കുളിരും കോടമഞ്ഞും നിറഞ്ഞ ആ പഴയ വയനാട് എവിടെ ? വയനാട് ചൂടിലേക്ക് വഴിമാറുന്നു, കാലാവസ്ഥാ വ്യതിയാനം

വയനാട് ഇന്ന് ആ പഴു വയനാടല്ല. മഞ്ഞുമൂടിയ പ്രഭാതങ്ങളും കോടമഞ്ഞും തണുത്ത് വിറയ്ക്കുന്ന രാത്രികളും പച്ചപ്പും മലനിരകളും, ഓർക്കുമ്പോൾ തന്നെ വയനാട്ടിലെത്താൻ കൊതിയാവുന്നു. പക്ഷേ എന്തുകാര്യം, വയനാടിന്റെ പ്രകൃതിഭംഗിയെ വേറിട്ടുനിർത്തിയിരുന്ന കാലാവസ്ഥാ സവിശേഷതകൾ എങ്ങോ പോയ് മറഞ്ഞിരിക്കുന്നു.

തണുപ്പിന്റെ പേരിൽ സഞ്ചാരികളെ ആകർഷിച്ചിരുന്ന വയനാട് ക്രമേണ ചൂടിലേക്ക് നീങ്ങുന്നതായാണ് പുതിയ പഠന റിപ്പോർട്ട്. ഇതോടെ വയനാടിൻ്റെ ഭാഗി ആസ്വദിക്കാനെത്തുന്നവർ നിരാശയോടെയാണ് മടക്കം. ഉയരുന്ന താപനിലയും ക്രമംതെറ്റുന്ന മഴയും മണ്ണിലെ ഈർപ്പക്കുറവും ജില്ലയുടെ കാർഷിക മേഖലയ്ക്കും പരിസ്ഥിതിക്കും വിനോദസഞ്ചാരത്തിനും ഒരുപോലെ ഭീഷണിയാകുകയാണ്.

Water Crisis in Mawsynram and Cherrapunji : മഴയുടെ സ്വന്തം നാട്ടിലും ജലക്ഷാമം; എൽ നിനോ ചിറാപുഞ്ചിയെയും വെറുതെ വിട്ടില്ല
ലോകത്തിലെ ഏറ്റവും കൂടുതൽ മഴ ലഭിക്കുന്ന പ്രദേശങ്ങളാണ് മേഘാലയയിലെ ചിറാപുഞ്ചിയും മൗസിൻറാമും.
https://metbeatnews.com/mawsynram-cherrapunji-face-unprecedented-water-shortage-amid-global-weather-shif

2018, 2019 വർഷങ്ങളിലെ പ്രളയങ്ങൾക്ക് പിന്നാലെ കൽപ്പറ്റ ആസ്ഥാനമായി പ്രവർത്തിക്കുന്ന ഹ്യൂം സെന്റർ ഫോർ ഇക്കോളജി ആൻഡ് വൈൽഡ്‌ലൈഫ് ബയോളജി ആരംഭിച്ച ജനകീയ കാലാവസ്ഥാ നിരീക്ഷണ ശൃംഖലയാണ് വയനാട് നേരിടുന്ന മാറ്റങ്ങൾ രേഖപ്പെടുത്തിയത്. 2024 മുതൽ ജില്ലയുടെ വിവിധ ഭാഗങ്ങളിലെ 200-ലധികം കേന്ദ്രങ്ങളിൽ മഴമാപിനികളും തെർമോമീറ്ററുകളും സ്ഥാപിച്ച് ദിവസേന മഴയുടെയും താപനിലയുടെയും കണക്കുകൾ ശേഖരിച്ചുവരികയാണ്.

സെപ്റ്റംബറിലും കടുത്ത ചൂട്

തണുത്ത കാലാവസ്ഥയ്ക്ക് പേരുകേട്ട വയനാട്ടിൽ താപനില ഉയരുന്നതിന്റെ സൂചനകളാണ് നിരീക്ഷണ വിവരങ്ങളിലുള്ളത്. 2026 സെപ്റ്റംബർ ഒന്ന് മുതൽ 17 വരെ ജില്ലയിലെ ശരാശരി താപനില 29.2 ഡിഗ്രി സെൽഷ്യസായി. 2023, 2024, 2025 വർഷങ്ങളിലെ സെപ്റ്റംബർ മാസത്തെ ശരാശരി താപനില യഥാക്രമം 27.3, 27.2, 27.3 ഡിഗ്രി സെൽഷ്യസായിരുന്നു. ഇതുമായി താരതമ്യം ചെയ്യുമ്പോൾ ഇത്തവണ 1.9 ഡിഗ്രി സെൽഷ്യസിന്റെ വർധനവാണ് രേഖപ്പെടുത്തിയിരിക്കുന്നത്.

