വിഷു കുളിച്ച് മഴ വരും. ഓണം കുളിച്ച് മഴ പോകും. പഴമക്കാര്‍ പറയുന്ന ഈ കാലാവസ്ഥാ പഴച്ചൊല്ലുകൾ ഇത്തവണ നമുക്ക് അനുഭവേദ്യമാകുമോ. ഓണത്തിന് മുന്‍പേ മഴ ശക്തിപ്പെടാന്‍ സാധ്യതയുണ്ടെന്നും ഓണത്തിനും തുടര്‍ന്നുള്ള ദിവസങ്ങളിലും മഴ ശക്തമാകാന്‍ സാധ്യതയുണ്ടെന്നുമാണ് മെറ്റ്ബീറ്റ് വെതര്‍ കഴിഞ്ഞ ദിവസങ്ങളില്‍ നിരീക്ഷിച്ചിരുന്നത്. ഓണത്തിന് ഇത്തവണ മഴ ഉറപ്പായിട്ടുണ്ട്. എന്നാല്‍ ഓണം കഴിഞ്ഞാല്‍ മഴ കുറയുമോ എന്നാണ് നമുക്ക് ഇനി നിരീക്ഷിക്കാനുള്ളത്.

വിഷു കുളിച്ച് മഴ വരും (വേനല്‍മഴയും ഇടവപ്പാതിയും)

മലയാള മാസമായ മേടം 1 നാണ് നമ്മള്‍ വിഷു ആഘോഷിക്കുന്നത് (ഏപ്രില്‍ മധ്യത്തോടെ). ഈ സമയത്താണ് വേനല്‍ക്കാലത്തിന്റെ അവസാന ഘട്ടവും, അന്തരീക്ഷത്തില്‍ ചൂടും ഈര്‍പ്പവും കൂടി വേനല്‍മഴ (ഇടിമിന്നലോടു കൂടിയ മഴ) സജീവമാകുന്നതും.

വിഷുവിനു ശേഷമുള്ള നാളുകളില്‍ വേനല്‍മഴ ശക്തമാവുകയും, പിന്നീട് പ്രീ മണ്‍സൂണ്‍ മഴയിലൂടെ ജൂണ്‍ ആദ്യവാരത്തോടെ കേരളത്തില്‍ തെക്കുപടിഞ്ഞാറന്‍ മണ്‍സൂണ്‍ (ഇടവപ്പാതി/കാലവര്‍ഷം) ആരംഭിക്കുകയും ചെയ്യും. അതാണ് വിഷു കുളിച്ച് മഴ വരുമെന്ന് പറയുന്നതിന്റെ പൊരുള്‍.

പഴമക്കാരുടെ ചൊല്ലുകളില്‍ വിഷുക്കണി കണ്ടു കഴിഞ്ഞ് ഭൂമി 'കുളിച്ചു തോര്‍ത്തി' മഴക്കാലത്തിലേക്ക് കടക്കുന്നു അല്ലെങ്കില്‍ മഴയെ സ്വാഗതം ചെയ്യുന്നു എന്നാണ് ഈ വിഷു കുളിച്ച് മഴ വരുെ എന്നതിന്റെ അര്‍ത്ഥം.

ഓണം കുളിച്ച് മഴ പോകും (തുലാവര്‍ഷവും മഴയുടെ അവസാനവും)

ചിങ്ങമാസത്തിലാണ് (ഓഗസ്റ്റ് - സെപ്റ്റംബര്‍) ഓണം ആഘോഷിക്കുന്നത്. ഈ സമയത്തോടെ ഇടവപ്പാതി (കാലവര്‍ഷം) ശക്തികുറഞ്ഞ് പിന്‍വാങ്ങാന്‍ തുടങ്ങും. കര്‍ക്കിടകം കഴിയുന്നതോടെ തന്നെ മഴയുടെ അളവില്‍ കുറവു വരും. ചിങ്ങത്തില്‍ ചിങ്ങി ചിങ്ങി എന്നാണ് പഴമക്കാര്‍ മഴയെ കുറിച്ച് പറയുക. ചാറ്റല്‍ മഴയോ ഇടവിട്ട മഴയോ ആണ് സാധാരണ ചിങ്ങമാസത്തില്‍ ഉണ്ടാകാറുള്ളത്. അതാണ് ചിങ്ങി ചിങ്ങി പെയ്യുന്ന മഴ എന്നതു കൊണ്ട് അര്‍ഥമാക്കുന്നത്.

ചിങ്ങത്തിലെ തെളിഞ്ഞ മാനവും വെയിലുമാണ് സാധാരണയായി ഓണനാളുകളില്‍ കാണാറുള്ളത്. ഓണം കഴിഞ്ഞു വരുന്ന തുലാം മാസത്തില്‍ കുറച്ചുകൂടി തുലാവര്‍ഷം (രണ്ടാം മണ്‍സൂണ്‍ അഥവാ വടക്കുകിഴക്കന്‍ മണ്‍സൂണ്‍) പെയ്യുമെങ്കിലും, തുലാമഴ പെയ്തു തീരുന്നതോടെ (നവംബര്‍- ഡിസംബര്‍) മഴക്കാലം പൂര്‍ണമായും അവസാനിക്കുകയും തണുപ്പുകാലവും പിന്നീട് വേനലും എത്തുകയും ചെയ്യും.

അതായത്, ഓണക്കാലത്തോടു കൂടി ആ വര്‍ഷത്തെ പ്രധാന മഴക്കാലങ്ങള്‍ പൂര്‍ണമായി പെയ്തു തീര്‍ന്ന് ('കുളിച്ച്') വിടപറയുന്നു എന്നാണ് ഇത് സൂചിപ്പിക്കുന്നത്.

