തുലാവർഷത്തിന്റെ ആദ്യവാരത്തിലും മഴക്കുറവ്; കേരളത്തിൽ 25% മഴ കുറവ്

തെക്കുപടിഞ്ഞാറൻ കാലവർഷത്തിന് പിന്നാലെ ഒക്ടോബറിൽ ആരംഭിച്ച തുലാവർഷത്തിന്റെ ആദ്യവാരത്തിലും കേരളത്തിൽ മഴക്കുറവ് തുടരുകയാണ്. കേന്ദ്ര കാലാവസ്ഥാ വകുപ്പിന്റെ കണക്കുകൾ പ്രകാരം ഒക്ടോബർ ഒന്ന് മുതൽ ആറ് വരെ സംസ്ഥാനത്ത് ലഭിക്കേണ്ട മഴയുടെ 25 ശതമാനം കുറവാണ് രേഖപ്പെടുത്തിയത്.

അധിക മഴ ലഭിച്ചത് പത്തനം തിട്ടയിൽ

ഈ കാലയളവിൽ കേരളത്തിൽ സാധാരണ ലഭിക്കേണ്ടത് 58 മില്ലിമീറ്റർ മഴയാണ്. എന്നാൽ 43.7 മില്ലിമീറ്റർ മഴ മാത്രമാണ് ലഭിച്ചത്. തുലാവർഷത്തിന്റെ ആദ്യ ആറ് ദിവസങ്ങളിൽ പത്തനംതിട്ട ജില്ലയിൽ മാത്രമാണ് സാധാരണയേക്കാൾ അധികം മഴ ലഭിച്ചത്. 64.7 മില്ലിമീറ്റർ ലഭിക്കേണ്ട സ്ഥാനത്ത് 103.2 മില്ലിമീറ്റർ മഴയാണ് ജില്ലയിൽ ലഭിച്ചത്. സാധാരണയേക്കാൾ 60 ശതമാനം അധികമാണിത്.

Kerala Weather : തുലാവർഷത്തിന്റെ ആദ്യവാരത്തിലും മഴക്കുറവ്; കേരളത്തിൽ 25% മഴ കുറവ്
തെക്കുപടിഞ്ഞാറൻ കാലവർഷത്തിന് പിന്നാലെ ഒക്ടോബറിൽ ആരംഭിച്ച തുലാവർഷത്തിന്റെ ആദ്യവാരത്തിലും കേരളത്തിൽ മഴക്കുറവ് തുടരുകയാണ്.
https://metbeatnews.com/rainfall-deficit-recorded-in-first-week-of-thulavarsham

വടക്കൻ കേരളത്തിൽ ഏറ്റവും കുറവ് മഴ

അതേസമയം, വടക്കൻ കേരളത്തിൽ മഴക്കുറവ് രൂക്ഷമാണ്. വയനാട്ടിൽ സാധാരണ ലഭിക്കേണ്ട മഴയേക്കാൾ 64 ശതമാനവും കണ്ണൂരിൽ 70 ശതമാനവും കുറവ് രേഖപ്പെടുത്തി. ആലപ്പുഴ, എറണാകുളം, കാസർകോട്, കൊല്ലം, കോഴിക്കോട്, മലപ്പുറം, തിരുവനന്തപുരം, തൃശൂർ ജില്ലകളിലും സാധാരണയേക്കാൾ കുറഞ്ഞ മഴയാണ് ലഭിച്ചത്.

കോട്ടയം, പാലക്കാട്, ഇടുക്കി ജില്ലകളിലും മാഹിയിലും സാധാരണ നിലയിലുള്ള മഴ ലഭിച്ചു. ലക്ഷദ്വീപിൽ ഇതേ കാലയളവിൽ സാധാരണയേക്കാൾ അധികം മഴയും ലഭിച്ചിട്ടുണ്ട്. സെപ്റ്റംബർ 30ന് അവസാനിച്ച തെക്കുപടിഞ്ഞാറൻ കാലവർഷ സീസണിലും കേരളത്തിലെ ഭൂരിഭാഗം ജില്ലകളിൽ സാധാരണയേക്കാൾ കുറഞ്ഞ മഴയാണ് ലഭിച്ചത്. ഇതിന് പിന്നാലെയാണ് ഒക്ടോബറിൽ തുലാവർഷം ആരംഭിച്ചത്. എന്നാൽ ആദ്യവാരത്തിലും പത്തനംതിട്ട ഒഴികെയുള്ള മിക്ക ജില്ലകളിലും പ്രതീക്ഷിച്ച തോതിൽ മഴ ലഭിച്ചിട്ടില്ല.

തുലാവർഷം ശക്തിപ്രാപിക്കുന്നതോടെ ഒക്ടോബറിലെ മഴയുടെ തോതിൽ മാറ്റമുണ്ടാകുമോയെന്നാണ് ഇനി പ്രധാനമായും വിലയിരുത്തേണ്ടത്. വരും ദിവസങ്ങളിലെ മഴയുടെ തോത് കേരളത്തിലെ ജലലഭ്യതയിലും കാലാവസ്ഥാ സാഹചര്യങ്ങളിലും നിർണായകമാകും.

English Summary : Kerala has recorded a 25% rainfall deficit during the first week of the northeast monsoon (Thulavarsham), according to the India Meteorological Department (IMD). Between October 1 and 6, the state received only 43.7 mm of rainfall against the normal average of 58 mm