ദുബായിലേക്ക് ഇനി ഇടയ്ക്കിടെ വിസ എടുക്കേണ്ട; 180 ദിവസം വരെ താമസം

സ്ഥിരമായി ദുബായ് സന്ദർശിക്കുന്നവർക്ക് വലിയ ആശ്വാസമാവുകയാണ് പുതിയ വിസ. അഞ്ച് വർഷത്തെ മൾട്ടിപ്പിൾ എൻട്രി ടൂറിസ്റ്റ് വിസയാണ് സന്ദർശകർക്ക് ആശ്വാസമാവുന്നത്. ഈ വിസയുടെ പ്രത്യേകത എന്തെന്നാൽ പ്രാദേശിക സ്പോൺസറുടെയോ ഹോസ്റ്റിന്റെയോ സഹായമില്ലാതെ സ്വയം സ്പോൺസർ ചെയ്ത് അപേക്ഷിക്ക്കാം എന്നതാണ്.

യോഗ്യതാ മാനദണ്ഡങ്ങൾ പാലിക്കുന്ന എല്ലാ രാജ്യക്കാരായ യാത്രക്കാർക്കും വിസയ്ക്ക് അപേക്ഷിക്കാം. അഞ്ച് വർഷമാണ് വിസയുടെ കാലാവധി. ഈ കാലയളവിൽ നിരവധി തവണ യുഎഇയിൽ പ്രവേശിക്കാനും പുറത്തുപോകാനും സാധിക്കും. ഓരോ സന്ദർശനത്തിലും പരമാവധി 90 ദിവസം വരെ രാജ്യത്ത് നിൽക്കാം. ഇനി 90 ദിവസം കൂടി താമസം നീട്ടാനും അവസരമുണ്ട്. എന്നാൽ ആകെ സമയം 180 ദിവസത്തിൽ കവിയാനും പാടില്ല.

പതിവായി യുഎഇയിലെത്തുന്ന വിനോദസഞ്ചാരികൾ, കുടുംബാംഗങ്ങളെ സന്ദർശിക്കുന്നവർ, സ്ഥിരം യാത്രക്കാർ, ബിസിനസ് ആവശ്യങ്ങൾക്കായി എത്തുന്നവർ എന്നിവർക്ക് ഈ വിസ കൂടുതൽ പ്രയോജനപ്പെടും. General Directorate of Residency and Foreigners Affairs – Dubai (GDRFA Dubai) വഴിയാണ് സ്വയം സ്പോൺസർ ചെയ്യുന്ന ഈ വിസയ്ക്ക് അപേക്ഷിക്കേണ്ടത്.

എന്തൊക്കെ രേഖകൾ വേണം

കുറഞ്ഞത് ആറ് മാസത്തെ കാലാവധി ശേഷിക്കുന്ന സാധുവായ പാസ്‌പോർട്ട്, അടുത്തിടെ എടുത്ത പാസ്പോർട്ട് സൈസ് ഫോട്ടോ, ആരോഗ്യ ഇൻഷുറൻസ്, റൗണ്ട് ട്രിപ്പ് വിമാന ടിക്കറ്റ്, കഴിഞ്ഞ ആറ് മാസത്തെ ബാങ്ക് സ്റ്റേറ്റ്മെന്റ് എന്നിവ നിർബന്ധമാണ്.

അപേക്ഷകന്റെ പേരിലുള്ളതും സാക്ഷ്യപ്പെടുത്തിയതുമായ ബാങ്ക് സ്റ്റേറ്റ്മെന്റിൽ അപേക്ഷയ്ക്ക് മുമ്പുള്ള ആറ് മാസക്കാലയളവിൽ കുറഞ്ഞത് 4,000 യുഎസ് ഡോളർ, അതായത് ഏകദേശം 14,690 ദിർഹം, അല്ലെങ്കിൽ തത്തുല്യമായ തുക അക്കൗണ്ടിൽ ഉണ്ടായിരുന്നുവെന്ന് തെളിയിക്കണം.

