സെപ്തംബറിന്റെ ആദ്യ പകുതിയിൽ കേരളത്തിൽ മഴ 93% കുറഞ്ഞു; 20ന് ശേഷം ന്യൂനമർദ്ദ സാധ്യത

ഇത്തവണയും മഴ ചതിച്ചു. സെപ്തംബർ ആദ്യ പകുതിയിൽ കേരളത്തിൽ മഴയിൽ വൻ കുറവ് ആണ് അനുഭവപ്പെട്ടത്. ഈ കാലയളവിൽ സംസ്ഥാനത്ത് ലഭിക്കേണ്ട മഴയുടെ 7 ശതമാനം മാത്രമാണ് ലഭിച്ചത്. അതായത് ഇത്തവണ 93 ശതമാനമാണ് മഴക്കുറവ് എന്ന് കാലാവസ്ഥാ നിരീക്ഷകൻ രാജീവ് എരിക്കുളം പറയുന്നു.

ജില്ലകളിൽ മഴയുടെ ലഭ്യതയിൽ വലിയ വ്യത്യാസമാണ് രേഖപ്പെടുത്തിയത്. ഇടുക്കിയിൽ 33 ശതമാനവും കാസർഗോഡ് 29 ശതമാനവും മഴ ലഭിച്ചു. ആലപ്പുഴ, കോട്ടയം, മലപ്പുറം, പത്തനംതിട്ട, തിരുവനന്തപുരം ജില്ലകളിൽ ഒരുശതമാനം വീതം മാത്രമാണ് മഴ ലഭിച്ചത്.
എറണാകുളം, കൊല്ലം, തൃശൂർ ജില്ലകളിൽ 2 ശതമാനവും പാലക്കാട് 3 ശതമാനവും കോഴിക്കോട് 5 ശതമാനവും വയനാട് 6 ശതമാനവും മഴയാണ് സെപ്തംബർ ആദ്യ പകുതിയിൽ ലഭിച്ചത്.

ഇനിയങ്ങോട്ട് മഴ ലഭിച്ചേക്കാം

അതേസമയം, ഇനിയുള്ള രണ്ടാഴ്ചയിൽ മഴ ലഭിക്കാനുള്ള സാധ്യതയുണ്ട്. നിലവിൽ വരണ്ട അന്തരീക്ഷ സ്ഥിതിയാണെങ്കിലും നേരിയ തോതിൽ മെച്ചപ്പെട്ട മഴ ലഭിക്കുമെന്നാണ് പ്രതീക്ഷ. തുടർച്ചയായ വ്യാപക മഴയ്ക്ക് സാധ്യതയില്ലെങ്കിലും, പ്രത്യേകിച്ച് മലയോര മേഖലകളിൽ ഒറ്റപ്പെട്ട ഇടിമിന്നലോടുകൂടിയ മഴ കൂടുതൽ ലഭിച്ചേക്കും.

Monsoon 2026 : സെപ്റ്റംബർ 19 ഓടെ കാലവർഷം പിൻവാങ്ങും; ഇത്തവണ രണ്ട് ദിവസം വൈകി
രാജ്യത്ത് തെക്കുപടിഞ്ഞാറൻ കാലവർഷം പിൻവാങ്ങാൻ ഒരുങ്ങുന്നു. അതിന് അനുകൂലമായ സാഹചര്യം ഒരുങ്ങി തുടങ്ങി.
https://metbeatnews.com/delay-in-southwest-monsoon-withdrawal-expected-from-sept-19

ന്യൂനമർദ്ദ സാധ്യത

സെപ്തംബർ 20ന് ശേഷം ബംഗാൾ ഉൾക്കടലിൽ ന്യൂനമർദ്ദം രൂപപ്പെടാനുള്ള സൂചനകളും കാലാവസ്ഥാ സാഹചര്യങ്ങളിൽ മാറ്റത്തിന് വഴിയൊരുക്കുന്നുണ്ട്. ന്യൂനമർദ്ദം രൂപപ്പെട്ടാൽ അതിന്റെ സഞ്ചാരപാതയ്ക്കനുസരിച്ചായിരിക്കും തുടർന്നുള്ള മഴയുടെ സാധ്യത. ഏതായാലും സെപ്തംബർ ആദ്യ പകുതിയുമായി താരതമ്യം ചെയ്യുമ്പോൾ രണ്ടാം പകുതിയിൽ സംസ്ഥാനത്തിന്റെ വിവിധ ഭാഗങ്ങളിൽ കൂടുതൽ മഴ ലഭിക്കാൻ സാധ്യതയുണ്ടെന്നാണ് വിലയിരുത്തൽ.

English Summary : Kerala experienced a severe 93% deficit in rainfall during the first half of September, receiving only 7% of its expected precipitation, according to meteorologist Rajeev Erikulam.