ഇന്ന് ആകാശത്ത് ശനിയെ കാണാം; വൈകീട്ട് 6 മണിയോടെ ശനി ഉദിക്കും

ഇന്ന് (ഒക്ടോബർ 6) രാത്രി ആകാശത്ത് ശനി ഗ്രഹത്തെ(Saturn) വ്യക്തമായി കാണാം. അടുത്തിടെ പ്രതിയോഗാവസ്ഥയിലെത്തിയ ശനി ഇപ്പോൾ ഭൂമിയിൽ നിന്ന് നിരീക്ഷിക്കാൻ ഏറ്റവും അനുയോജ്യമായ ഘട്ടത്തിലാണ്. ഒക്ടോബർ 4-നായിരുന്നു ശനി പ്രതിയോഗാവസ്ഥയിലെത്തിയത്. ഈ സമയത്ത് സൂര്യന് എതിർദിശയിൽ കാണപ്പെടുന്നതിനാൽ ശനി രാത്രിയുടെ ഭൂരിഭാഗം സമയവും ആകാശത്ത് ദൃശ്യമാകും.

കേരളത്തിൽ ഇന്ന് വൈകിട്ട് ആറുമണിയോടെ ശനി ഉദിക്കും. തുടർന്ന് രാത്രി മുഴുവൻ ആകാശത്ത് തുടരുന്ന ശനി പുലർച്ചെ ആറുമണിയോടെയാണ് അസ്തമിക്കുക. അർധരാത്രിയോടെ ശനി ആകാശത്ത് ഏറ്റവും ഉയർന്ന നിലയിലെത്തും.

നഗ്നനേത്രങ്ങൾകൊണ്ടും ശനിയെ തിരിച്ചറിയാനാകും. നക്ഷത്രങ്ങളെപ്പോലെ മിന്നിത്തിളങ്ങാതെ സ്ഥിരമായ പ്രകാശബിന്ദുവായാണ് ശനി കാണപ്പെടുക. എന്നാൽ ശനിയുടെ വളയങ്ങൾ വ്യക്തമായി കാണാൻ ടെലിസ്കോപ്പ് ആവശ്യമാണ്.

ഗ്രഹ നിരീക്ഷകർക്ക് അദ്ഭുത കാഴ്ച്ച

ആകാശം തെളിഞ്ഞതും വെളിച്ചമലിനീകരണം കുറഞ്ഞതുമായ സ്ഥലങ്ങളിൽ നിന്ന് ശനിയെ നിരീക്ഷിക്കുന്നത് കൂടുതൽ എളുപ്പമായിരിക്കും. ഒക്ടോബർ മാസത്തിൽ ശനി രാത്രിയാകാശത്തിലെ പ്രധാന ആകർഷണങ്ങളിലൊന്നായിരിക്കുമെന്ന് ജ്യോതിശാസ്ത്ര നിരീക്ഷകർ ചൂണ്ടിക്കാട്ടുന്നു.

English Summary : Saturn is at its prime viewing stage tonight, October 6, having recently reached opposition. Rising around 6 PM in Kerala, the ringed planet will be visible all night long until dawn. Learn how to spot Saturn with the naked eye and what you need to see its iconic rings clearly.