മുള്ളൻ മുതൽ നെത്തോലിവരെ; ഇവ കഴിച്ചാൽ വന്ധ്യത, പ്രമേഹം, പൊണ്ണത്തടി, കേരളത്തിന്റെ ജലാശയങ്ങളിൽ മൈക്രോപ്ലാസ്റ്റിക് ഭീഷണി

ആസ്വദിച്ച് മത്സ്യം പോലും കഴിക്കാൻ പറ്റാത്ത അവസ്ഥയാണിന്ന്. അറബിക്കടലും കായലുകളും പുഴകളും ചേർന്ന മനോഹരമായ ഈ കേരളത്തിന്റെ ഏറ്റവും വലിയ സവിശേഷത എന്നത് മത്സ്യസമ്പത്താണ്. ഇന്ന് ആ മത്സ്യസമ്പത്തു പോലും ഭീഷണിയുടെ വക്കിലാണ്. ജല മൈക്രോപ്ലാസ്റ്റിക് മലിനീകരണം ജല ആവാസവ്യവസ്ഥയിലെ ജീവികൾക്ക് വലിയൊരു ഭീഷണിയായി മാറുകയാണ്. മനുഷ്യർ തന്നെയാണ് ഇത്തരം അപകടങ്ങൾ വിളിച്ചു വരുത്തുന്നത്. കായലുകളിലും കടലിലും ഉപേക്ഷിക്കുന്ന പ്ലാസ്റ്റിക് മാലിന്യങ്ങൾ സൂര്യപ്രകാശം, അൾട്രാവയലറ്റ് (UV) വികിരണം, ശക്തമായ തിരമാലകൾ തുടങ്ങിയവയുടെ സ്വാധീനത്തിൽ വിഘടിച്ചാണ് അഞ്ച് മില്ലീമീറ്ററിൽ താഴെ വലിപ്പമുള്ള മൈക്രോപ്ലാസ്റ്റിക് കണങ്ങളായി മാറുന്നത്.

രണ്ടു തരം മൈക്രോപ്ലാസ്റ്റിക്കുകൾ

മൈക്രോപ്ലാസ്റ്റിക്കുകൾ പ്രധാനമായും രണ്ട് തരത്തിലാണ് ഉണ്ടാകുന്നത്. നിർമാണ ഘട്ടത്തിൽ തന്നെ ചെറുകണങ്ങളായി രൂപപ്പെടുന്നവയാണ് പ്രൈമറി മൈക്രോപ്ലാസ്റ്റിക്കുകൾ. സൗന്ദര്യവർധക വസ്തുക്കളിലെ മൈക്രോബീഡുകളും കൃത്രിമ വസ്ത്രങ്ങളിൽനിന്ന് പുറന്തള്ളുന്ന മൈക്രോഫൈബറുകളും ഇതിന് ഉദാഹരണങ്ങളാണ്. വലിയ പ്ലാസ്റ്റിക് മാലിന്യങ്ങൾ പരിസ്ഥിതിയിൽ എത്തി കാലക്രമേണ വിഘടിച്ചുണ്ടാകുന്നതാണ് സെക്കൻഡറി മൈക്രോപ്ലാസ്റ്റിക്കുകൾ.

കണ്ടാല്‍ കഴിച്ചുപോകും, തീൻമേശയിൽ പ്രിയങ്കരന്‍, ഇവ വാങ്ങുകയോ ഭക്ഷിക്കുകയോ ചെയ്യരുതെന്ന് മുന്നറിയിപ്പ്
പഫർ മത്സ്യങ്ങൾ ലോകത്തിലെ ഏറ്റവും വിഷമുള്ള രണ്ടാമത്തെ നട്ടെല്ലുള്ള ജീവിയാണ്.
https://metbeatnews.com/oman-food-safety-order-about-pufferfish