സെപ്റ്റംബർ 11 മുതൽ 17 വരെ തുടർച്ചയായ ഏഴ് ദിവസങ്ങളിലും ഉയർന്ന താപനില 30 ഡിഗ്രി സെൽഷ്യസിന് മുകളിലായിരുന്നു. സെപ്റ്റംബർ 15-ന് താപനില 30.7 ഡിഗ്രി സെൽഷ്യസിലെത്തി. ഈ വർഷം ജില്ലയിൽ രേഖപ്പെടുത്തിയ ഏറ്റവും ഉയർന്ന താപനില ഏപ്രിൽ 18-ലെ 34.4 ഡിഗ്രി സെൽഷ്യസാണ്.

മണ്ണിന്റെ താപനില 39 ഡിഗ്രി സെൽഷ്യസ്

മണ്ണിലെ ചൂടും ആശങ്ക വർധിപ്പിക്കുന്നു. സെപ്റ്റംബറിലെ ആദ്യ 17 ദിവസങ്ങളിൽ തുറസ്സായ സ്ഥലങ്ങളിലെ മണ്ണിന്റെ താപനില 39 ഡിഗ്രി സെൽഷ്യസ് വരെ ഉയർന്നു. പല ദിവസങ്ങളിലും ഇത് 30 ഡിഗ്രിക്ക് മുകളിലായിരുന്നു. സെപ്റ്റംബർ ആദ്യ പകുതിയിൽ ലഭിച്ച ഒറ്റപ്പെട്ട മഴയുടെ അളവും കുറവായിരുന്നു. അതേസമയം, കുറഞ്ഞ ശരാശരി താപനില 20.9 ഡിഗ്രി സെൽഷ്യസായി രേഖപ്പെടുത്തി.

കർഷകർ പ്രതിസന്ധിയിൽ

താപനില ഉയരുന്നതു മാത്രമല്ല, മഴയുടെ സമയത്തിലും വിതരണത്തിലുമുണ്ടാകുന്ന വ്യതിയാനങ്ങളാണ് വയനാടിനെ കൂടുതൽ പ്രതിസന്ധിയിലാക്കുന്നത്. കാപ്പി, കുരുമുളക്, കവുങ്ങ്, നെല്ല് തുടങ്ങിയ വിളകളുടെ വളർച്ചയ്ക്ക് അനുയോജ്യമായ മഴയും താപനിലയും മണ്ണിലെ ഈർപ്പവും നിർണായകമാണ്. ഈ ഘടകങ്ങളുടെ സന്തുലിതാവസ്ഥ തകരുന്നത് വിളവിനെ പ്രതികൂലമായി ബാധിക്കുമെന്ന ആശങ്ക ശക്തമാണ്.

കാപ്പിച്ചെടികളുടെ പൂവിടലിനും കായ്ഫലത്തിനും കൃത്യമായ സമയത്ത് മഴ ലഭിക്കണം. കുരുമുളക് വള്ളികൾക്ക് ദീർഘകാല ഈർപ്പക്കുറവും അതിതീവ്ര മഴയും വെല്ലുവിളിയാണ്. നെൽകൃഷിയാകട്ടെ കൃത്യമായ സമയത്തെ ജലലഭ്യതയെ ആശ്രയിച്ചാണ് നിലനിൽക്കുന്നത്. മഴയുടെ ക്രമം തെറ്റുമ്പോൾ ഒരേ കൃഷിക്കാലത്ത് വരൾച്ചയും വെള്ളക്കെട്ടും നേരിടേണ്ട സാഹചര്യം കർഷകർക്ക് ഉണ്ടാകുന്നു.

