പ്രളയം ദുരന്തം വിതച്ച നേപ്പാളിൽ ഭൂചലനം; മുസ്താങ്ങിൽ 5.3 തീവ്രത രേഖപ്പെടുത്തി

അതിശക്തമായ പ്രളയ ദുരന്തത്തിൽ നിന്ന് കരകയറാൻ പോലും കഴിയാതെ വിങ്ങുന്ന നേപ്പാളിനെ ഞെട്ടിച്ച് വീണ്ടും ഭൂചലനം. രാജ്യത്തിന്റെ വടക്കുപടിഞ്ഞാറൻ മേഖലയിലെ മുസ്താങ്ങ് ജില്ലയിലാണ് 5.3 തീവ്രത രേഖപ്പെടുത്തിയ ഭൂചലനം ഉണ്ടായത്. ചൊവ്വാഴ്ച രാത്രി ഉണ്ടായ ഭൂചലനം സമീപ ജില്ലകളിലും അനുഭവപ്പെട്ടതോടെ ദുരന്തബാധിതരായ ജനങ്ങൾക്കിടയിൽ ആശങ്ക ശക്തമായി.

നാഷണൽ സെന്റർ ഫോർ സീസ്മോളജിയുടെ കണക്കനുസരിച്ച് ഇന്ത്യൻ സമയം രാത്രി 9.38ഓടെയാണ് ഭൂചലനം രേഖപ്പെടുത്തിയത്. മുസ്താങ്ങിലെ ലോമാന്താങ് മേഖലയ്ക്ക് സമീപമായിരുന്നു പ്രഭവകേന്ദ്രം. ഭൂമിക്കടിയിൽ ഏകദേശം 143 കിലോമീറ്റർ ആഴത്തിലായിരുന്നു ഭൂചലനം.

ആഘാതം കുറഞ്ഞു, ആളപായമില്ല

ആഴത്തിലുള്ള ഭൂചലനമായതിനാൽ ഉപരിതലത്തിലെ ആഘാതം കുറവായിരുന്നുവെന്നാണ് പ്രാഥമിക നിഗമനം. ഭൂചലനത്തെ തുടർന്ന് ആളപായമോ വലിയ കെട്ടിടനാശമോ റിപ്പോർട്ട് ചെയ്തിട്ടില്ല.

നിലവിൽ പ്രളയവും മണ്ണിടിച്ചിലും മൂലം ദുരിതത്തിലായ നേപ്പാളിൽ പുതിയ ഭൂചലനം ആശങ്ക വർധിപ്പിച്ചിരിക്കുകയാണ്. ദുരന്തബാധിത മേഖലകളിലെ രക്ഷാപ്രവർത്തനങ്ങളും പുനരധിവാസ പ്രവർത്തനങ്ങളും തുടരുന്നതിനിടെയാണ് ഭൂചലനം ഉണ്ടായത്. അതേസമയം തുടർചലനങ്ങൾ ഉണ്ടാകുമോയെന്ന ആശങ്കയും നിലനിൽക്കുന്നുണ്ട്.

English Summary : A 5.3 magnitude earthquake struck Mustang district in northwestern Nepal amidst ongoing flood and landslide recovery efforts. According to the National Center for Seismology, the quake hit at a depth of 143 km near Lo Manthang around 9:38 PM IST