കുസാറ്റ് നടത്തിയ പഠനം നിർണ്ണായകം

കൊച്ചി കായലിലും ലക്ഷദ്വീപിലും കുസാറ്റ് നടത്തിയ പഠനങ്ങൾ ആണ് മൈക്രോപ്ലാസ്റ്റിക് മലിനീകരണത്തിന്റെ ഗുരുതരമായ ചിത്രം കാണിച്ചു തരുന്നത്. ഗവേഷകരായ നീതു കെ.വി., ഹരി പ്രവേദ് എന്നിവരോടൊപ്പം നടത്തിയ പഠനത്തിൽ കൊച്ചി കായലിൽ മലയാളികൾ സാധാരണയായി ഭക്ഷണത്തിനായി ഉപയോഗിക്കുന്ന മുള്ളൻ, അരിഞ്ഞിൽ, നെത്തോലി, ഏരീ തുടങ്ങിയ മത്സ്യങ്ങളിൽ മൈക്രോപ്ലാസ്റ്റിക് സാന്നിധ്യം കണ്ടെത്തി. സാമ്പിളുകളിൽ പ്രധാനമായും മൈക്രോപ്ലാസ്റ്റിക് ഫൈബറുകളും ഫിലിമുകളുമാണ് കണ്ടെത്തിയത്. പോളിസ്‌റ്റൈറീൻ, പോളിയെത്തിലീൻ, പോളിപ്രൊപ്പിലീൻ, നൈലോൺ തുടങ്ങിയ പ്ലാസ്റ്റിക് ഇനങ്ങളും തിരിച്ചറിഞ്ഞു.

ലക്ഷദ്വീപിലും ആശങ്ക

ഇതേ അവസ്ഥയിലൂടെയാണ് ലക്ഷദ്വീപും കടന്നു പോകുന്നത്.ഇവിടുത്തെ സ്ഥിതിയും ആശങ്കാജനകമാണ്. വിനോദസഞ്ചാരം, അശാസ്ത്രീയ മത്സ്യബന്ധനം, പൊതുസ്ഥലങ്ങളിൽ മാലിന്യം തള്ളുന്നത്, മാലിന്യസംസ്‌കരണം തുടങ്ങിയവ പവിഴപ്പുറ്റുകൾ ഉൾപ്പെടെയുള്ള സമുദ്ര ആവാസവ്യവസ്ഥയ്ക്ക് കടുത്ത ഭീഷണിയാകുകയാണ്. ജനവാസമുള്ളതും ഇല്ലാത്തതുമായ ദ്വീപുകളിലെ ഉപരിതല ജലത്തിലും അടിത്തട്ടിലും മൈക്രോപ്ലാസ്റ്റിക് സാന്നിധ്യം പഠനത്തിൽ കണ്ടെത്തി.

Fish eat microplastics driven by their odour. Above, debris found in the stomach of a fish Photograph: Paulo Oliveira/Alamy

കരിമീനിലും പഠനം നടത്തി

ജലജീവികളിലുണ്ടാകുന്ന പ്രത്യാഘാതം മനസ്സിലാക്കുന്നതിനായി കേരളത്തിന്റെ സ്വന്തം കരിമീൻ, Etroplus suratensis, കുഞ്ഞുങ്ങളിലും പഠനം നടത്തി. ലാബിൽ PVC മൈക്രോപ്ലാസ്റ്റിക്കുകളുമായി 45 ദിവസം സമ്പർക്കത്തിൽ കൊണ്ടുവന്ന കരിമീൻ കുഞ്ഞുങ്ങളിലാണ് പഠനം നടത്തിയത്. ഫലങ്ങൾ ഗുരുതരമായ പ്രത്യാഘാതങ്ങളാണ് സൂചിപ്പിച്ചത്. കരിമീൻ കുഞ്ഞുങ്ങളുടെ വളർച്ചയിൽ ഗണ്യമായ കുറവുണ്ടായി. തലച്ചോറിലും ചെകിളപ്പൂക്കളിലും Acetylcholinesterase എൻസൈമിന്റെ പ്രവർത്തനം കുറഞ്ഞു.

മത്സ്യങ്ങളിൽ അസാധാരണമായ ചലനങ്ങളും കണ്ടെത്തി. മാത്രമല്ല പ്രതിരോധശേഷിയിലും കുറവുണ്ടായി. രക്തപരിശോധനയിൽ ചുവന്ന രക്താണുക്കളുടെയും (RBC), വെളുത്ത രക്താണുക്കളുടെയും (WBC) എണ്ണം കുറഞ്ഞതായി കണ്ടെത്തി. ഇത് മത്സ്യങ്ങളുടെ രോഗപ്രതിരോധ ശേഷിയെ ഗുരുതരമായി ബാധിക്കാനുള്ള സാധ്യതയാണ് ഉയർത്തുന്നത്.
മൈക്രോപ്ലാസ്റ്റിക് ജലത്തിൽ മാത്രം ഒതുങ്ങുന്നില്ല. സസ്യപ്ലവകങ്ങളും ജന്തുപ്ലവകങ്ങളും മുതൽ ചെമ്മീൻ, ഞണ്ട്, കക്ക, കല്ലുമ്മക്കായ, വിവിധ മത്സ്യങ്ങൾ, കടൽ സസ്തനികൾ, കടൽപ്പക്ഷികൾ എന്നിവയിലേക്ക് ഇവ നേരിട്ടോ ഭക്ഷ്യശൃംഖല വഴിയോ എത്താം.