ഭൂഗർഭജലനിരപ്പ് താഴുന്നതോടെ ജലലഭ്യത കുറയാനുള്ള സാധ്യതയുമുണ്ട്. നെൽകൃഷിയുൾപ്പെടെയുള്ള വിളകളെ ഇത് ഗുരുതരമായി ബാധിക്കാൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകുന്നു.

കാലം തെറ്റി പൂത്ത കാപ്പിച്ചെടികൾ

സാധാരണയായി ഡിസംബർ മുതൽ ഫെബ്രുവരി വരെയുള്ള മാസങ്ങളിൽ പൂക്കുന്ന കാപ്പിച്ചെടികൾ കഴിഞ്ഞ സെപ്റ്റംബറിൽ തന്നെ പൂത്തതും ശ്രദ്ധേയമാണ്. കാലാവസ്ഥയിലെ വ്യതിയാനങ്ങൾ പൂക്കാലത്തെ സ്വാധീനിക്കുന്നുണ്ടോയെന്നത് വിശദമായ പഠനത്തിലൂടെ വ്യക്തമാക്കേണ്ടതുണ്ട്. ശക്തമായ എൽ നിനോ പ്രതിഭാസത്തിന്റെ പശ്ചാത്തലത്തിൽ ഇത്തരം മാറ്റങ്ങൾ നിരീക്ഷിക്കുന്നത് അപൂർവമാണെന്നും അധികൃതർ ചൂണ്ടിക്കാട്ടുന്നു.

ആഗോളതാപനം കാപ്പി ഉൽപ്പാദനത്തിനും ഭീഷണി

വയനാട്ടിലെ കാപ്പി കൃഷി കാലാവസ്ഥാ വ്യതിയാനത്തെ തുടർന്ന് നേരിടുന്ന പ്രതിസന്ധികൾ മുൻപും പഠനവിധേയമായിട്ടുണ്ട്. 1991 മുതൽ 2022 വരെയുള്ള വിവരങ്ങൾ വിശകലനം ചെയ്ത് വൈത്തിരി, അമ്പലവയൽ, നൂൽപ്പുഴ എന്നിവിടങ്ങളിലെ 120 കാപ്പി കർഷക കുടുംബങ്ങളെ കേന്ദ്രീകരിച്ചു നടത്തിയ പഠനത്തിൽ താപനിലയിലെയും മഴയിലെയും വ്യതിയാനങ്ങൾ കൃഷിയെ പ്രതികൂലമായി ബാധിക്കുന്നതായി കണ്ടെത്തിയിരുന്നു. ഇതിൽ വൈത്തിരി മേഖലയിലാണ് കൂടുതൽ ആഘാതം രേഖപ്പെടുത്തിയത്.

വയനാട്ടിലെയും സമീപ പ്രദേശങ്ങളിലെയും 314 റോബസ്റ്റ കാപ്പിത്തോട്ടങ്ങളെ കേന്ദ്രീകരിച്ചുള്ള മറ്റൊരു പഠനവും മഴയുടെ ക്രമത്തിലുണ്ടാകുന്ന മാറ്റങ്ങൾ ഉൽപ്പാദനക്ഷമതയെ ബാധിക്കുന്ന പ്രധാന ഘടകമാണെന്ന് വ്യക്തമാക്കുന്നു. ആഗോളതാപനിലയിൽ രണ്ട് ഡിഗ്രി സെൽഷ്യസിന്റെ വർധനവുണ്ടായാൽ വയനാട്ടിലെ റോബസ്റ്റ കാപ്പി ഉൽപ്പാദനത്തിൽ ശരാശരി 12 ശതമാനത്തോളം ഇടിവുണ്ടാകാമെന്നും പഠനങ്ങൾ പ്രവചിക്കുന്നു.

ടൂറിസത്തിന് തിരിച്ചടി

തണുത്ത കാലാവസ്ഥ തേടിയെത്തുന്ന സഞ്ചാരികളാണ് വയനാടിന്റെ വിനോദസഞ്ചാര മേഖലയ്ക്ക് കരുത്തുപകരുന്ന പ്രധാന ഘടകങ്ങളിലൊന്ന്. മഞ്ഞുമൂടിയ പ്രഭാതങ്ങളും തണുപ്പുള്ള സന്ധ്യകളും വനങ്ങളും മലനിരകളുമെല്ലാം വയനാടിന്റെ ടൂറിസം വിപണനത്തിന്റെ ഭാഗമാണ്. എന്നാൽ ഉയരുന്ന താപനിലയും മാറുന്ന കാലാവസ്ഥയും ഈ സവിശേഷതകൾക്ക് മങ്ങലേൽപ്പിക്കുമെന്ന ആശങ്ക ഉയരുന്നു.

