Kerala Weather Update : കേരളത്തിൽ ഇന്ന് 7 ജില്ലകളിൽ യെല്ലോ അലർട്ട് ; മലയോരമേഖലകളിൽ ശക്തമായ കാറ്റ്; വ്യാപക നാശനഷ്ടം

ഇന്നലെ രാത്രി 8.30 നു ഉണ്ടായ ഇടിമിന്നലിൽ കടപ്ലാമറ്റം വില്ലേജിൽ വയലാ പാലക്കാട്ടുകുന്നു ജംഗ്ഷനു സമീപമുള്ള കടയിൽ നിന്നിരുന്ന വയലാ സ്വദേശികളായ സന്തോഷ്‌ പറത്തോട്ടയിൽ, (35)'റെനീഷ് പാലക്കുഴിയിൽ (29),അജി വല്ലാട്ടുകുന്നേൽ (56), ശശി ഇലവുങ്കൽ (55) എന്നിവർക്ക് ഇടിമിന്നലേറ്റ് പരിക്കുപറ്റി കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിട്ടുള്ളതാണ് ആരുടെയും പരുക്ക് ഗുരുതരമല്ല എന്ന് അറിയുന്നു

India Meteorological Departmentയുടെ മുന്നറിയിപ്പുപ്രകാരം കേരളത്തിൽ ഇന്ന് (May 16) മുതൽ May 20 വരെ ഒറ്റപ്പെട്ടയിടങ്ങളിൽ ഇടിമിന്നലോടുകൂടിയ മഴക്കും മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യത. ജനങ്ങൾ അതീവ ജാഗ്രത പാലിക്കണമെന്ന് അധികൃതർ നിർദേശിച്ചു. മുൻകരുതൽ (Precautions) നിർബന്ധം ഇടിമിന്നലിന്റെ ആദ്യ ലക്ഷണം കണ്ടാൽ തന്നെ സുരക്ഷിതമായ കെട്ടിടത്തിനുള്ളിലേക്ക് മാറണം. തുറസായ സ്ഥലങ്ങളിലും ടെറസുകളിലും തുടരുന്നത് അപകടസാധ്യത വർധിപ്പിക്കും. ശക്തമായ കാറ്റുള്ള സമയത്ത് ജനലുകളും വാതിലുകളും അടച്ചിടുകയും വൈദ്യുതോപകരണങ്ങളുടെ ബന്ധം വിച്ഛേദിക്കുകയും വേണം. മരച്ചുവട്ടും ജലാശയങ്ങളും ഒഴിവാക്കുക ഇടിമിന്നലുള്ള സമയത്ത് വൃക്ഷങ്ങളുടെ ചുവട്ടിൽ നിൽക്കരുതെന്നും വാഹനങ്ങൾ മരച്ചുവട്ടിൽ പാർക്ക് ചെയ്യരുതെന്നും മുന്നറിയിപ്പ്. കുളിക്കാനും ജലാശയങ്ങളിൽ ഇറങ്ങാനും മത്സ്യബന്ധനത്തിനും ബോട്ടിങ്ങിനും വിലക്കുണ്ട്. മഴമേഘം കണ്ടുതുടങ്ങുമ്പോൾ തന്നെ മത്സ്യത്തൊഴിലാളികൾ കരയിലേക്ക് മടങ്ങണം. യാത്രയും മൊബൈൽ ഉപയോഗവും സൈക്കിൾ, ബൈക്ക്, ട്രാക്ടർ തുടങ്ങിയ വാഹനങ്ങളിലെ യാത്ര ഇടിമിന്നൽ സമയത്ത് ഒഴിവാക്കണം. വാഹനത്തിനകത്ത് തുടരുന്നത് കൂടുതൽ സുരക്ഷിതമാണെന്നും അധികൃതർ വ്യക്തമാക്കി. മൊബൈൽ ഫോൺ ഉപയോഗിക്കുന്നത് അപകടകരമല്ലെങ്കിലും ലാൻഡ്‌ഫോൺ (Telephone) ഉപയോഗം ഒഴിവാക്കണം. വളർത്തുമൃഗങ്ങൾക്കും ജാഗ്രത വളർത്തുമൃഗങ്ങളെ തുറസായ സ്ഥലത്ത് കെട്ടരുത്. കാറ്റിൽ മറിഞ്ഞുവീഴാൻ സാധ്യതയുള്ള വസ്തുക്കൾ സുരക്ഷിതമായി കെട്ടിവയ്ക്കണമെന്നും നിർദേശം നൽകി. ‘ദാമിനി’ ആപ്പ് (Damini App) ഉപയോഗിക്കാം ഇടിമിന്നൽ സാധ്യത മുൻകൂട്ടി അറിയാൻ Damini മൊബൈൽ ആപ്പ് ഉപയോഗിക്കാമെന്ന് അധികൃതർ അറിയിച്ചു.

