കോപ് 30 ഉച്ചകോടി ശനിയാഴ്ചയും പ്രതിഷേധം

കോപ് 30 കാലാവസ്ഥാ ഉച്ചകോടി നടക്കുന്ന ബ്രസീലിലെ ബെലേമില്‍ ശനിയാഴ്ചയും ആയിരങ്ങളുടെ പ്രതിഷേധ മാര്‍ച്ച്. പരമ്പരാഗത വസ്ത്രം ധരിച്ച ഗോത്ര വിഭാഗക്കാരാണ് മാര്‍ച്ചില്‍ ഏറെയും പങ്കെടുത്തത്. സര്‍ക്കാരുകള്‍ ഫോസില്‍ ഇന്ധനങ്ങളുടെ വ്യവസായ ശാലകള്‍ പ്രോത്സാഹിക്കുന്നത് നിര്‍ത്തുക, ഭൂമിയെ രക്ഷിക്കാന്‍ ലോക രാജ്യങ്ങള്‍ കൂടുതല്‍ നടപടികള്‍ സ്വീകരിക്കുക തുടങ്ങിയവയാണ് ഇവരുടെ മുദ്രാവാക്യങ്ങള്‍.

ഗോത്ര വിഭാഗക്കാര്‍ക്കൊപ്പം യുവാക്കളായ ക്ലൈമറ്റ് ആക്ടിവിസ്റ്റുകളും സിവില്‍ സൊസൈറ്റി ഗ്രൂപ്പുകളും ആടിയും പാടിയും സംഗീതോപകരണങ്ങള്‍ വായിച്ചും സമാധാനപരമായ പ്രതിഷേധം സംഘടിപ്പിച്ചത്. ഉച്ചകോടിയുടെ രണ്ടാം ദിവസം പ്രക്ഷോഭകര്‍ ഉച്ചകോടി നടക്കുന്ന വേദിയിലേക്ക് തങ്ങളെയും പങ്കെടുപ്പിക്കണമെന്ന ആവശ്യപ്പെട്ട് ഇരച്ചുകയറിയിരുന്നു.

ഉഷ്ണമേഖലാ പ്രദേശമായ ബ്രസീലിലെ 30 ഡിഗ്രി താപനിലയിലാണ്് ഇവരുടെ പ്രതിഷേധം. ബ്രസീലിന്റെ നാഷനല്‍ ഇന്‍സ്റ്റിറ്റ്യൂട്ട് ഓഫ് മീറ്റിയോറോളജിയുടെ പ്രവചനം അനുസരിച്ച് നാളെ 35 ഡിഗ്രി സെല്‍ഷ്യസ് ആണ് ബെലേമിലെ താപനില. വന നശീകരണത്തില്‍ നിന്നും ഫോസില്‍ ഇന്ധനങ്ങളില്‍ നിന്നുമുള്ള മാറ്റത്തിനുള്ള റോഡ് മാപ് കോപ് 30 ഉച്ചകോടിയില്‍ തയാറാക്കുമെന്ന് ബ്രസീല്‍ പരിസ്ഥിതി മന്ത്രി മരിന സില്‍വ പറഞ്ഞു.

നമ്മുടെ മണ്ണും കാടും ഉപഭോഗവസ്തുക്കളല്ല. പ്രകൃതിയെ ബഹുമാനിക്കണമെന്നും ജനങ്ങള്‍ കാട്ടില്‍ തന്നെ താമസിക്കട്ടെയെന്നും അവര്‍ പറഞ്ഞു.

രണ്ടാഴ്ച നീണ്ടു നില്‍ക്കുന്നതാണ് കോപ് 30 ഉച്ചകോടി. ശനിയാഴ്ച ഉച്ചകോടി വേദിക്കു പുറത്ത് കനത്ത സുരക്ഷാ ക്രമീകരണമാണ് ഒരുക്കിയത്. സൈനിക പൊലിസ് പ്രക്ഷോഭരെ നേരിടാന്‍ സായുധ സജ്ജരായിരുന്നു. എന്നാല്‍ പ്രക്ഷോഭകര്‍ ആ ഭാഗത്തേക്ക് വന്നില്ല. അവര്‍ പാട്ടും നൃത്തവുമായി സമാധാനപരമായി പിരിഞ്ഞു പോയി.

English Summary: Thousands march in Belém, Brazil, during the COP30 climate summit, urging governments to halt fossil fuel support and take action to save the planet.