യുഎഇ യിൽ മഴയും തണുപ്പും ആലിപ്പഴ വർഷവും, കാലാവസ്ഥയിൽ വലിയ മാറ്റം, ജാഗ്രത പാലിക്കുക

യുഎഇയിൽ അടുത്തയാഴ്ച കാലാവസ്ഥയിൽ വലിയ മാറ്റം അനുഭവപ്പെടുമെന്ന് മുന്നറിയിപ്പ്. ദുബായ് ഉൾപ്പെടെ രാജ്യത്തിന്റെ വിവിധ ഭാഗങ്ങൾ കനത്ത മഴയ്ക്കും ഇടിമിന്നലിനും ആലിപ്പഴ വർഷത്തിനും സാക്ഷ്യം വഹിക്കുമെന്നാണ് കേന്ദ്ര കാലാവസ്ഥാ വകുപ്പ് പറയുന്നത്. അതോടൊപ്പം അന്തരീക്ഷത്തിൽ തണുപ്പ് കൂടുകയും ചെയ്യുമെന്നാണ് മുന്നറിയിപ്പ്. ഡിസംബർ 16 മുതൽ 19 വരെയാണ് കാലാവസ്ഥാ മാറ്റം അതിന്റെ പാരമ്യത്തിലെത്തുകയെന്ന് നാഷനൽ സെന്റർ ഓഫ് മെറ്റീരിയോളജിയിലെ കാലാവസ്ഥാ നിരീക്ഷകർ അറിയിച്ചു.

ജാഗ്രത വേണം

യുഎയിലെ കാലാവസ്ഥയ്ക്കുള്ള പ്രധാനമാറ്റത്തിന് കാരണം ചെങ്കടലിൽ നിന്നും അറബിക്കടലിൽ നിന്നുമുള്ള ന്യൂനമർദ്ദങ്ങളുടെ സ്വാധീനമാണ്. അറബിക്കടലിൽ നിന്നും ചെങ്കടലിൽ നിന്നും വലിയ അളവിൽ ജലബാഷ്പം രാജ്യത്തേക്ക് പ്രവഹിക്കും. ഒപ്പം അന്തരീക്ഷത്തിന്റെ ഉയർന്ന തലങ്ങളിലെ ന്യൂനമർദ്ദവും
ചേരുമ്പോൾ കനത്ത മഴയ്ക്ക് സാധ്യതയുണ്ട്.

ഇന്നത്തോടെ കിഴക്കൻ യുഎഇയിൽ മഴമേഘങ്ങൾ രൂപപ്പെട്ടു തുടങ്ങും. ഞായറാഴ്ചയോടെ തീരദേശങ്ങളിലും വടക്കൻ പ്രദേശങ്ങളിലും മഴയെത്തും. നേരിയ മഴ മുതൽ ശക്തമായ മഴ വരെ ലഭിക്കാൻ സാധ്യതയുണ്ട്. ഇടവിട്ടുള്ള മഴ, കാറ്റിന്റെ ദിശയിലുള്ള മാറ്റം, പൊടിപടലങ്ങൾ നിറഞ്ഞ അന്തരീക്ഷം എന്നിവയും പ്രതീക്ഷിക്കാം.

ആലിപ്പഴ വർഷത്തിന് സാധ്യത

ഡിസംബർ 15 മുതൽ 19 വരെയുള്ള രാത്രികളിൽ രാജ്യത്തുടനീളം മഴ ലഭിക്കുമെന്നാണ് മുന്നറിയിപ്പ്. എന്നാൽ, വടക്കൻ, കിഴക്കൻ എമിറേറ്റുകളിൽ മഴ കൂടുതൽ ശക്തമായിരിക്കും. ഇടിമിന്നലിനും ആലിപ്പഴ വർഷത്തിനും ഇവിടെ സാധ്യതയുണ്ട്. ശക്തമായ കാറ്റ് കടലിൽ തിരമാലകൾ ഉണ്ടാക്കാൻ സാധ്യതയുള്ളതിനാൽ തീരദേശങ്ങളിൽ താമസിക്കുന്നവരും മത്സ്യത്തൊഴിലാളികളും ജാഗ്രത പാലിക്കണമെന്നാണ് മുന്നറിയിപ്പ്.

തണുപ്പിനും കുറവില്ല

മഴയും ഇടിമിന്നലും ഉണ്ടാകുമ്പോൾ തന്നെ യുഎഇയിൽ താപനില ഗണ്യമായി കുറയുമെന്നും കാലാവസ്ഥാ നിരീക്ഷകർ പറയുന്നു. ഡിസംബർ 14, 15 തീയതികളിൽ താപനിലയിൽ കുറവ് പ്രകടമാകും. പകൽ സമയത്തെ താപനില 26°സെൽഷ്യസ് മുതൽ 27°സെൽഷ്യസ് വരെയായി കുറയാൻ സാധ്യതയുണ്ട്. രാത്രി താപനില 12°സെൽഷ്യസ് മുതൽ 15°സെൽഷ്യസ് വരെയായി താഴുകയും ചെയ്യും. യുഎഇയിൽ ശൈത്യകാലം ആരംഭിക്കാറായി അതിൻ്റെ സൂചനയാണിത്. പൊതുജനങ്ങൾ ഔദ്യോഗിക കാലാവസ്ഥാ മുന്നറിയിപ്പുകൾ ശ്രദ്ധിക്കണമെന്നും കാഴ്ച കുറഞ്ഞ സ്ഥലങ്ങളിലും കടലിലും ശ്രദ്ധ പുലർത്തണമെന്നും അധികൃതർ നിർദ്ദേശം നൽകിയിട്ടുണ്ട്.

2014 ൽ ഉണ്ടായത് റെക്കോർഡ് തണുപ്പ്

അറേബ്യൻ ഗൾഫിൽ നിന്ന് ഈർപ്പമുള്ള വായുസഞ്ചാരം രാജ്യത്തേക്ക് നീങ്ങുന്നതിനാൽ അതിരാവിലെ അന്തരീക്ഷത്തിലെ ആർദ്രത വർധിക്കും. ഇത് മൂടൽമഞ്ഞും ഇളം മൂടൽമഞ്ഞും രൂപപ്പെടാൻ അനുകൂലമായ സാഹചര്യം സൃഷ്ടിക്കും. ഈർപ്പനില ഈ കാലയളവിൽ ഗണ്യമായി വർധിക്കും. ശരാശരി 63% ഈർപ്പനിലയാണ് പ്രതീക്ഷിക്കുന്നത്. ഏറ്റവും ഉയർന്ന ഈർപ്പനില 79%- നും 90% നും ഇടയിൽ ഉയരാനും സാധ്യതയുണ്ട്. മൂടൽമഞ്ഞ് ഡിസംബറിൽ സാധാരണമാകും. 2014-ൽ രാജ്യത്ത് 20 ദിവസം മൂടൽമഞ്ഞും 5 ദിവസം നേരിയ മൂടൽമഞ്ഞും അനുഭവപ്പെട്ടതാണ് ഏറ്റവും ഉയർന്ന റെക്കോർഡ്.

English summary : UAE weather experts predict a significant drop in temperatures during rain and thunderstorms on December 14-15. Daytime highs may reach 26-27°C, while nights cool to 12-15°C.