കാലവർഷം ശക്തിപ്രാപിക്കുന്ന സാഹചര്യത്തിൽ സംസ്ഥാനത്ത് പൊതുജനങ്ങൾക്ക് ജാഗ്രത നിർദേശങ്ങൾ പുറപ്പെടുവിച്ചു. ഉരുൾപൊട്ടൽ, മണ്ണിടിച്ചിൽ, മലവെള്ളപ്പാച്ചിൽ സാധ്യതയുള്ള പ്രദേശങ്ങളിലെയും നദീതീരങ്ങളിലെയും അണക്കെട്ടുകളുടെ താഴ്ന്ന പ്രദേശങ്ങളിലെയും ആളുകൾ അധികൃതരുടെ നിർദേശങ്ങൾ അനുസരിച്ച് സുരക്ഷിത കേന്ദ്രങ്ങളിലേക്ക് മാറി താമസിക്കണമെന്ന് മുന്നറിയിപ്പുണ്ട്. ദുരന്തസാധ്യതാ മേഖലകളിൽ ക്യാമ്പുകൾ ആരംഭിച്ചിട്ടുണ്ടോയെന്ന് ഉറപ്പാക്കുകയും പകൽ സമയത്ത് തന്നെ സുരക്ഷിത കേന്ദ്രങ്ങളിലേക്ക് മാറുകയും വേണമെന്ന് അധികൃതർ അറിയിച്ചു. ഇതിനായി തദ്ദേശ സ്ഥാപനങ്ങളുടെയും റെവന്യൂ വകുപ്പിന്റെയും സഹായം തേടാം. ശക്തമായ കാറ്റിനും മഴയ്ക്കും സാധ്യതയുള്ളതിനാൽ മേൽക്കൂര ബലഹീനമായ വീടുകളിലും സുരക്ഷിതമല്ലാത്ത വീടുകളിലും കഴിയുന്നവർ പ്രത്യേക ജാഗ്രത പാലിക്കണം. മരങ്ങൾ കടപുഴകി വീഴൽ, വൈദ്യുതി പോസ്റ്റുകൾ തകർച്ച എന്നിവ മൂലമുള്ള അപകടങ്ങൾക്കും സാധ്യതയുണ്ടെന്ന് മുന്നറിയിപ്പിൽ പറയുന്നു. മഴ ശക്തമായ സാഹചര്യത്തിൽ നദികൾ മുറിച്ചുകടക്കുകയോ ജലാശയങ്ങളിൽ ഇറങ്ങുകയോ ചെയ്യരുത്. മേൽപ്പാലങ്ങളിൽ കയറി കാഴ്ച കാണൽ, സെൽഫി എടുക്കൽ, കൂട്ടം കൂടി നിൽക്കൽ എന്നിവയും ഒഴിവാക്കണം. അതേസമയം, മഴക്കാലത്ത് അനാവശ്യ യാത്രകളും വിനോദസഞ്ചാരവും ഒഴിവാക്കണമെന്നും അധികൃതർ നിർദേശിച്ചു. വെള്ളച്ചാട്ടങ്ങൾ, മലയോര മേഖലകൾ, ജലാശയങ്ങൾ എന്നിവിടങ്ങളിലേക്കുള്ള യാത്രകൾ മുന്നറിയിപ്പ് പിൻവലിക്കുന്നത് വരെ ഒഴിവാക്കണം. ജലാശയങ്ങൾക്കരികിലെ റോഡുകളിലും അറ്റകുറ്റപ്പണി നടക്കുന്ന റോഡുകളിലും അതീവ ജാഗ്രത പാലിക്കണമെന്നും വെള്ളം കവിഞ്ഞൊഴുകുന്ന ഭാഗങ്ങളിലൂടെ വാഹനമോടിക്കരുതെന്നും മുന്നറിയിപ്പുണ്ട്. അപകടാവസ്ഥയിലുള്ള മരങ്ങൾ, മതിലുകൾ, ബോർഡുകൾ, പോസ്റ്റുകൾ തുടങ്ങിയവ സുരക്ഷിതമാക്കുകയും അപകടസാധ്യതകൾ അധികൃതരുടെ ശ്രദ്ധയിൽപ്പെടുത്തുകയും വേണം. സംസ്ഥാനത്തെ എല്ലാ ജില്ലകളിലും 24 മണിക്കൂറും പ്രവർത്തിക്കുന്ന താലൂക്ക്, ജില്ലാ കൺട്രോൾ റൂമുകൾ സജ്ജമാണെന്നും അടിയന്തര സഹായങ്ങൾക്ക് 1077, 1070 എന്നീ ടോൾ ഫ്രീ നമ്പറുകളിൽ ബന്ധപ്പെടാമെന്നും അധികൃതർ അറിയിച്ചു.

മധ്യ-തെക്കൻ കേരളത്തിൽ ഇന്ന് ശക്തമായ വേനൽമഴയ്ക്ക് സാധ്യതയെന്ന് കാലാവസ്ഥാ വകുപ്പിന്റെ മുന്നറിയിപ്പ്. തിരുവനന്തപുരം, കൊല്ലം, ആലപ്പുഴ, പത്തനംതിട്ട, എറണാകുളം, ഇടുക്കി, കോട്ടയം ജില്ലകളിൽ യെല്ലോ അലർട്ട് പ്രഖ്യാപിച്ചു. ശക്തമായ കാറ്റിനും ഇടിമിന്നലിനും സാധ്യതയുള്ളതിനാൽ ജാഗ്രത പാലിക്കണമെന്നും നിർദേശം. അതേസമയം, തെക്കുപടിഞ്ഞാറൻ കാലവർഷം ഈ മാസം 26ഓടെ കേരള തീരത്തെത്തുമെന്നാണ് വിലയിരുത്തൽ.