വോട്ടെടുപ്പ് ദിനം വരണ്ട ദിനം, മഴ മാറി നിന്നത് ആശ്വാസമായി, വ്യാഴാഴ്ചയും മഴയില്ല

തദ്ദേശ തിരഞ്ഞെടുപ്പിൽ സംസ്ഥാനത്തെ ഏഴു ജില്ലകളിൽ ഇന്ന് രാവിലെ 7 മണിയോടെ വോട്ടെടുപ്പ് ആരംഭിച്ചു. തിരുവനന്തപുരം മുതൽ എറണാകുളം വരെയുള്ള ജില്ലകളിലാണ് ആദ്യഘട്ട വോട്ടെടുപ്പ് നടക്കുന്നത്. രാവിലെ തന്നെ പോളിങ് ബൂത്തുകളിൽ വോട്ടര്‍മാരുടെ നീണ്ട നിരയാണുള്ളത്. വോട്ടെടുപ്പ് ദിവസം മഴമാറിനിന്നത് ആശ്വാസമായി. വരണ്ട കാലാവസ്ഥയാണ് തെക്കൻ ജില്ലകളിലും വടക്കൻ ജില്ലകളിലും പകൽ അനുഭവപ്പെട്ടത്. സംസ്ഥാനത്ത് ഇന്നും ശക്തമായ മഴയ്ക്ക് ശമനമെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകിയിരുന്നു. അടുത്ത നാല് ദിവസത്തേയ്ക്ക് ഒരു ജില്ലയിലും പ്രത്യേക മുന്നറിയിപ്പുകൾ നൽകിയിട്ടില്ല. അതേസമയം വിവിധ ജില്ലകളിൽ ഒറ്റപ്പെട്ട മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. അതേസമയം ഇനിയുള്ള ദിവസങ്ങളിൽ മാനം തെളിഞ്ഞ് വെയിൽ ദിനങ്ങളാകുമെന്നുമാണ് കാലാവസ്ഥാ പ്രവചനം.

വടക്കൻ കേരളത്തിൽ ഇന്ന് കൊട്ടികലാശം

തിരുവനന്തപുരം മുതല്‍ എറണാകുളം വരെയുള്ള ഏഴുജില്ലകള്‍ ചൊവ്വാഴ്ച തദ്ദേശ തെരഞ്ഞെടുപ്പില്‍ വിധിയെഴുതുമ്പോള്‍ തൃശൂര്‍, മലപ്പുറം, പാലക്കാട്, കോഴിക്കോട്, വയനാട്, കണ്ണൂര്‍, കാസര്‍കോടുവരെയുള്ള ഏഴ് ജില്ലകളില്‍ പരസ്യപ്രചാരണത്തിന് വൈകിട്ട് കൊട്ടിക്കലാശമാകും. മഴമാറി നിന്നത് കൊട്ടിക്കലാശത്തിന് ആശ്വാസമാകും.

വടക്കൻ കേരളത്തിൽ ഇടിമിന്നലോട് കൂടിയ മഴയ്ക്ക് സാധ്യതയില്ല എന്നാണ് കലാവസ്ഥാ വകുപ്പ് അറിയിച്ചിരിക്കുന്നത്. വരുന്ന അഞ്ച് ദിവസം വരണ്ട അന്തരീക്ഷ സ്ഥിതിയായിരിക്കും വടക്കൻ കേരളത്തിൽ സാധ്യമാവുക എന്നും കാലാവസ്ഥാ വകുപ്പ് അറിയിച്ചിട്ടുണ്ട്. പകൽ താപനില ഉയരും. രാത്രി താപനില കുറയും. വടക്കൻ കേരളം ഉൾപ്പെടെ ഉത്തരേന്ത്യൻ അതിമർദത്തിന്റെ പിടിയിലാണ്.

തെക്കൻ കേരളത്തിൽ ചാറ്റൽ മഴ

തിരുവനന്തപുരം, പത്തനംതിട്ട, കൊല്ലം, ഇടുക്കി ജില്ലകളിൽ ഇന്ന് ചാറ്റൽ മഴയ്ക്ക് സാധ്യത ഉണ്ടെന്നാണ് കാലാവസ്ഥാ വകുപ്പ് മുന്നറിയിപ്പ് നൽകിയിരിക്കുന്നത്.

ആദ്യ മണിക്കൂറുകളിൽ മികച്ച പോളിങ്

അതേസമയം വോട്ടെടുപ്പിന്‍റെ ആദ്യ മണിക്കൂറുകളിൽ മികച്ച പോളിങ് ആണ് രേഖപ്പെടുത്തിയത്. വൈകിട്ട് ആറു മണിവരെയാണ് വോട്ടെടുപ്പ്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലെ 595 തദ്ദേശ സ്ഥാപനങ്ങളിലേക്കാണ് വോട്ടെടുപ്പ് നടക്കുന്നത്. മൂന്ന് കോർപ്പറേഷനുകൾ 39 മുൻസിപ്പാലിറ്റികൾ, ഏഴ് ജില്ലാ പഞ്ചായത്തുകൾ, 75 ബ്ലോക്ക് പഞ്ചായത്തുകൾ, 471 ഗ്രാമപഞ്ചായത്തുകൾ എന്നിവിടങ്ങളിലേക്കാണ് ഇന്ന് ജനവിധി.

English Summary : Discover the latest updates on the local elections across seven districts in Kerala, including weather forecasts and campaign highlights for the upcoming vote