എൽനിനോ ഭീഷണി; 34.7 കോടി കുട്ടികൾ അപകടത്തിൽ

വരാൻ പോകുന്നത് ശക്തമായ എൽ നിനോയാണ്. 2026–27 കാലയളവിൽ വരാൻ പോകുന്ന ഈ ശക്തമായ എൽനിനോ (El Niño) പ്രതിഭാസ സാധ്യത കണക്കിലെടുത്ത് മുന്നറിയിപ്പ് നൽകിയിരിക്കുകയാണ് യൂണിസെഫ് (UNICEF). ലോകത്തെ 100ലേറെ രാജ്യങ്ങളിലെ 34.7 കോടിയിലധികം കുട്ടികൾ രൂക്ഷമായ കാലാവസ്ഥാ വ്യതിയാനത്തിന്റെ ഭീഷണി നേരിടേണ്ടിവരുമെന്നാണ് യൂണിസെഫിന്റെ മുന്നറിയിപ്പ്.

കുട്ടികൾ അപകടത്തിൽ

എൽ നിനോ ഇത്രയ്ക്കും രൂക്ഷമാകാൻ കാരണം പസഫിക് സമുദ്രത്തിലെ സമുദ്രോപരിതല താപനില ഉയരുന്നതിനാലാണ്. അതിനാൽ വിവിധ മേഖലകളിൽ കടുത്ത വരൾച്ച, പ്രളയം, ജലക്ഷാമം തുടങ്ങിയ കാലാവസ്ഥാ പ്രതിസന്ധികൾക്കാണ് വരാൻ പോകുന്ന എൽ നിനോ കാരണമാകുന്നത്. അടിയന്തര നടപടികൾ സ്വീകരിച്ചില്ലെങ്കിൽ കുട്ടികളുടെ ആരോഗ്യം, വിദ്യാഭ്യാസം, സുരക്ഷിതത്വം എന്നിവയെ ഇത് ഗുരുതരമായി ബാധിക്കുമെന്ന് യൂണിസെഫ് എക്സിക്യൂട്ടീവ് ഡയറക്ടർ കാതറിൻ റസ്സൽ പറയുന്നു.

Kerala Tourism Faces El Nino : എൽനിനോയും പശ്ചിമേഷ്യൻ സംഘർഷവും കേരള ടൂറിസത്തിന് വെല്ലുവിളിയാകുന്നു
കേരളത്തിലേക്ക് വരാൻ മടിക്കുകയാണ് വിനോദ സഞ്ചാരികൾ. പ്രധാന കാരണം പശ്ചിമേഷ്യൻ സംഘർഷവും എൽനിനോ പ്രതിഭാസവും
https://metbeatnews.com/how-el-nino-and-the-middle-east-conflict-are-threatening-kerala-tourisn

കടുത്ത വരൾച്ചയും ശുദ്ധജലക്ഷാമവും രൂക്ഷമാകാൻ സാധ്യത

എൽ നിനോ ആഘാതം കൂടുതൽ സംഭവിക്കുക ഏഷ്യ-പസഫിക് മേഖലയിലാകും. മേഖലയിലെ മാത്രം ഏകദേശം 19 കോടി കുട്ടികൾക്ക് പ്രതികൂല കാലാവസ്ഥയെ നേരിടേണ്ടിവരുമെന്നാണ് യൂണിസെഫ് പഠനം പറയുന്നത്. കൊളംബിയ, ഫിജി, ഫിലിപ്പീൻസ് തുടങ്ങിയ രാജ്യങ്ങളിൽ കടുത്ത വരൾച്ചയും ശുദ്ധജലക്ഷാമവും രൂക്ഷമാകാൻ സാധ്യതയുണ്ട്.

അതേസമയം, സോമാലിയ ഉൾപ്പെടെയുള്ള ആഫ്രിക്കൻ രാജ്യങ്ങളിലും പ്രളയത്തിന്റെയും ജലജന്യ രോഗങ്ങളുടെയും സാധ്യത വർധിക്കാം. അഫ്ഗാനിസ്ഥാൻ, ചാഡ് തുടങ്ങിയ സംഘർഷബാധിത രാജ്യങ്ങളിൽ കാലാവസ്ഥാ പ്രതിസന്ധി പട്ടിണിയും പോഷകാഹാരക്കുറവും കൂടുതൽ രൂക്ഷമാക്കുമെന്നും യൂണിസെഫ് മുന്നറിയിപ്പ് നൽകുന്നു.

സാമ്പത്തിക പ്രതിസന്ധി

പ്രകൃതിദുരന്തങ്ങൾ മൂലം കുട്ടികളുടെ വിദ്യാഭ്യാസം തടസ്സപ്പെടുന്നതിനൊപ്പം തന്നെ സാമ്പത്തിക പ്രതിസന്ധി, ശൈശവവിവാഹം, ചൂഷണം, നിർബന്ധിത കുടിയേറ്റം തുടങ്ങിയ സാമൂഹിക പ്രശ്നങ്ങൾക്കും വഴിവെച്ചേക്കാം.

El Nino കാരണം ഉണ്ടാകുന്ന കാലാവസ്ഥാ ദുരന്തങ്ങളുടെ ആഘാതത്തിൽ നിന്ന് കുട്ടികളെയും പ്രാദേശിക സമൂഹങ്ങളെയും സംരക്ഷിക്കാൻ ലോകരാഷ്ട്രങ്ങൾ അടിയന്തരമായി നടപടികൾ സ്വീകരിക്കണമെന്നാണ് യൂണിസെഫിന്റെ ആവശ്യം.

English Summary : UNICEF has issued an urgent warning that the upcoming strong El Niño (2026–27) weather pattern threatens over 347 million children across more than 100 countries. Driven by rising Pacific Ocean surface temperatures, the phenomenon is expected to trigger severe droughts, floods, and water scarcity worldwide.