റിസോർട്ടുകൾ, പ്ലാന്റേഷൻ സ്റ്റേകൾ, വന്യജീവി വിനോദസഞ്ചാരം എന്നിവയെല്ലാം പ്രകൃതിയുടെ തണുപ്പും പച്ചപ്പും മുൻനിർത്തിയാണ് സഞ്ചാരികളെ ആകർഷിക്കുന്നത്. കാലാവസ്ഥാ വ്യതിയാനം തുടർന്നാൽ ഈ മേഖലയെയും അതിന്റെ പ്രത്യാഘാതങ്ങൾ ബാധിച്ചേക്കാം.

ഉരുൾപൊട്ടൽ ഭീതി

വയനാട് നേരിടുന്ന കാലാവസ്ഥാ വെല്ലുവിളി ചൂടിൽ മാത്രം ഒതുങ്ങുന്നതല്ല. ദൈർഘ്യമേറിയ വരണ്ട കാലയളവുകൾക്കു പിന്നാലെ അതിതീവ്ര മഴ ലഭിക്കുന്ന സാഹചര്യം കൂടുതൽ ആശങ്കയുണ്ടാക്കുന്നു. 2024-ലെ മുണ്ടക്കൈ–ചൂരൽമല ഉരുൾപൊട്ടലിന് കാരണമായ അതിതീവ്ര മഴയിൽ ആഗോളതാപനത്തിന്റെ സ്വാധീനമുണ്ടായിരുന്നുവെന്ന് ചില പഠനങ്ങൾ ചൂണ്ടിക്കാട്ടിയിട്ടുണ്ട്. മഴയുടെ തീവ്രതയിൽ ഏകദേശം 10.8 ശതമാനം വർധനവുണ്ടായെന്നാണ് പഠനത്തിലെ വിലയിരുത്തൽ.

Wayanad landslide Mundakkai

ആരോഗ്യപ്രശ്‌നങ്ങളും വർധിക്കുന്നു

രാത്രിയിൽ 20 ഡിഗ്രി സെൽഷ്യസിനടുത്തേക്ക് താഴുന്ന താപനില പകൽ 30 ഡിഗ്രിക്ക് മുകളിൽ ഉയരുന്നത് ശരീരത്തിന് അധിക സമ്മർദമുണ്ടാക്കാം. നിർജലീകരണം ഉൾപ്പെടെയുള്ള ആരോഗ്യപ്രശ്നങ്ങളുടെ സാധ്യതയും വർധിക്കാം. തോട്ടം തൊഴിലാളികൾ, നിർമാണ തൊഴിലാളികൾ, വനപാലകർ, പ്രായമായവർ, കുട്ടികൾ തുടങ്ങിയവർക്ക് ഇത്തരം സാഹചര്യങ്ങൾ കൂടുതൽ വെല്ലുവിളിയാകാം.

വളർത്തുമൃഗങ്ങളുടെ ഉൽപ്പാദനക്ഷമതയെയും വന്യജീവികളുടെ സഞ്ചാരത്തെയും സസ്യങ്ങളുടെ പൂക്കലിനെയും കായ്ഫലത്തെയും കാലാവസ്ഥാ വ്യതിയാനം ബാധിക്കാനുള്ള സാധ്യതയുമുണ്ട്. ഇതുവഴി പരിസ്ഥിതിയിലെ വിവിധ ജീവിവർഗങ്ങൾ തമ്മിലുള്ള സ്വാഭാവിക ബന്ധങ്ങളിലും മാറ്റങ്ങളുണ്ടാകാം. പാലുൽപാദനത്തിലും മുട്ടഉൽപാദനത്തിലെല്ലാം കാലാവസ്ഥ വില്ലനാകാം.

