യുഎഇയിൽ മൂടൽമഞ്ഞ് മുന്നറിയിപ്പ്; കിഴക്കൻ മേഖലയിൽ മഴയ്ക്ക് സാധ്യത

യുഎഇയിൽ ഇന്ന് പൊതുവേ തെളിഞ്ഞ കാലാവസ്ഥയായിരിക്കുമെങ്കിലും കിഴക്കൻ മേഖലകളിൽ മഴ മേഘങ്ങൾ രൂപപ്പെട്ട് ഉച്ചയോടെ ഇവിടെ മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം ( National Center of Meteorology (NCM) അറിയിച്ചു.

അബുദാബി, ദുബായ്, ഷാർജ എന്നിവിടങ്ങളിൽ പരമാവധി താപനില 38 ഡിഗ്രി സെൽഷ്യസ് വരെ ഉയരും. കുറഞ്ഞ താപനില യഥാക്രമം 30, 29, 29 ഡിഗ്രി സെൽഷ്യസായിരിക്കും.

അതിനിടെ, യുഎഇയിൽ മൂടൽമഞ്ഞിനെ (Fog) തുടർന്ന് റെഡ്, യെല്ലോ അലർട്ടുകൾ പ്രഖ്യാപിച്ചു. മൂടൽമഞ്ഞ് രൂപപ്പെടുകയും കാഴ്ചപരിധി കുറയുകയും ചില സമയങ്ങളിൽ ദൃശ്യപരത കൂടുതൽ താഴാൻ സാധ്യതയുള്ളതിനാൽ വാഹനയാത്രക്കാർ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി.

രാത്രിയിലും ബുധനാഴ്ച രാവിലെയും തീരപ്രദേശങ്ങളിലും ഉൾപ്രദേശങ്ങളിലെ ചില മേഖലകളിലും അന്തരീക്ഷത്തിൽ ഈർപ്പം കൂടും. മൂടൽമഞ്ഞിനും നേരിയ മഞ്ഞിനും (Mist) സാധ്യതയുണ്ട്.

വടക്കുപടിഞ്ഞാറൻ ദിശയിൽ നിന്ന് തെക്കുകിഴക്കൻ ദിശയിലേക്ക് നേരിയതോ മിതമായതോ ആയ കാറ്റ് വീശും. അറേബ്യൻ ഗൾഫിലും ഒമാൻ കടലിലും കടൽ പൊതുവേ ശാന്തമായിരിക്കുമെന്നും NCM അറിയിച്ചു.

English Summary : The National Center of Meteorology (NCM) has issued red and yellow fog alerts across parts of the UAE, warning motorists of sharply reduced visibility. While major cities like Abu Dhabi, Dubai, and Sharjah experience clear skies with temperatures reaching up to 38°C, eastern regions face potential afternoon rainfall. Authorities urge drivers to exercise caution as high humidity brings overnight mist and fog.