കേരളത്തിൽ അതിതീവ്ര മഴയ്ക്ക് സാധ്യത; നാളെ അഞ്ച് ജില്ലകളിൽ റെഡ് അലർട്ട്

കേരളത്തിൽ അതിതീവ്ര മഴയ്ക്ക് സാധ്യതയുള്ളതിനാൽ അഞ്ച് ജില്ലകളിൽ വിവിധ ദിവസങ്ങളിലായി റെഡ് അലർട്ട് പ്രഖ്യാപിച്ച് കേന്ദ്ര കാലാവസ്ഥ വകുപ്പ്. ഒക്ടോബർ 25ന് മലപ്പുറം, കോഴിക്കോട്, വയനാട് ജില്ലകളിലും 26ന് ഇടുക്കി, പാലക്കാട് ജില്ലകളിലുമാണ് റെഡ് അലർട്ട്.

ഒക്ടോബർ 24ന് തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ ഓറഞ്ച് അലർട്ടും തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിൽ മഞ്ഞ അലർട്ടും പ്രഖ്യാപിച്ചിട്ടുണ്ട്.

ഒക്ടോബർ 25ന് പത്തനംതിട്ട, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, കണ്ണൂർ ജില്ലകളിൽ ഓറഞ്ച് അലർട്ടും തിരുവനന്തപുരം, കൊല്ലം, ആലപ്പുഴ, കാസർകോട് ജില്ലകളിൽ മഞ്ഞ അലർട്ടുമാണ്.

ഒക്ടോബർ 26ന് പത്തനംതിട്ട, കോട്ടയം, എറണാകുളം, തൃശ്ശൂർ, മലപ്പുറം ജില്ലകളിൽ ഓറഞ്ച് അലർട്ടും തിരുവനന്തപുരം, കൊല്ലം, ആലപ്പുഴ, കോഴിക്കോട്, വയനാട് ജില്ലകളിൽ മഞ്ഞ അലർട്ടും പ്രഖ്യാപിച്ചു. ഒക്ടോബർ 27ന് പത്തനംതിട്ട, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം ജില്ലകളിലും മഞ്ഞ അലർട്ടുണ്ട്.

Kerala Weather : കോഴിക്കോട് തീരത്ത് ന്യൂനമർദം കരകയറാൻ സാധ്യത; വടക്കൻ കേരളത്തിൽ മഴ കനക്കും, 7 ജില്ലകളിൽ ഓറഞ്ച് അലർട്ട്
വടക്കൻ കേരളത്തിന് സമീപം നിലകൊള്ളുന്ന ന്യൂനമർദം കോഴിക്കോട് തീരത്തോട് ചേർന്ന മേഖലയിൽ കരകയറാൻ സാധ്യതയെന്ന് കാലാവസ്ഥാ നിരീക്ഷണം.
https://metbeatnews.com/low-pressure-system-moving-towards-kozhikode-coast

മലവെള്ളപ്പാച്ചിലിനും ഉരുൾപൊട്ടലിനും സാധ്യത

24 മണിക്കൂറിൽ 204.4 മില്ലിമീറ്ററിൽ കൂടുതൽ മഴ ലഭിക്കാൻ സാധ്യതയുള്ള സാഹചര്യത്തിലാണ് അതിതീവ്ര മഴയ്ക്കുള്ള റെഡ് അലർട്ട് പ്രഖ്യാപിക്കുന്നത്. കുറഞ്ഞ സമയത്തിനുള്ളിൽ വലിയ അളവിൽ മഴ പെയ്യുന്നത് മലവെള്ളപ്പാച്ചിൽ, മിന്നൽ പ്രളയം, നഗരങ്ങളിലെ വെള്ളക്കെട്ട് എന്നിവയ്ക്ക് കാരണമായേക്കാം. മഴ തുടർന്നാൽ മലയോര മേഖലകളിൽ മണ്ണിടിച്ചിലിനും ഉരുൾപൊട്ടലിനും സാധ്യതയുണ്ടെന്നും അധികൃതർ മുന്നറിയിപ്പ് നൽകുന്നു.

മലയോര മേഖലകളിൽ ജാഗ്രത വേണം

ശക്തമായ മഴ ലഭിക്കുന്ന മലയോര മേഖലകളിൽ മണ്ണിടിച്ചിൽ, ഉരുൾപൊട്ടൽ, മലവെള്ളപ്പാച്ചിൽ സാധ്യതയുള്ള പ്രദേശങ്ങളിൽ താമസിക്കുന്നവർ സുരക്ഷിത സ്ഥലങ്ങളിലേക്ക് മാറണം. സാധ്യമെങ്കിൽ പകൽ സമയത്തുതന്നെ മാറിത്താമസിക്കണമെന്നും നിർദേശമുണ്ട്. സ്ഥിരമായി വെള്ളക്കെട്ടുണ്ടാകുന്ന താഴ്ന്ന പ്രദേശങ്ങളിലുള്ളവർ സാഹചര്യം വിലയിരുത്തി ദുരിതാശ്വാസ ക്യാമ്പുകളിലേക്ക് മാറാൻ തയ്യാറാകണം.

