യുഎഇയിൽ ഇന്ന് മഴയ്ക്ക് സാധ്യത; താപനില 43 ഡിഗ്രി സെൽഷ്യസ് വരെ ഉയരും

യുഎഇയിൽ ഇന്ന് (ഒക്ടോബർ 12) മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM). തെളിഞ്ഞ കാലാവസ്ഥയാകുമെങ്കിലും ഉച്ചയോടെ കിഴക്കൻ, പടിഞ്ഞാറൻ മേഖലകളിൽ മഴ മേഘങ്ങൾ രൂപപ്പെടാൻ സാധ്യതയുണ്ട്. ഇതിന്റെ ഭാഗമായി ചിലയിടങ്ങളിൽ മഴ ലഭിച്ചേക്കും.

രാത്രിയിലും ബുധനാഴ്ച രാവിലെയും പടിഞ്ഞാറൻ മേഖലകളിൽ അന്തരീക്ഷ ഈർപ്പം വർധിക്കും. ഇതോടെ ചിലയിടങ്ങളിൽ മൂടൽമഞ്ഞിനും നേരിയ മഞ്ഞിനും (Fog or Mist) സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.

ചൂട് തുടരും

രാജ്യത്ത് ചൂട് തുടരും. ചില മേഖലകളിൽ പരമാവധി താപനില 43 ഡിഗ്രി സെൽഷ്യസ് വരെ ഉയർന്നേക്കും. അബുദാബിയിൽ 39 ഡിഗ്രി സെൽഷ്യസും ദുബായിൽ 38 ഡിഗ്രി സെൽഷ്യസും വരെ താപനില രേഖപ്പെടുത്താനാണ് സാധ്യത.

കാറ്റിന് സാധ്യത

തെക്കുകിഴക്കൻ ദിശയിൽനിന്ന് വടക്കുകിഴക്കൻ ദിശയിലേക്ക് നേരിയതോ മിതമായതോ ആയ കാറ്റ് വീശും. മേഘങ്ങളുടെ സാന്നിധ്യം വർധിക്കുന്ന സമയങ്ങളിൽ കാറ്റിന് ശക്തിയേറാനും പൊടിക്കാറ്റിന് കാരണമാകാനും സാധ്യതയുണ്ട്. മണിക്കൂറിൽ 10 മുതൽ 25 കിലോമീറ്റർ വരെയായിരിക്കും കാറ്റിന്റെ വേഗം. ചില സമയങ്ങളിൽ ഇത് 40 കിലോമീറ്റർ വരെ ഉയർന്നേക്കും. അതേ സമയം അറേബ്യൻ ഗൾഫിലും ഒമാൻ കടലിലും കടൽ പൊതുവെ ശാന്തമായിരിക്കുമെന്നും കാലാവസ്ഥാ നിരീക്ഷണ കേന്ദ്രം വ്യക്തമാക്കി.

English Summary : Stay informed on today’s UAE weather forecast from the National Center of Meteorology (NCM). Discover regional temperature highs—reaching up to 43°C in some areas—along with chances of afternoon rain clouds, morning fog, and winds up to 40 km/h. Get the latest insights for Abu Dhabi, Dubai, and surrounding coastal regions.