ഉത്തർപ്രദേശിൽ കനത്തമഴയെ തുടർന്ന് ഹൈവേയിൽ വെള്ളക്കെട്ട്; വലയും ചൂണ്ടയുമായി പ്രദേശവാസികൾ, ദൃശ്യങ്ങൾ വൈറൽ

ഉത്തർപ്രദേശിലെ ഉന്നാവോയിലെ ഗംഗാ എക്‌സ്പ്രസ്‌വേയുടെ ഇന്റർചേഞ്ചിൽ വ്യത്യസ്ത കാഴ്ചയാണ് കഴിഞ്ഞ ദിവസം കണ്ടത്. കനത്ത മഴയ്ക്ക് പിന്നാലെ എക്‌സ്പ്രസ്‌വേയുടെ ഇന്റർചേഞ്ചിൽ വ്യാപകമായി വെള്ളക്കെട്ട് രൂപപ്പെട്ടതോടെ പ്രദേശവാസികൾ വലയും ചൂണ്ടയുമായി എത്തി. വെള്ളക്കെട്ടിൽ മീൻ ലഭിക്കുമെന്ന പ്രതീക്ഷയിലാണ് പ്രദേശവാസികൾ ഇവിടെ മീൻപിടിക്കാനിറങ്ങിയത്.

A man while fishing on the Ganga expressway got lucky. A massive stretch of the highway in UP's Unnao has now turned into a pond. https://t.co/OrU4OR9jGK pic.twitter.com/eC2fuc4nJ9
— Piyush Rai (@Benarasiyaa) September 27, 2026

അതിവേഗം വാഹനങ്ങൾ കടന്നുപോകുന്ന എക്‌സ്പ്രസ്‌വേയുടെ ഭാഗം മീൻപിടിത്ത കേന്ദ്രമായി മാറിയതിന്റെ ദൃശ്യങ്ങൾ ഇപ്പോൾ സാമൂഹികമാധ്യമങ്ങളിൽ വൈറലാവുകയാണ്.

കനത്ത മഴയിൽ വ്യാപക നാശനഷ്ട്ടം

ഉത്തർപ്രദേശ്, ഒഡിഷ, സിക്കിം, ആന്ധ്രപ്രദേശ്, ഛത്തീസ്ഗഢ് എന്നിവിടങ്ങളിൽ കനത്ത മഴയിൽ വ്യാപക നാശനഷ്ടങ്ങൾ റിപ്പോർട്ട് ചെയ്തിട്ടുണ്ട്. ഉത്തർപ്രദേശിൽ മൂന്ന് ദിവസമായി തുടരുന്ന മഴയിലും കൊടുങ്കാറ്റിലും 56 പേർ മരിക്കുകയും 46 പേർക്ക് പരിക്കേൽക്കുകയും ചെയ്തതായാണ് റിപ്പോർട്ട്.

അതേസമയം ഉത്തരാഖണ്ഡിൽ കനത്ത മഴയ്ക്കും മണ്ണിടിച്ചിലിനും പിന്നാലെ മലയാളികൾ ഉൾപ്പെടെയുള്ള തീർത്ഥാടകർ വഴിയിൽ കുടുങ്ങി. കേദാർനാഥിൽ നിന്ന് ഗൗരികുണ്ഡിലേക്ക് മടങ്ങുകയായിരുന്ന തീർത്ഥാടക സംഘമാണ് ഭീംബാലിയിൽ കുടുങ്ങിയത്. റോഡിൽ മണ്ണും കല്ലും വീണ് ഗതാഗതം തടസപ്പെട്ടതോടെ പൊലീസ് യാത്ര തടയുകയായിരുന്നു.

രാവിലെ പൊലീസ് നിർദേശപ്രകാരമാണ് തീർത്ഥാടകർ കേദാർനാഥിൽ നിന്ന് യാത്ര തിരിച്ചത്. എന്നാൽ പാതിവഴിയിലെത്തിയതോടെ സുരക്ഷ മുൻനിർത്തി യാത്ര നിർത്തിവയ്ക്കുകയായിരുന്നു.

English Summary : Heavy monsoon downpours across Uttar Pradesh, India, have turned the Ganga Expressway interchange into an unexpected fishing spot, with locals caught on camera using nets and rods in floodwaters.