അത്തം വെളുത്താല്‍ ഓണം കറുക്കും

അത്തം വെളുത്താല്‍ ഓണം കറുക്കുമെന്ന ചൊല്ലും പ്രസിദ്ധമാണ്.
കേരളത്തിലെ കാലാവസ്ഥയും കര്‍ഷകരുടെ അനുഭവജ്ഞാനവും കോര്‍ത്തിണക്കി പറഞ്ഞുപോരുന്ന മറ്റൊരു പ്രശസ്തമായ പഴഞ്ചൊല്ലാണ് 'അത്തം വെളുത്താല്‍ ഓണം കറുക്കും' (ചിലയിടങ്ങളില്‍ അത്തം കറുത്താല്‍ ഓണം വെളുക്കും എന്നും പറയാറുണ്ട്).

ഇത്തവണ അത്തം തുടങ്ങിയപ്പോള്‍ പൊതുവെ തെളിഞ്ഞ അന്തരീക്ഷസ്ഥിതിയായിരുന്നു. തിരുവോണത്തിന് കനത്ത മഴ സാധ്യത മെറ്റ്ബീറ്റ് ഉള്‍പ്പെടെയുള്ള കാലാവസ്ഥാ നിരീക്ഷകര്‍ പ്രവചിച്ചിട്ടുമുണ്ട്.

ചോതി മുതല്‍ ചതയം വരെ മഴ പ്രവചനം, ഓണത്തിന് ശക്തമായ മഴ സാധ്യത
rainfall is expected to intensify starting on Pooradam (August 24). Heavy to very heavy rainfall is predicted across all districts during the peak fes
https://metbeatnews.com/rainfall-forecast-from-chothi-to-chathayam-heavy-rains-expected-during-onam-fest

അത്തം വെളുത്താല്‍ ഓണം കറുക്കും

ചിങ്ങമാസത്തിലെ 'അത്തം' നക്ഷത്രദിവസം മഴ പെയ്യാതെ ആകാശം തെളിഞ്ഞു വെയില്‍ പ്രകാശിച്ചു നില്‍ക്കുകയാണെങ്കില്‍ (വെളുത്താല്‍), പത്തു ദിവസം കഴിഞ്ഞു വരുന്ന 'തിരുവോണം' നാളില്‍ മഴ പെയ്യാന്‍ (കറുക്കാന്‍) സാധ്യത കൂടുതലാണ് എന്നാണ് ഈ ചൊല്ല് പറയുന്നത്.

അത്തം കറുത്താല്‍ ഓണം വെളുക്കും

നേരെമറിച്ച്, അത്തം നാളില്‍ നല്ല മഴ പെയ്ത് ആകാശം ഇരുണ്ടു കറുത്തിരിക്കുകയാണെങ്കില്‍, ഓണനാളുകളില്‍ മഴ മാറി ആകാശം തെളിഞ്ഞ് നല്ല വെയില്‍ ഉണ്ടാകും.

നാടന്‍ കാലാവസ്ഥാ പ്രവചന രീതി

പാരമ്പര്യമായി കാര്‍ഷിക ആവശ്യങ്ങള്‍ക്കായി മഴയുടെ വരവും പോക്കും കൃത്യമായി നിരീക്ഷിച്ച പഴമക്കാര്‍ അത്തംനാളിലെ കാലാവസ്ഥയുടെ കൃത്യമായ ഒരു ചക്രമാണ് തിരുവോണ നാളിലും ആവര്‍ത്തിക്കുന്നതെന്ന് കണ്ടെത്തിയിരുന്നു. ചിങ്ങമാസത്തില്‍ അന്തരീക്ഷത്തില്‍ ക്രമമായ ഇടവേളകളില്‍ മഴ മേഘങ്ങള്‍ രൂപപ്പെടാറുണ്ട്. ചിങ്ങമാസത്തില്‍ അത്തം നാളുകളില്‍ അന്തരീക്ഷത്തില്‍ ഈര്‍പ്പത്തിന്റെ തോത് കൂടുതലായിരിക്കും.

ഈ ഈര്‍പ്പം ദിവസങ്ങള്‍ക്കു ശേഷം മേഘങ്ങളായി രൂപപ്പെടുകയും തിരുവോണ നാളില്‍ പെയ്യുകയുമാണ് ചെയ്യുക. പരമ്പരാഗത കാലാവസ്ഥാ പ്രവചന രീതിയനുസരിച്ച് ന്യൂമമര്‍ദങ്ങളോ മറ്റു കാലാവസ്ഥാ പ്രതിഭാസങ്ങളോ ഇല്ലെങ്കില്‍ ചിങ്ങമാസത്തിലെ കാലാവസ്ഥ പ്രവചിക്കാന്‍ എളുപ്പമാണ്.

നാളെ ആകാശം നിരീക്ഷിച്ച് മേഘങ്ങളുടെ സ്വഭാവവും കാറ്റിന്റെ സഞ്ചാരവും ദിശയും മനസിലാക്കി ഏതു ഭാഗത്ത് എപ്പോള്‍ മഴ പെയ്യുമെന്ന് നിങ്ങള്‍ക്ക് നിരീക്ഷിക്കാം. എന്നിട്ട് അവയുടെ വിവരങ്ങള്‍ ഞങ്ങളുടെ ഫേസ്ബുക്ക് പേജിലെ കമന്റില്‍ കുറിക്കാം.

English Summary : Traditional Climate Proverbs vs. Modern Forecasts: Will Kerala Experience Rains During Onam?. The article explores traditional Keralite weather proverbs rooted in agricultural wisdom and compares them with current weather observations and forecasts by Metbeat Weather for the Onam festival.