ദഹനനാളത്തിൽ അടിഞ്ഞുകൂടുന്ന മൈക്രോപ്ലാസ്റ്റിക്കുകൾ പിന്നീട് കുടലിൽ നിന്ന് രക്തചംക്രമണ സംവിധാനത്തിലേക്കും കോശങ്ങളിലേക്കും എത്താനുള്ള സാധ്യതയുണ്ട്. കാലക്രമേണ ഇവ വീണ്ടും വിഘടിച്ച് ഒരു മൈക്രോമീറ്ററിൽ താഴെ വലിപ്പമുള്ള നാനോപ്ലാസ്റ്റിക്കുകളായി മാറാം. വലിപ്പം കുറയുന്നതോടെ ജീവികളുടെ ശരീരത്തിലേക്ക് കൂടുതൽ എളുപ്പത്തിൽ കടന്നുകയറാനും മറ്റ് വിഷ രാസവസ്തുക്കളെ ഉപരിതലത്തിൽ ആഗിരണം ചെയ്യാനുമുള്ള സാധ്യത വർധിക്കും.

വന്ധ്യത, പ്രമേഹം, പൊണ്ണത്തടി തുടങ്ങിയ ആരോഗ്യ പ്രശ്നങ്ങൾ

മനുഷ്യരിൽ ഇതിന്റെ നേരിട്ടുള്ള ആരോഗ്യപ്രത്യാഘാതങ്ങളെക്കുറിച്ച് കൂടുതൽ പഠനങ്ങൾ ആവശ്യമാണെങ്കിലും, പ്ലാസ്റ്റിക്കിൽ ഉപയോഗിക്കുന്ന ചില രാസ അഡിറ്റീവുകൾ സംബന്ധിച്ച് ആശങ്ക നിലനിൽക്കുന്നു. പ്ലാസ്റ്റിക്കിന് നിറവും ദൃഢതയും നൽകാൻ ഉപയോഗിക്കുന്ന ചില ഹെവി മെറ്റലുകൾ, Phthalates, Bisphenol-A (BPA) തുടങ്ങിയ രാസവസ്തുക്കൾ ശരീരത്തിലെത്തിയാൽ അന്തഃസ്രാവീവ്യവസ്ഥയെ ബാധിക്കാനുള്ള സാധ്യതയുണ്ട്.

സ്വാഭാവിക ഹോർമോൺ പ്രവർത്തനങ്ങളെ അനുകരിക്കുകയോ തടസ്സപ്പെടുത്തുകയോ ചെയ്യുന്ന ഇത്തരം രാസവസ്തുക്കൾ ദീർഘകാലത്ത് പ്രത്യുത്പാദന പ്രശ്‌നങ്ങൾ, വന്ധ്യത, പ്രമേഹം, പൊണ്ണത്തടി തുടങ്ങിയ ആരോഗ്യപ്രശ്‌നങ്ങളുമായി ബന്ധപ്പെട്ടേക്കാമെന്നാണ് വിവിധ പഠനങ്ങൾ സൂചിപ്പിക്കുന്നത്.

അതിനാൽ കേരളത്തിന്റെ കടലും കായലുകളും പുഴകളും സംരക്ഷിക്കണമെങ്കിൽ പ്ലാസ്റ്റിക് മാലിന്യത്തിന്റെ ഉറവിടത്തിൽ തന്നെയുള്ള നിയന്ത്രണവും ശാസ്ത്രീയമായ മാലിന്യസംസ്‌കരണവും അനിവാര്യമാണ്. കണ്ണിൽപ്പെടാത്തത്ര ചെറുതായി മാറിയ പ്ലാസ്റ്റിക് ഇന്ന് ജലജീവികളുടെ ശരീരത്തിലൂടെയും ഭക്ഷ്യശൃംഖലയിലൂടെയും നമ്മുടെ പരിസ്ഥിതിയിലേക്ക് തന്നെ തിരിച്ചെത്തുന്ന അവസ്ഥയാണ് മുന്നറിയിപ്പ് നൽകുന്നത്.

English Summary : A groundbreaking study by Cochin University of Science and Technology (CUSAT) has exposed alarming levels of microplastic contamination across Kerala's aquatic ecosystems and popular edible fish species. Researchers Neethu K.V. and Hari Praved detected plastic fibers and films—including polystyrene, polyethylene, polypropylene, and nylon—in common local fish such as ponyfish (mullan), anchovies (netholi), arinjil, and aeree sourced from the Cochin backwaters and Lakshadweep.