സെപ്റ്റംബർ 19 ഓടെ കാലവർഷം പിൻവാങ്ങും; ഇത്തവണ രണ്ട് ദിവസം വൈകി

രാജ്യത്ത് തെക്കുപടിഞ്ഞാറൻ കാലവർഷം പിൻവാങ്ങാൻ ഒരുങ്ങുന്നു. അതിന് അനുകൂലമായ സാഹചര്യം ഒരുങ്ങി തുടങ്ങി. കേന്ദ്ര കാലാവസ്ഥാ വകുപ്പ് (IMD) പറയുന്നതനുസരിച്ച് സെപ്റ്റംബർ 19 ഓടെ പടിഞ്ഞാറൻ രാജസ്ഥാനിലെ ചില ഭാഗങ്ങളിൽ നിന്ന് കാലവർഷം പിൻവാങ്ങാൻ തുടങ്ങും.

കാലവർഷം പിൻ വാങ്ങുന്നത് ഇത്തവണ വൈകി

സത്യത്തിൽ ഇത്തവണ കാലവർഷത്തിൻ്റെ പിൻവാങ്ങൽ വൈകിയിട്ടാണ് എത്തിയിരിക്കുന്നത്. സാധാരണയായി സെപ്റ്റംബർ 17 ഓടെയാണ് പടിഞ്ഞാറൻ രാജസ്ഥാനിൽ നിന്ന് കാലവർഷത്തിന്റെ പിൻവാങ്ങൽ ആരംഭിക്കാറുള്ളത്. ഇത്തവണ ഏകദേശം രണ്ട് ദിവസം വൈകിയാണ് പിൻവാങ്ങൽ ആരംഭിക്കാൻ സാധ്യത.

മഴ പൂർണ്ണമായും അവസാനിക്കുന്നില്ല

കാലവർഷം പിൻവാങ്ങൽ എന്നത് കൊണ്ട് ഉദേശിക്കുന്നത് രാജ്യത്തുടനീളമുള്ള മഴ പൂർണ്ണമായും അവസാനിക്കുന്നുവെന്നല്ല. ആദ്യം വടക്കുപടിഞ്ഞാറൻ ഇന്ത്യയിലെ ചില ഭാഗങ്ങളിൽ നിന്ന് കാലവർഷക്കാറ്റുകൾ ദുർബലമാകുകയും പിന്മാറുകയും ചെയ്യുന്നു, തുടർന്ന് പതിയെ പതിയെ മറ്റ് മേഖലകളിലേക്കും പിൻവാങ്ങൽ വ്യാപിക്കും. പടിഞ്ഞാറൻ രാജസ്ഥാനിൽ(western Rajasthan)നിന്ന് പിൻവാങ്ങൽ ആരംഭിക്കുന്നതാണ് രാജ്യത്തെ കാലവർഷത്തിന്റെ ഔദ്യോഗിക പിൻവാങ്ങൽ ഘട്ടത്തിന്റെ തുടക്കമായി കണക്കാക്കുന്നത്. അതിന് ശേഷം കാലാവസ്ഥാ സാഹചര്യങ്ങൾ അനുകൂലമാകുന്നതിനനുസരിച്ച് പിൻവാങ്ങൽ തെക്കുകിഴക്കൻ ദിശയിലേക്ക് നീങ്ങും.

അതേസമയം, പിൻവാങ്ങലിന്റെ പ്രഖ്യാപനം അന്തരീക്ഷത്തിലെ ഈർപ്പം, കാറ്റിന്റെ ദിശയും വേഗവും, മഴയുടെ കുറവ് തുടങ്ങിയ കാലാവസ്ഥാ സാഹചര്യങ്ങൾ വിലയിരുത്തിയ ശേഷമാണ് IMD പ്രഖ്യാപിക്കുക.

അതിനാൽ, സെപ്റ്റംബർ രണ്ടാം പകുതിയിലേക്ക് കടക്കുമ്പോൾ രാജ്യത്ത് കാലവർഷത്തിന്റെ അവസാനഘട്ടത്തിന് തുടക്കമാകുന്നുവെന്ന സൂചനയാണ് ഇപ്പോഴത്തെ IMD വിലയിരുത്തൽ നൽകുന്നത്. കേരളം ഉൾപ്പെടെയുള്ള തെക്കൻ സംസ്ഥാനങ്ങളിൽ മഴ ഉടൻ പൂർണമായി അവസാനിക്കുമെന്ന സൂചനയായി ഇതിനെ കാണാനാകില്ല.

English Summary : The India Meteorological Department (IMD) has announced that the southwest monsoon is preparing to begin its retreat, starting around September 19 from parts of western Rajasthan two days later than the normal schedule of September 17.