യുഎഇയിലെ താമസ കാലയളവിന് സാധുവായ ആരോഗ്യ ഇൻഷുറൻസും ഉണ്ടായിരിക്കണം. അപേക്ഷയിലെ വിവരങ്ങളുടെ അടിസ്ഥാനത്തിൽ അധികൃതർ അധിക രേഖകളോ വിവരങ്ങളോ ആവശ്യപ്പെട്ടേക്കാം.

എത്ര ചിലവാകും?

അപേക്ഷയ്ക്കുള്ള ആകെ ചെലവ് ഏകദേശം 3,713 ദിർഹം വരും. വിസ ഫീസ്, സർവീസ് ചാർജുകൾ, റീഫണ്ട് ചെയ്യാവുന്ന സാമ്പത്തിക ഗ്യാരന്റി എന്നിവ ഇതിൽ ഉൾപ്പെടുന്നു. യുഎഇയ്ക്കുള്ളിൽ നിന്ന് അപേക്ഷിക്കുന്നവർക്ക് വിസ സ്റ്റാറ്റസ് മാറ്റുന്നതിനുള്ള അധിക ഫീസും ബാധകമായേക്കാം. അപേക്ഷകന്റെ സാഹചര്യത്തിനനുസരിച്ച് അന്തിമ തുകയിൽ വ്യത്യാസമുണ്ടാകാം.

എങ്ങനെ അപേക്ഷിക്കാം?

ആദ്യമായി GDRFA ദുബായ് വെബ്സൈറ്റിൽ അക്കൗണ്ട് സൃഷ്ടിക്കണം. ‘Individuals’ തിരഞ്ഞെടുത്ത് ‘Register now’ വഴി പേര്, ഇമെയിൽ, ജനന തീയതി തുടങ്ങിയ വിവരങ്ങൾ നൽകി OTP ഉപയോഗിച്ച് ഇമെയിൽ സ്ഥിരീകരിക്കണം.

തുടർന്ന് GDRFA Smart Services-ൽ ലോഗിൻ ചെയ്ത് ‘New Application’ തിരഞ്ഞെടുക്കണം. ഡ്രോപ്പ്‌ഡൗൺ മെനുവിൽ നിന്ന് ‘New 5 Years Tourism Entry Permit’ തിരഞ്ഞെടുത്ത് അപേക്ഷിക്കാം.

അപേക്ഷാ ഫോമിൽ പാസ്‌പോർട്ട് വിവരങ്ങൾ, വ്യക്തിഗത വിവരങ്ങൾ, ബന്ധപ്പെടാനുള്ള വിവരങ്ങൾ, യാത്രാ വിവരങ്ങൾ എന്നിവ നൽകണം. യാത്രയുടെ ഉദ്ദേശ്യമായി ‘Tourism’ തിരഞ്ഞെടുക്കണം.

അടുത്ത ഘട്ടത്തിൽ പാസ്‌പോർട്ട്, ഫോട്ടോ, ആരോഗ്യ ഇൻഷുറൻസ്, റൗണ്ട് ട്രിപ്പ് ടിക്കറ്റ്, കഴിഞ്ഞ ആറ് മാസത്തെ ബാങ്ക് സ്റ്റേറ്റ്മെന്റ് എന്നിവ അപ്‌ലോഡ് ചെയ്യണം.
തുടർന്ന് ഡെബിറ്റ് കാർഡോ ക്രെഡിറ്റ് കാർഡോ ഉപയോഗിച്ച് ഓൺലൈനായി ഫീസ് അടച്ച് അപേക്ഷ സമർപ്പിക്കാം. അപേക്ഷയുടെ പുരോഗതി പരിശോധിക്കാൻ റഫറൻസ് നമ്പർ ലഭിക്കും.

വിസ അംഗീകരിച്ചാൽ SMS, ഇമെയിൽ എന്നിവ വഴി അറിയിപ്പ് ലഭിക്കും. എൻട്രി പെർമിറ്റിന്റെ ഡിജിറ്റൽ പകർപ്പ് രജിസ്റ്റർ ചെയ്ത ഇമെയിൽ വിലാസത്തിലേക്കും അയയ്ക്കും.

English Summary : Dubai now offers a 5-Year Multiple-Entry Tourist Visa, allowing frequent travelers to visit the UAE multiple times without needing a local sponsor or repeatedly applying for new visas.