ഈ മാസം അവസാനം കേരളത്തിൽ വീണ്ടും മഴ എത്തുന്നു, കൂടുതൽ തണുപ്പിനും സാധ്യത

ബുധനാഴ്ച വരെ തമിഴ്നാട്ടിലും കേരളത്തിൻ്റെ തെക്കൻ ജില്ലകളിലും മഴ സാധ്യത. വടക്കൻ കേരളത്തിൽ കൂടുതൽ തണുപ്പ് അനുഭവപ്പെട്ടേക്കാം. ബംഗാൾ ഉൾകടലിൽ തമിഴ്നാട് തീരത്തോട് ചേർന്ന് ശ്രീലങ്ക വരെ ഒരു ന്യൂനമർദ്ദ പാത്തി ( Trough) അന്തരീക്ഷത്തിന്റെ താഴ്ന്ന ഉയരത്തിൽ ആയി രൂപപ്പെട്ടിട്ടുണ്ട്. ഇത് തമിഴ്നാട്ടിൽ അത്യാവശ്യം നല്ല മഴയ്ക്ക് കാരണമാകും.
അതിൻ്റെ ബാക്കി കേരളത്തിലും ലഭിക്കും. തെക്കൻ ജില്ലകളിലും മധ്യകേരളത്തിലും ഇതിൻറെ അലയൊലികൾ ഉണ്ടാകും. വടക്കൻ ജില്ലകളിൽ മൂടിക്കെട്ടിയ അന്തരീക്ഷം ഉണ്ടായേക്കാം.

ശക്തമായ കാറ്റ്

തമിഴ്‌നാട് തീരം, കന്യാകുമാരി പ്രദേശം, മന്നാർ ഉൾക്കടൽ എന്നിവിടങ്ങളിൽ മണിക്കൂറിൽ 35 മുതൽ 45 കിലോമീറ്റർ വരെയും, ചില അവസരങ്ങളിൽ 55 കിലോമീറ്റർ വരെയും വേഗതയിൽ ശക്തമായ കാറ്റ് വീശാൻ സാധ്യതയുണ്ട്.

ഡൽഹിയിൽ മഴ

രാജ്യതലസ്ഥാനത്തിന് വായുമലിനീകരണത്തിൽ നിന്ന് താത്കാലിക ആശ്വാസമായി മഴ എത്തിയിരുന്നു. വെള്ളിയാഴ്‌ച മഴ പെയ്‌തതിനാൽ ഡൽഹിയിലെ വായു ഗുണനിലവാരം (എക്യുഐ) മെച്ചപ്പെട്ടു. 192 ആണ് ശനിയാഴ്ച‌ രേഖപ്പെടുത്തിയ എക്യുഐ. 'ശരാശരി’ വിഭാഗത്തിലാണിത്. മൂന്ന് മാസത്തിന് ശേഷമാണ് എക്യുഐ 200ൽ താഴ്ന്ന് ‘ശരാശരി’ വിഭാഗത്തിലെത്തുന്നത്. 13.2 മില്ലിമീറ്റർ മഴയാണ് ഡൽഹിയിൽ വെള്ളിയാഴ്‌ച രാവിലെ 8.30നും 5.30നും ഇടയിൽ രേഖപ്പെടുത്തിയത്. മഴ പെയ്ത‌തോടെ രാജ്യതലസ്ഥാനത്തെ തണുപ്പും വർധിച്ചിട്ടുണ്ട്.

English Summary : Rains have brought temporary relief from air pollution in the national capital. The air quality index (AQI) in Delhi has improved due to rains on Friday.