള്ളുന്ന ചൂട് എന്നു പറയുന്നതിന്റെ ഒരു കാരണം ഇതാണ്. മണ്‍സൂണ്‍ മേഘങ്ങള്‍ മാറി നിന്നാല്‍ നമുക്ക് കടുത്ത ചൂട് ഈ സമയത്ത് അനുഭവപ്പെടും. ഈ ദിവസങ്ങളില്‍ രാത്രിയുടെ ദൈര്‍ഘ്യം കുറയുകയും ചെയ്യും. ഇക്കാലത്ത് കേരളത്തില്‍ കാലവര്‍ഷമായതുകൊണ്ട് ചൂടിന്റെ കാഠിന്യം നമുക്ക് അനുഭവപ്പെടാറില്ല, കാലവര്‍ഷം ദുര്‍ബലമായി ജൂണില്‍ നമുക്ക് സഹിക്കാനാകാത്ത ചൂടായിരിക്കും എന്നര്‍ഥം. ദക്ഷിണാര്‍ധ ഗോളത്തില്‍ ഇതിനു നേരെ വിപരീതമായ കാര്യങ്ങളാണ് ഈസമയം സംഭവിക്കുക.

ദക്ഷിണ അയനം തുടങ്ങി, നാളെ ഭൂമധ്യരേഖ കടക്കും

ജൂണ്‍ 22 മുതല്‍ സൂര്യന്‍ തിരിച്ച് ദക്ഷിണായനം തുടങ്ങുകയായി. സെപ്റ്റംബര്‍ 23ന് (കന്നി 7) ഭൂമധ്യരേഖയില്‍ തിരിച്ചെത്തും. അന്ന് ശരത് വിഷുവം (autumnal equinox). ഈ സമരാത്ര ദിനത്തിനുശേഷം തെക്കോട്ടിറക്കം തുടരുന്നു. ഡിസംബര്‍ 22ന് (ധനു 7) ദക്ഷിണായന രേഖയിലെത്തും, അന്ന് ദക്ഷിണായനാന്തം (winter solstice). ഉത്തരാര്‍ധ ഗോളത്തില്‍ ഏറ്റവും നീളംകുറഞ്ഞ പകല്‍ അന്നാണ്, പരമാവധി തണുപ്പും അനുഭവപ്പെടും. ഉത്തരാര്‍ധ ഗോളത്തില്‍ സംഭവിക്കുന്നതിന് നേരേ വിരുദ്ധമായ അവസ്ഥയായിരിക്കും ദക്ഷിണാര്‍ധ ഗോളത്തില്‍ സംഭവിക്കുക. ഡിസംബര്‍ 22നു ശേഷം സൂര്യന്‍ ദക്ഷിണായനം അവസാനിപ്പിച്ച് തിരിച്ച് ഉത്തരായനം തുടങ്ങും. കാലാവസ്ഥയെയും ഋതുക്കളെയും സ്വാധീനിക്കുന്നത് ഭൂമിയുടെ ചെരിവും പരിക്രമണവും ഉള്‍പ്പെടെയുള്ള കാര്യങ്ങളാണ്.

English Summary : Discover the significance of Thuladi Vishu, where day and night are equal. Explore the science behind this unique phenomenon and its cultural importance.