യുഎഇയിൽ ഇന്ന് ചില പ്രദേശങ്ങളിൽ മഴയ്ക്ക് സാധ്യത; താപനില 37 ഡിഗ്രി വരെ ഉയരും

യുഎഇയിൽ ഇന്ന് (നവംബർ 2) ഭാഗികമായി മേഘാവൃതമായ കാലാവസ്ഥയ്ക്കും ചിലയിടങ്ങളിൽ മഴയ്ക്കും സാധ്യതയെന്ന് ദേശീയ കാലാവസ്ഥാ നിരീക്ഷണ കേന്ദ്രം (എൻസിഎം) അറിയിച്ചു.

ഉച്ചയോടെ കിഴക്കൻ, തെക്കൻ മേഖലകളിൽ മഴ മേഘങ്ങൾ രൂപപ്പെടാൻ സാധ്യതയുണ്ട്. രാത്രിയിലും ചൊവ്വാഴ്ച രാവിലെയും തീരദേശ, ഉൾനാടൻ മേഖലകളിൽ അന്തരീക്ഷ ഈർപ്പം വർധിക്കും. ചിലയിടങ്ങളിൽ മൂടൽമഞ്ഞിനും നേരിയ മഞ്ഞിനും സാധ്യതയുണ്ടെന്നും എൻസിഎം മുന്നറിയിപ്പ് നൽകി.

ദുബൈ, അബുദാബി, ഷാർജ എന്നിവിടങ്ങളിൽ താപനില യഥാക്രമം 36, 37, 37 ഡിഗ്രി സെൽഷ്യസ് വരെ ഉയരും. കുറഞ്ഞ താപനില 23, 24, 24 ഡിഗ്രി സെൽഷ്യസായിരിക്കും.

മണിക്കൂറിൽ 10 മുതൽ 25 കിലോമീറ്റർ വരെ വേഗതയിൽ കാറ്റിന് സാധ്യതയുണ്ട്. ചില സമയങ്ങളിൽ വേഗം 40 കിലോമീറ്റർ വരെയാകാം. മേഘങ്ങൾക്കൊപ്പം വീശുന്ന കാറ്റ് പൊടിപടലങ്ങൾ ഉയർത്താനും സാധ്യതയുണ്ട്.

അറേബ്യൻ ഗൾഫിലും ഒമാൻ കടലിലും കടൽ പൊതുവെ ശാന്തമായിരിക്കുമെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.

English Summary : The National Centre of Meteorology (NCM) has forecasted partly cloudy weather with a chance of rain in parts of the UAE today (November 2). Rain-bearing convective clouds are expected to form over eastern and southern areas by afternoon.