യുഎഇയിൽ ഇന്ന് കാലാവസ്ഥ മാറും; കിഴക്കൻ മേഖലകളിൽ മഴയ്ക്ക് സാധ്യത

യുഎഇയിൽ ഇന്ന് (സെപ്റ്റംബർ 30), പൊതുവെ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കുമെന്ന് ദേശീയ കാലാവസ്ഥാ കേന്ദ്രം (NCM) അറിയിച്ചു. ഉച്ചയ്ക്ക് ശേഷം കിഴക്കൻ മേഖലകളിൽ മേഘങ്ങൾ രൂപപ്പെടാൻ സാധ്യതയുണ്ട്. ഇവ സംവഹന മേഘങ്ങളായി (Convective Clouds) ശക്തിപ്പെടാനും മഴയ്ക്ക് കാരണമാകാനും സാധ്യതയുണ്ട്.

അതേസമയം, ഇന്ന് രാവിലെ രാജ്യത്തിന്റെ വിവിധ ഭാഗങ്ങളിൽ മൂടൽമഞ്ഞ് അനുഭവപ്പെട്ടു. കുറഞ്ഞ ദൃശ്യപരിധി മുന്നറിയിപ്പിനെ തുടർന്ന് NCM റെഡ്, യെല്ലോ അലർട്ടുകൾ പുറപ്പെടുവിച്ചിരുന്നു. രാവിലെ ഒമ്പത് മണിവരെയാണ് മുന്നറിയിപ്പ്. വാഹനമോടിക്കുന്നവർ അതീവ ജാഗ്രത പാലിക്കണമെന്ന് അധികൃതർ നിർദേശിച്ചു.

പകൽ ചൂടിന് കുറവില്ല

അതേ സമയം പകൽ ഇന്നും ചൂടിന് കുറവില്ല. അബുദാബിയിൽ ഇന്ന് പരമാവധി താപനില 39 ഡിഗ്രി സെൽഷ്യസും, ദുബായിൽ 40 ഡിഗ്രിയും, ഷാർജയിൽ 42 ഡിഗ്രി സെൽഷ്യസും എത്തും. യുഎഇയിൽ ശരത്കാലം ആരംഭിച്ചതോടെ കുറഞ്ഞ താപനില പൊതുവെ താഴുന്ന പ്രവണതയാണ്.

അബുദാബിയിൽ കുറഞ്ഞ താപനില 28 ഡിഗ്രിയും, ഷാർജയിൽ 25 ഡിഗ്രിയും ആയിരിക്കും. ദുബായിൽ താപനില 20 ഡിഗ്രി സെൽഷ്യസ് വരെ താഴാനാണ് സാധ്യത.

അറേബ്യൻ ഗൾഫിൽ കടൽ പൊതുവെ ശാന്തമായിരിക്കും. എന്നാൽ ഒമാൻ കടലിൽ ബുധനാഴ്ച രാവിലെ കടൽ പ്രക്ഷുബ്ധമാകാനും സാധ്യതയുണ്ടെന്ന് NCM അറിയിച്ചു.

English Summary : Discover the latest UAE weather forecast for today, September 30. The National Center of Meteorology (NCM) reports morning fog with red and yellow alerts, rising daytime temperatures reaching up to 42°C, and potential convective rain clouds developing in the eastern regions by the afternoon. Stay informed on regional temperatures, driving advisories, and marine conditions.