മഴ ശക്തമാകുമ്പോൾ അത്യാവശ്യമല്ലാത്ത യാത്രകൾ ഒഴിവാക്കണം. വെള്ളച്ചാട്ടങ്ങൾ, ജലാശയങ്ങൾ, മലയോര മേഖലകൾ എന്നിവിടങ്ങളിലേക്കുള്ള വിനോദയാത്രകളും മഴ മുന്നറിയിപ്പ് പിൻവലിക്കുന്നതുവരെ ഒഴിവാക്കണം. മലയോര മേഖലകളിലേക്കുള്ള രാത്രി യാത്ര പൂർണമായി ഒഴിവാക്കാനും നിർദേശിച്ചിട്ടുണ്ട്.

ശക്തമായ മഴയുള്ളപ്പോൾ നദികൾ മുറിച്ചുകടക്കുകയോ നദികളിലും മറ്റ് ജലാശയങ്ങളിലും കുളിക്കാനോ മീൻപിടിക്കാനോ ഇറങ്ങുകയോ ചെയ്യരുത്. ജലാശയങ്ങൾക്ക് മുകളിലെ പാലങ്ങളിൽ കയറി കാഴ്ച കാണുന്നതും സെൽഫി എടുക്കുന്നതും കൂട്ടംകൂടി നിൽക്കുന്നതും ഒഴിവാക്കണം.

വൈദ്യുതി ലൈനുകൾക്കും മരങ്ങൾക്കും സമീപം ജാഗ്രത

ശക്തമായ കാറ്റിൽ മരങ്ങൾ കടപുഴകി വീഴാനും വൈദ്യുതി പോസ്റ്റുകൾ, ബോർഡുകൾ, മതിലുകൾ എന്നിവ തകരാനും സാധ്യതയുണ്ട്. അപകടാവസ്ഥയിലുള്ള മരങ്ങളും മറ്റ് ഘടനകളും ശ്രദ്ധയിൽപ്പെട്ടാൽ അധികൃതരെ അറിയിക്കണം. സുരക്ഷിതമല്ലാത്ത വീടുകളിൽ താമസിക്കുന്നവർ പ്രത്യേക ജാഗ്രത പാലിക്കണമെന്നും മുന്നറിയിപ്പുണ്ട്.

വെള്ളക്കെട്ടുള്ള ഇടവഴികളിലൂടെയും നടപ്പാതകളിലൂടെയും കടന്നുപോകുന്നതിന് മുമ്പ് വൈദ്യുതി അപകടസാധ്യതയില്ലെന്ന് ഉറപ്പാക്കണം. വൈദ്യുതി ലൈനുകൾ പൊട്ടിവീണതായി ശ്രദ്ധയിൽപ്പെട്ടാൽ കെഎസ്ഇബിയുടെ 1912 എന്ന നമ്പറിൽ അറിയിക്കാം.

കടലാക്രമണം ശക്തമാകാൻ സാധ്യതയുള്ളതിനാൽ തീരപ്രദേശങ്ങളിലുള്ളവരും ജാഗ്രത പാലിക്കണം. ആവശ്യമായ സാഹചര്യത്തിൽ സുരക്ഷിത സ്ഥലങ്ങളിലേക്ക് മാറുകയും മത്സ്യബന്ധന ഉപകരണങ്ങൾ സുരക്ഷിതമാക്കുകയും വേണം.

ദുരിതാശ്വാസ ക്യാമ്പുകളും എമർജൻസി കിറ്റും തയ്യാറാക്കണം

റെഡ്, ഓറഞ്ച് അലർട്ടുള്ള ജില്ലകളിൽ ദുരിതാശ്വാസ ക്യാമ്പുകൾ മുൻകൂട്ടി സജ്ജമാക്കാൻ നിർദേശമുണ്ട്. തങ്ങളുടെ പ്രദേശത്തെ ക്യാമ്പ് എവിടെയാണെന്നും അവിടേക്കുള്ള സുരക്ഷിതമായ വഴി ഏതാണെന്നും ജനങ്ങൾ നേരത്തേ മനസ്സിലാക്കണം. ദുരന്തസാധ്യതാ മേഖലകളിലുള്ളവർ എമർജൻസി കിറ്റും തയ്യാറാക്കി വയ്ക്കണം.

കേരളത്തിലെ എല്ലാ ജില്ലകളിലും 24 മണിക്കൂറും പ്രവർത്തിക്കുന്ന താലൂക്ക്, ജില്ലാ കൺട്രോൾ റൂമുകളുണ്ട്. അടിയന്തര സഹായത്തിനും അപകടസാധ്യത അറിയിക്കാനും 1077, 1070 എന്നീ ടോൾ ഫ്രീ നമ്പറുകളിൽ ബന്ധപ്പെടാം.

കാലാവസ്ഥാ സാഹചര്യങ്ങൾക്കനുസരിച്ച് മുന്നറിയിപ്പുകളിൽ മാറ്റമുണ്ടാകാമെന്നും ഔദ്യോഗിക അറിയിപ്പുകൾ തുടർച്ചയായി പരിശോധിക്കണമെന്നും കേന്ദ്ര കാലാവസ്ഥ വകുപ്പും സംസ്ഥാന ദുരന്ത നിവാരണ അതോറിറ്റിയും നിർദേശിക്കുന്നു.

English Summary : The India Meteorological Department (IMD) has issued a Red Alert for heavy to extremely heavy rainfall across several districts in Kerala, including Malappuram, Kozhikode, Wayanad, Idukki, and Palakkad, spanning October 25–26. Orange and Yellow alerts are active in various other districts. Authorities have warned of potential flash floods, landslides, and waterlogging in hilly and low-lying regions.