പൊള്ളുന്ന ചൂട്, ഇളനീരിന് റെക്കോഡ് വില, തളർന്ന് ബാംഗ്ലൂർ ജനത

വേനൽ ഔദ്യോഗികമായി തുടങ്ങുന്നതിന് മുമ്പേ തന്നെ ബെംഗളൂരുവില്‍ കനത്ത ചൂടാണ് അനുഭവപ്പെടുന്നത്. ഉച്ചസമയങ്ങളിലും രാത്രികളിലും താപനില ഒരുപോലെ ഉയരുന്ന സ്ഥിതിയാണ് ഇപ്പോഴുള്ളത്.
അതുകൊണ്ട് തന്നെ ചൂടിൽ പുറത്തിറങ്ങുമ്പോഴേക്കും ആളുകൾ തളരുകയാണ്. ഇതോടെ ഇളനീർ പോലുള്ള തണുപ്പ് പാനീയങ്ങൾ വിലകൂട്ടി വിപണിയിൽ സജീവമാക്കിയിരിക്കുകയാണ്. ആവശ്യം വർധിച്ചതോടെയാണ് വിലയും കൂടിയത്.

ഇന്ന് ബെംഗളൂരുവില്‍ വലിയ ഇളനീരിന് 60 മുതല്‍ 70 രൂപവരെ കൊടുക്കണം. ഇനി ചെറിയ ഇളനീരുകള്‍ ആണെങ്കിൽ 30 രൂപവരെ ഈടാക്കുന്നു. ചില പ്രദേശങ്ങളില്‍ ചെറിയ ഇളനീരിനു പോലും വില 70 രൂപയ്ക്കടുത്തെത്തിയതായും വ്യാപാരികള്‍ പറയുന്നു.
രാജ്യത്തെ പ്രധാന ഇളനീര്‍ വിപണിയാണ് കര്‍ണാടകയിലെ മാണ്ഡ്യ ജില്ലയിലെ മദ്ദൂര്‍ എപിഎംസി മാര്‍ക്കറ്റ്. ഇവിടെ മൊത്തവില നിലവില്‍ ഏകദേശം 35 രൂപയാണ്. ഇവിടെ നിന്നാണ് ബെംഗളൂരുവിലേക്ക് ഇളനീര്‍ പ്രധാനമായും എത്തുന്നത്. ഏതായാലും വേനലിന് മുമ്പേ ആവശ്യം ഉയര്‍ന്നതോടെ വ്യാപാരികള്‍ക്ക് മികച്ച ലാഭമാണ് ലഭിക്കുന്നത്.

കേരളമടക്കം ഇന്ന് ചൂടിൻ്റെ പിടിയിലാണ്

ദിനംപ്രതിയെന്നോണം അഞ്ച് ലക്ഷത്തോളം ഇളനീര്‍ വിപണിയിലെത്തുന്നുണ്ടെങ്കിലും, ആവശ്യം ഉയർന്നതോടെ വരും ദിവസങ്ങളില്‍ ഇത് ആറുലക്ഷമായി ഉയരുമെന്നാണ് കണക്ക്. മറ്റ് സംസ്ഥാനങ്ങളില്‍നിന്നുള്ള ആവശ്യവും വര്‍ധിച്ചിരിക്കുകയാണ്. കേരളമടക്കം ഇന്ന് ചൂടിൻ്റെ പിടിയിലാണ്. ഡല്‍ഹി, ചണ്ഡീഗഢ്, ഉത്തര്‍പ്രദേശ്, പശ്ചിമ ബംഗാള്‍ തുടങ്ങിയ സംസ്ഥാനങ്ങളിലേക്ക് ഉയര്‍ന്ന നിലവാരമുള്ള ഇളനീര്‍ കയറ്റുമതി ചെയ്യുന്നുണ്ട്. എന്നാൽ രണ്ടാം ഗ്രേഡ് ഇളനീരുകളാണ് പ്രാദേശിക വിപണിയില്‍ കൂടുതലായി വില്‍ക്കപ്പെടുന്നത്.

മൊത്തവില 35 രൂപയായിരിക്കുമ്പോഴും, മറ്റ് സംസ്ഥാനങ്ങളിലെ ആവശ്യം കണക്കിലെടുക്കുമ്പോള്‍ അത് ഉടന്‍ 45 രൂപയിലേക്ക് ഉയര്‍ന്നേക്കാമെന്ന് വ്യാപാരികള്‍ മുന്നറിയിപ്പ് നല്‍കുന്നത്. മൊത്തവിപണിയില്‍ 20 മുതല്‍ 30 രൂപവരെ ലഭിക്കുന്ന രണ്ടാംതരം ഇളനീര്‍ ബെംഗളൂരുവില്‍ 50 മുതല്‍ 60 രൂപയ്ക്കു വരെ വില്‍ക്കുന്നു. ചെറിയ ഇളനീരുകള്‍ക്ക് മൊത്തവില എട്ട് രൂപയാണെങ്കിലും നഗരത്തിലെത്തുമ്പോഴേക്കും 30 രൂപയ്ക്ക് മുകളിലേക്കാണ് വില കുതിക്കുന്നത്. ചെറിയ തേങ്ങയ്ക്കാണ് ഇപ്പോള്‍ വിപണിയില്‍ കൂടുതല്‍ ആവശ്യകതയെന്നും വ്യാപാരികള്‍ പറയുന്നു .

ചൂട് ഇനിയും കൂടും, തളർന്ന് ബാംഗ്ലൂർ ജനത

കാലാവസ്ഥാ നിരീക്ഷകർ പറയുന്നത് വേനൽ ഇനിയും ശക്തമാകുമെന്നും ചൂട് വീണ്ടും കൂടാനിടയുണ്ടെന്നുമാണ്. ഇത്തവണ
ബെംഗളൂരുവില്‍ വേനല്‍ക്കാലം നേരത്തെയെന്നാണ് വിലയിരുത്തൽ. ഓരോ ദിവസവും ഉയരുന്ന താപനില ഇവിടുത്തെ ജനങ്ങൾക്ക് ആരോഗ്യപരമായ പല പ്രശ്‌നങ്ങൾ സൃഷ്ടിക്കുകയാണ്.

English Summary : Bengaluru is witnessing an early and intense onset of summer, with temperatures soaring well before the official season begins. The rising heat, felt both during the day and night, has significantly impacted daily life, leading to a massive surge in the demand for cooling drinks—most notably tender coconut (Elaneer).