ഗൾഫ് നാടുകളിലെ കൊടുംചൂടിന് പിന്നിലെ രഹസ്യം കണ്ടെത്തി ശാസ്‌ത്രജ്ഞർ

അറേബ്യൻ ഗൾഫ് മേഖലയിൽ വേനൽക്കാലത്ത് അനുഭവപ്പെടുന്ന അതിശക്തമായ ചൂടിനും കടൽ താപനില ഉയരുന്നതിനും പിന്നിലെ പ്രധാന കാരണം കണ്ടെത്തിയിരിക്കുകയാണ് യുഎഇയിലെ ശാസ്ത്രജ്ഞർ. എൻവൈയു അബുദാബിയിലെ മുബദല ആക്സസ് സെൻ്ററിലെ ഗവേഷകരാണ് ഈ കണ്ടെത്തലിന് പിന്നിൽ. ഈ പഠനം വഴി സമുദ്രത്തിലെ ഉഷ്‌ണതരംഗങ്ങൾ രണ്ട് മുതൽ മൂന്ന് മാസം മുൻപേ പ്രവചിക്കാൻ സാധിക്കും.

രണ്ട് കാറ്റുകളുടെ മാറ്റം ചൂടിന് കാരണം

ഗവേഷകർ പറയുന്നത് അനുസരിച്ച് രണ്ട് കാറ്റുകളുടെ മാറ്റമാണ് ഒരേസമയം ഗൾഫിൽ ചൂട് വർദ്ധിപ്പിക്കുന്നത്. വടക്കുപടിഞ്ഞാറൻ ദിശയിൽ നിന്നുള്ള ഷമാൽ കാറ്റിൻ്റെ വേഗത കുറയുന്നതും ഇന്ത്യൻ വേനൽക്കാല മൺസൂൺ കാറ്റ് ശക്തിപ്പെടുന്നതുമാണ് ഗൾഫിലെ ചൂട് വർദ്ധിക്കാൻ പ്രധാന കാരണമായി ശാസ്‌ത്രജ്ഞർ പറയുന്നത്.

ഈ രണ്ട് മാറ്റങ്ങളും ഒരേസമയം സംഭവിക്കുമ്പോൾ അന്തരീക്ഷത്തിൽ ഈർപ്പം കൂടുകയും കടൽ ഉപരിതലത്തിലെ ചൂട് പുറത്തേക്ക്
പോകാതെ തങ്ങിനിൽക്കുകയും ചെയ്യുന്നു. ഇതാണ് സമുദ്രത്തിലെ താപനില അസാധാരണമായി ഉയർത്തുന്നത്. സാധാരണയായി തെളിഞ്ഞ ആകാശമുള്ളപ്പോഴാണ് ചൂട് കൂടുകയെങ്കിൽ, ഗൾഫിൽ ഈർപ്പവും മൂടൽമഞ്ഞുമുള്ളപ്പോഴാണ് കടൽ കൂടുതൽ ചൂടാകുന്നതെന്ന് പഠനം തെളിയിക്കുന്നു.

മത്സ്യസമ്പത്ത് കുറയുന്നു

കടൽ ചൂടാകുന്നത് പവിഴപ്പുറ്റുകൾ നശിക്കാനും മത്സ്യസമ്പത്ത് കുറയാനും കാരണമാകുന്നുണ്ട്. പുതിയ കണ്ടെത്തലിലൂടെ ചൂട് കൂടാൻ പോകുന്നത് മുൻകൂട്ടി അറിയാൻ കഴിയുന്നതിനാൽ പവിഴപ്പുറ്റുകളെ സംരക്ഷിക്കാനും മത്സ്യബന്ധന മേഖലയിലെ ആഘാതം കുറയ്ക്കാനും അധികൃതർക്ക് ആവശ്യമായ മുൻകരുതലുകൾ എടുക്കാൻ സമയം ലഭിക്കും. ലോകത്തിന്റെ മറ്റ് ഭാഗങ്ങളിൽ 'എൽ നിനോ' പ്രതിഭാസം ചൂട് കൂട്ടാറുണ്ടെങ്കിലും ഗൾഫ് മേഖലയിൽ 'ലാ നിന'പ്രതിഭാസമാണ് കടുത്ത ഉഷ്ണതരംഗങ്ങൾക്ക് കാരണമാകുന്നതെന്ന് ഗവേഷകർ പറയുന്നു. കാലാവസ്ഥാ വ്യതിയാനം വലിയ വെല്ലുവിളിയാകുന്ന ഈ കാലഘട്ടത്തിൽ, കടൽ വിഭവങ്ങളെയും തീരദേശങ്ങളെയും സംരക്ഷിക്കാൻ ഈ പുതിയ പ്രവചന രീതി വലിയ സഹായമാകുമെന്ന് ഗവേഷകർ ചൂണ്ടികാട്ടുന്നു.

English Summary : Warming oceans are causing coral reefs to die and fish stocks to decline. The new findings will help authorities take the necessary precautions to protect coral reefs and reduce the impact on the fishing industry by predicting future warming.