ചെന്നൈയിൽ അതിതീവ്രമഴ; വെള്ളക്കെട്ടിൽ വലഞ്ഞ് ജനങ്ങൾ

വടക്കുകിഴക്കൻ കാലവർഷം (Northeast Monsoon) ശക്തിപ്രാപിച്ചതോടെ ചെന്നൈയിലും സമീപപ്രദേശങ്ങളിലും ഇന്നലെ രാത്രി മുഴുവൻ അതിശക്തമായ മഴ പെയ്തു. വടക്കൻ ചെന്നൈയിലും വേളച്ചേരിയിലും വെള്ളക്കെട്ട് രൂക്ഷമായി. റോഡുകളിലും സബ്‌വേകളിലും കെട്ടിക്കിടന്ന വെള്ളം നീക്കാൻ ഗ്രേറ്റർ ചെന്നൈ കോർപ്പറേഷൻ (GCC) ജീവനക്കാർ രാത്രി മുഴുവൻ പ്രവർത്തിച്ചെങ്കിലും ചില ജനവാസ മേഖലകളിൽ വെള്ളക്കെട്ട് തുടരുകയാണ്.

3 hrs
300 mm Rain 😱
Stay Safe...#ChennaiRains pic.twitter.com/RtLl4kHbLQ
— ɴᴀɢᴀʀᴀᴊᴜ (@Bezawada_Alludu) October 18, 2026

21 വരെ ഒറ്റപ്പെട്ടയിടങ്ങളിൽ ശക്തമായതോ അതിശക്തമായതോ ആയ മഴയ്ക്ക് സാധ്യതയുണ്ട്. ഒക്ടോബർ 22 മുതൽ 24 വരെ ഒറ്റപ്പെട്ട ശക്തമായ മഴയും തുടരാനിടയുണ്ട്. ഇന്ന് ഈ മേഖലകളിൽ ഒറ്റപ്പെട്ടയിടങ്ങളിൽ ശക്തമായതോ അതിശക്തമായതോ ആയ മഴയ്ക്ക് സാധ്യതയുണ്ടെന്നാണ് മുന്നറിയിപ്പ്. ഇടിമിന്നലോടുകൂടിയ മഴയ്ക്കും മണിക്കൂറിൽ 40 മുതൽ 50 കിലോമീറ്റർ വരെ വേഗത്തിൽ വീശുന്ന കാറ്റിനും സാധ്യയുണ്ട്.

ഗ്രേറ്റർ ചെന്നൈ കോർപ്പറേഷന്റെ മഴക്കണക്ക് പ്രകാരം പാരിസിൽ 36.3 സെന്റിമീറ്റർ മഴ രേഖപ്പെടുത്തി. എന്നൂർ കത്തിവാക്കത്ത് 34 സെന്റിമീറ്ററും മീനമ്പാക്കത്ത് 28 സെന്റിമീറ്ററും ചെന്നൈ സെൻട്രലിൽ 27.4 സെന്റിമീറ്ററും മഴ ലഭിച്ചു. അതിശക്തമായ മഴ റിപ്പോർട്ട് ചെയ്ത 21 കേന്ദ്രങ്ങളിൽ 14 എണ്ണവും വടക്കൻ ചെന്നൈയിലാണ്.

വേളച്ചേരിയിലും വെള്ളക്കെട്ട്

വേളച്ചേരിയിലെ ഭുവനേശ്വരി നഗർ, റാം നഗർ, എജിഎസ് കോളനി, ടാൻസി നഗർ എന്നിവിടങ്ങളിൽ റോഡുകളിൽ മുട്ടോളം വെള്ളം കയറിയതായി റിപ്പോർട്ടുകളുണ്ട്. കനാലുകളിലെ തടസ്സങ്ങളും പൂർത്തിയാകാത്ത ഓടകളും ഡ്രെയിനേജ് സംവിധാനങ്ങൾ തമ്മിലുള്ള ബന്ധമില്ലായ്മയുമാണ് വെള്ളക്കെട്ടിന് കാരണമെന്ന് പ്രദേശവാസികൾ ആരോപിച്ചു.

ചെന്നൈയിൽ ഞായറാഴ്ച രാവിലെ ആറിന് അവസാനിച്ച 24 മണിക്കൂറിതൽ 10.5 സെന്റിമീറ്റർ മഴയാണ് രേഖപ്പെടുത്തിയത്. വരും ദിവസങ്ങളിലും മഴ തുടരാനുള്ള സാധ്യത നിലനിൽക്കുന്നതിനാൽ വെള്ളക്കെട്ട് രൂക്ഷമാകാതിരിക്കാൻ ഡ്രെയിനേജ് സംവിധാനങ്ങൾ കാര്യക്ഷമമാക്കുന്നതും അടിയന്തര നടപടികൾ ശക്തമാക്കുന്നതും നിർണായകമാകും.

English Summary : The Northeast Monsoon has triggered heavy downpours across Chennai and neighboring areas, causing severe waterlogging in parts of North Chennai and Velachery. With weather departments forecasting continued heavy to very heavy rainfall until October 24, areas like Paris recorded an alarming 36.3 cm of rainfall.