കേരളത്തില്‍ വരും ദിവസങ്ങളില്‍ മഴ സാധ്യത, ഇന്ന് വടക്കന്‍ തമിഴ്‌നാട്ടില്‍ മഴ

കേരളത്തില്‍ ഇന്ന് കഴിഞ്ഞ ദിവസത്തെക്കാള്‍ മഴ കുറയുമെങ്കിലും ചിലയിടങ്ങളില്‍ ഒറ്റപ്പെട്ട മഴ ലഭിക്കും. കോഴിക്കോട്, കണ്ണൂര്‍, കോട്ടയം, പത്തനംതിട്ട ജില്ലകളിലെ ഒന്നോ രണ്ടോ പ്രദേശങ്ങളിലും മലപ്പുറം ജില്ലയുടെ മലയോര മേഖലയിലുമാണ് ഇന്ന് മഴ പ്രതീക്ഷിക്കുന്നത്. ഇന്നലെയും ഇന്നു പുലര്‍ച്ചെയും കേരളത്തില്‍ വിവിധ പ്രദേശങ്ങളില്‍ മഴ ലഭിച്ചു. മണ്ണാര്‍ക്കാട് മലയോര മേഖലയില്‍ ഇന്നലെ പുലര്‍ച്ചെയുണ്ടായ കനത്ത മഴയില്‍ മലവെള്ളപ്പാച്ചിലുണ്ടായി. പുലര്‍ച്ചെ കോഴിക്കോട്, മലപ്പുറം ജില്ലകളിലും ഇടത്തരം മഴ റിപ്പോര്‍ട്ടു ചെയ്തു.

തമിഴ്‌നാട്ടിലും ആന്ധ്രയിലും ശക്തമായ മഴ

അതേസമയം, വടക്കന്‍ തമിഴ്‌നാട്ടിലും, തെലങ്കാനയിലും തെക്കന്‍ ആന്ധ്രാപ്രദേശിലും ഇടിയോടെ ശക്തമായ മഴ പ്രതീക്ഷിക്കാം. കേരളത്തിലും കര്‍ണാടകയുടെ പടിഞ്ഞാറന്‍ മേഖലയിലും തീരദേശത്തും മഴ കുറവായിരിക്കും. എന്നാല്‍ എന്നാല്‍ കിഴക്കന്‍ ഉള്‍നാടന്‍ കര്‍ണാടകയിലെ ബെല്ലാരി ഉള്‍പ്പെടെയുള്ള മേഖലകളില്‍ ഇടിയോടെ മഴ സാധ്യത.

കാലവര്‍ഷം വിടവാങ്ങല്‍ പുരോഗമിക്കുന്നു

കാലവര്‍ഷം വിടവാങ്ങല്‍ രാജസ്ഥാനില്‍ നിന്ന് ഗുജറാത്തിലേക്കും പഞ്ചാബിലേക്കും വ്യാപിച്ചു. നിലവില്‍ കാലവര്‍ഷം വിടവാങ്ങല്‍ രേഖ (Line of withdrawal of south west monsoon) ബട്ടിന്‍ണ്ട, ഫത്തേഹാബാദ്, പിലാനി, അജ്മീര്‍, ദേസ, ഭുജ് എന്നിവിടങ്ങളിലൂടെയാണ് കടന്നു പോകുന്നത്. ഇതുവരെയുള്ള പ്രദേശങ്ങളില്‍ കാലവര്‍ഷം വിടവാങ്ങിക്കഴിഞ്ഞു. തൊട്ടടുത്ത പ്രദേശങ്ങളിലേക്കും കാലവര്‍ഷം ഉടനെ വിടവാങ്ങുന്നതിനുള്ള തയാറെടുപ്പുകള്‍ തുടങ്ങും.

കേരളത്തില്‍ വീണ്ടും മഴ സാധ്യത

ഈ മാസം 23 നു ശേഷം കേരളത്തില്‍ വീണ്ടും മഴ ലഭിക്കാന്‍ സാധ്യത. അടുത്തയാഴ്ചയോടെ ബംഗാള്‍ ഉള്‍ക്കടലില്‍ ന്യൂനമര്‍ദം രൂപപ്പെടാനും സാധ്യതയുണ്ട്. കൂടുതല്‍ വിവരങ്ങള്‍ വരും ദിവസങ്ങളിലെ നിരീക്ഷണങ്ങളില്‍ ലഭിക്കും.

Metbeat News