ബംഗാൾ ഉൾക്കടലിൽ ‘അർണബ്’ചുഴലിക്കാറ്റ് ; 28ന് ആന്ധ്രാ തീരം തൊടും, നാളെ മഴ കുറയും

ബംഗാൾ ഉൾക്കടലിൽ രൂപപ്പെട്ട ന്യൂനമർദം ശക്തിപ്രാപിച്ച് ‘അർണബ്’ (Arnab) ചുഴലിക്കാറ്റായി മാറി. ഇന്ന് (ഒക്ടോബർ 26) പുലർച്ചെ 5.30ന് മധ്യ-പടിഞ്ഞാറൻ ബംഗാൾ ഉൾക്കടലിനോട് ചേർന്ന മധ്യ-കിഴക്കൻ മേഖലയിലാണ് ചുഴലിക്കാറ്റ് സ്ഥിതി ചെയ്യുന്നത്. ശക്തിപ്രാപിച്ച് അതിതീവ്ര ചുഴലിക്കാറ്റായി മാറുമെന്നാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്.

ഇന്ന് അർധരാത്രിയോടെ ചുഴലിക്കാറ്റ് തീവ്ര ചുഴലിക്കാറ്റായും ഒക്ടോബർ 27ന് അതിതീവ്ര ചുഴലിക്കാറ്റായും ശക്തിപ്രാപിക്കാനാണ് സാധ്യത. തുടർന്ന് വടക്കുപടിഞ്ഞാറൻ ദിശയിൽ നീങ്ങുന്ന ചുഴലിക്കാറ്റ് ഒക്ടോബർ 28ന് രാവിലെ ആന്ധ്രാപ്രദേശ്–യാനം തീരങ്ങൾക്കിടയിൽ കരതൊടാൻ സാധ്യത. ബാപട്‌ല–വിശാഖപട്ടണം തീരപ്രദേശങ്ങൾക്കിടയിൽ കരതൊടുമ്പോൾ മണിക്കൂറിൽ 115–125 കിലോമീറ്റർ വേഗത്തിലായിരിക്കും കാറ്റ് വീശുക. കാറ്റിന്റെ വേഗം മണിക്കൂറിൽ 140 കിലോമീറ്റർ വരെ ഉയരാനും സാധ്യതയുണ്ട്.

നിലവിൽ ആൻഡമാൻ ദ്വീപുകളിലെ ശ്രീ വിജയപുരത്തുനിന്ന് 590 കിലോമീറ്റർ വടക്കുപടിഞ്ഞാറായും വിശാഖപട്ടണത്തുനിന്ന് 650 കിലോമീറ്റർ കിഴക്ക്-തെക്കുകിഴക്കായുമാണ് ചുഴലിക്കാറ്റിന്റെ സ്ഥാനം.

27 മുതൽ മഴ കുറയും

അതേ സമയം കേരളത്തിൽ ഇന്നും (ഒക്ടോബർ 26) ശക്തമായ മഴയ്ക്ക് സാധ്യതയുണ്ട്. എന്നാൽ ഒക്ടോബർ 27 മുതൽ മഴ ഗണ്യമായി കുറയാനാണ് സാധ്യത. ബംഗാൾ ഉൾക്കടലിലെ ‘അർണബ്’ ചുഴലിക്കാറ്റിനൊപ്പം കേരള തീരത്തോടു ചേർന്നുള്ള ന്യൂനമർദവും മഴയെ സ്വാധീനിക്കുന്നുണ്ട്.

അർണബ് ചുഴലിക്കാറ്റ് ഇന്ന് കേരളത്തിൽ മഴ കുറയും
Cyclone Arnab Set to Form Today; Rainfall to Decrease Across Kerala Starting Tomorrow
https://metbeatnews.com/cyclone-arnab-set-to-form-today-rainfall-to-decrease-across-kerala-starting-tomo

തമിഴ്നാട് തീരത്തും ന്യൂനമർദം

തെക്കൻ തമിഴ്നാട് തീരത്തും സമീപ തെക്കുപടിഞ്ഞാറൻ ബംഗാൾ ഉൾക്കടലിലുമായി മറ്റൊരു ന്യൂനമർദവും നിലനിൽക്കുന്നുണ്ട്. ഇതുമായി ബന്ധപ്പെട്ട ചക്രവാതച്ചുഴി സമുദ്രനിരപ്പിൽനിന്ന് 7.6 കിലോമീറ്റർ ഉയരംവരെ വ്യാപിച്ചിരിക്കുന്നു.

ലക്ഷദ്വീപ് മേഖലയിൽനിന്ന് തെക്കൻ കേരളത്തിലൂടെ കടന്നുപോകുന്ന ന്യൂനമർദവുമായി ബന്ധപ്പെട്ട ന്യൂനമർദപാത്തിയും നിലനിൽക്കുന്നുണ്ട്. ഇത് സമുദ്രനിരപ്പിൽനിന്ന് 3.1 കിലോമീറ്റർ ഉയരംവരെ വ്യാപിച്ചിരിക്കുന്നു.

English Summary : A depression in the Bay of Bengal has intensified into Cyclone 'Arnab'. As of October 26, it is positioned over the central-eastern region adjacent to the central-western Bay of Bengal