കാലവർഷത്തിനു മുന്നോടിയായി തുടർച്ചയായ മഴ തുടരുന്നു

കേരളത്തിൽ ഇന്നലെ രാത്രി തുടങ്ങിയ മഴ രാവിലെയും വിവിധ പ്രദേശങ്ങളിൽ തുടരുന്നു. വടക്കൻ ജില്ലകളിൽ ഇന്നലെ വൈകിട്ട് തുടങ്ങിയ മഴ രാവിലെ തുടരുകയാണ്. മലപ്പുറം, കോഴിക്കോട്, വയനാട്, കാസർകോട് ജില്ലകളിലാണ് മഴ തുടരുന്നത്.

രാവിലത്തെ ഉപഗ്രഹ ചിത്രങ്ങളിൽ അറബിക്കടൽ മേഖലയിൽ മേഘങ്ങൾ രൂപപ്പെടുകയും മഴ ലഭിക്കുകയും ചെയ്യുന്നുണ്ട്. ഇതിൻറെ ഒരു ഭാഗമാണ് കേരളത്തിന് മുകളിൽ മഴ നൽകുന്നത്. കന്യാകുമാരി കടലിൻ്റെ മുകളിൽ രൂപപ്പെട്ട ചക്രവാത ചുഴിയും മാന്നാർ കടലിടുക്ക് മുതൽ കേരളത്തിന്റെ മുകളിലൂടെ കർണാടകയിലേക്ക് പോകുന്ന ന്യൂനമർദ പാത്തിയും ആണ് മഴ മഴക്ക് കാരണം.

രണ്ടുമൂന്നു ദിവസത്തിനകം കാലവർഷക്കാറ്റ് അറബിക്കടലിന്റെ തെക്കു കിഴക്കൻ മേഖലയിൽ എത്താനും സാധ്യതയുണ്ട്. കേരളം, ലക്ഷദ്വീപ് സ്ഥിതിചെയ്യുന്ന തീരപ്രദേശമാണിത്. മെയ് 26 നാണ് കാലവർഷം കേരളത്തിൽ എത്താൻ സാധ്യതയെന്ന് കാലാവസ്ഥ വകുപ്പ് പ്രവചിച്ചത്.

ഇന്നലെ ലഭിച്ച ശക്തമായ മഴയിലും കാറ്റിലും കേരളത്തിൽ വ്യാപക നാശനഷ്ടം ഉണ്ടായി. കോഴിക്കോട് ജില്ലയിൽ കൂടരഞ്ഞിക്കടുത്ത് കൂമ്പാറയിൽ മിന്നലേറ്റ ഒരാൾ മരിച്ചു. ജയ്സൺ ആണ് മരിച്ചത്. രണ്ടുപേർക്ക് പരിക്കേറ്റു. കൂമ്പാറ ഇളംപുള്ളിൽ ജെയ്സൺ (54) ആണ് മരിച്ചത്. വീടിന് സമീപമുള്ള കോഴി ഫാമിൽ ജോലി ചെയ്യുന്നതിനിടെയാണ് ജെയ്സൺ അപകടത്തിൽപ്പെട്ടത്.

നായർകുഴിയിൽ ഇന്നത്തെ ഇടിമിന്നലിൽ ഇളകിയ ഇൻ്റർലോക്ക് - Photo : Dnz

കോഴിക്കോട് നായർകുഴിയിൽ ഇന്നത്തെ ഇടിമിന്നലിൽ നിലത്ത് വിരിച്ച ഇന്റർലോക്ക് ഇളകി പുറത്തുവന്നു. വീട്ടിലെ ലൈറ്റുകളും ഫാനും സ്വിച്ച് ബോർഡ് എന്നിവ നശിച്ചു.

English Summary: Pre-Monsoon Rains Lashed Kerala Causing Casualties and Widespread Damage. Heavy, continuous rainfall has been lashing various parts of Kerala since last night, particularly affecting the northern districts like Malappuram, Kozhikode, Wayanad, and Kasaragod.