പച്ചപ്പ് കുറയുന്നതും ആശങ്ക കൂട്ടുന്നു

സാറ്റലൈറ്റ് ദൃശ്യങ്ങളുടെ വിശകലനത്തിൽ വയനാട്ടിൽ നെൽവയലുകളും കാർഷിക ഭൂമിയും കുറയുകയും കെട്ടിടങ്ങളും കോൺക്രീറ്റ് നിർമിതികളും വർധിക്കുകയും ചെയ്യുന്നതായി റിപ്പോർട്ട് ചൂണ്ടിക്കാട്ടുന്നു. മരങ്ങളും പച്ചപ്പും അന്തരീക്ഷത്തെ തണുപ്പിക്കാൻ സഹായിക്കുമ്പോൾ, വനങ്ങളും മണ്ണും വെട്ടിത്തെളിച്ചുള്ള നിർമാണങ്ങൾ പ്രാദേശിക താപനില ഉയരുന്നതിന് കാരണമാകാം.

നീലഗിരി ബയോസ്ഫിയർ റിസർവിന്റെയും പശ്ചിമഘട്ട ആവാസവ്യവസ്ഥയുടെയും പ്രധാന ഭാഗമായ വയനാട് ജൈവവൈവിധ്യത്താലും ജലസമ്പത്തിനാലും നിർണായകമാണ്. കേരളത്തിൽനിന്ന് കിഴക്കോട്ട് ഒഴുകുന്ന നദികളിലൊന്നായ കബനിയുടെ ഉത്ഭവമേഖല കൂടിയാണിത്. അതിനാൽ താപനിലയിലും മഴയിലും ഉണ്ടാകുന്ന ദീർഘകാല മാറ്റങ്ങൾ കൃഷിയെയും വനങ്ങളെയും ജലസ്രോതസ്സുകളെയും ഒരുപോലെ ബാധിക്കാം.

ഹ്യൂം വെതർ നെറ്റ്‌വർക്ക്

പ്രാദേശിക മഴയുടെയും താപനിലയുടെയും വ്യതിയാനങ്ങൾ സൂക്ഷ്മമായി രേഖപ്പെടുത്തുന്നതിൽ ഹ്യൂം വെതർ നെറ്റ്‌വർക്ക് (Hume Weather Network) പ്രധാന പങ്കുവഹിക്കുന്നുണ്ട്. ഈ വിവരങ്ങൾ മണ്ണിലെ ഈർപ്പം, ഭൂഗർഭജലനിരപ്പ്, പുഴകളിലെ ജലലഭ്യത, വിളകളുടെ വളർച്ച, മനുഷ്യരുടെ ആരോഗ്യം എന്നിവയുമായി ബന്ധപ്പെടുത്തി കൂടുതൽ പഠിക്കേണ്ടതുണ്ടെന്നും റിപ്പോർട്ട് വ്യക്തമാക്കുന്നു.

അതേസമയം സെപ്റ്റംബറിലെ കണക്കുകൾ മാത്രം അടിസ്ഥാനമാക്കി വയനാടിന്റെ കാലാവസ്ഥ പൂർണമായും മാറിയെന്ന് ഉറപ്പിച്ചു പറയാനാകില്ല. എന്നാൽ താപനിലയിലെ വർധനവും മഴയുടെ ക്രമക്കേടുകളും മണ്ണിലെ ചൂടും ഈർപ്പക്കുറവും ഒരുമിച്ച് പ്രകടമാകുന്നത് ഗൗരവമായി കാണേണ്ടതാണ്. തണുപ്പിന്റെ നാടെന്ന വയനാടിന്റെ പ്രകൃതിസവിശേഷതകൾ നിലനിർത്താനും കൃഷിയെയും ജലസ്രോതസ്സുകളെയും സംരക്ഷിക്കാനും കാലാവസ്ഥാ നിരീക്ഷണവും പരിസ്ഥിതി സംരക്ഷണ നടപടികളും കൂടുതൽ ശക്തമാക്കണമെന്ന മുന്നറിയിപ്പാണ് ഈ കണ്ടെത്തലുകൾ നൽകുന്നത്.

English Summary : Wayanad, long celebrated for its chilly mornings, dense fog, and lush green hills, is experiencing an unprecedented climatic shift toward rising temperatures. According to data collected by the Hume Centre for Ecology and Wildlife Biology, the high-range district in Kerala is losing its signature cool weather due to global warming, deforestation, and changing land-use patterns