സംസ്ഥാനത്ത് ചൂട് കനക്കുന്നു; തൊഴിലാളികൾക്ക് സൂര്യാഘാതമേറ്റു

സംസ്ഥാനത്ത് താപനില കൂടുന്നു. പാലക്കാട് സാധാരണയേക്കാൾ 4.7 ഡിഗ്രി സെൽഷ്യസ് അധികം താപനില രേഖപ്പെടുത്തിയപ്പോൾ കോട്ടയത്ത് 4.2 ഡിഗ്രി സെൽഷ്യസ് അധികം ചൂട് അനുഭവപ്പെട്ടു. കോട്ടയം ജില്ലയിലെ വിവിധ ഭാഗങ്ങളിൽ വെയിലത്ത് ജോലി ചെയ്യുന്ന തൊഴിലാളികൾക്ക് സൂര്യാഘാതമേറ്റു. കൈത്തണ്ടയിൽ കരുവാളിപ്പ് ഉൾപ്പെടെയുള്ള അസ്വസ്ഥതകളുമായി ആശുപത്രിയിലെത്തിയ തൊഴിലാളികൾക്ക് പകൽ 11 മുതൽ ഉച്ചയ്ക്ക് ശേഷം മൂന്ന് വരെ നേരിട്ട് വെയിലേൽക്കാത്ത തരത്തിൽ ജോലി ക്രമീകരിക്കാൻ നിർദേശം നൽകി.

മീനച്ചിൽ താലൂക്കിലെ പോണാട്, അല്ലപ്പാറ, വലവൂർ, കുടക്കച്ചിറ തുടങ്ങിയ പ്രദേശങ്ങളിലും തൊഴിലാളികൾക്ക് നേരിയ തോതിൽ സൂര്യാഘാതമേറ്റതായി റിപ്പോർട്ടുണ്ട്.

'Godzilla' El Niño Threatens India's Winter: ഇന്ത്യയുടെ ശൈത്യകാലം ഇനി ചൂടുകാലമാകുമോ? വരുന്നത് ഗോഡ്സില്ല’ എൽനിനോ?
എൽ നിനോയിൽ ഭയതിരിക്കുകയാണ് ലോകം. പസഫിക് സമുദ്രത്തിൽ ശക്തിപ്രാപിക്കുന്ന അതിതീവ്ര എൽനിനോ ഇന്ത്യയുടെ വരാനിരിക്കുന്ന ശൈത്യകാലത്തെ(winter,) വലിയ രീതിയിൽ
https://metbeatnews.com/rising-temperatures-agriculture-risks-climate-impact

ജാഗ്രതാ നിർദ്ദേശങ്ങൾ പാലിക്കുക

സംസ്ഥാനത്ത് പൊതുവെ ചൂട് വർധിക്കുന്ന സാഹചര്യത്തിൽ സംസ്ഥാന ദുരന്ത നിവാരണ അതോറിറ്റി പൊതുജനങ്ങൾക്കായി ജാഗ്രതാ നിർദേശങ്ങൾ പുറപ്പെടുവിച്ചു. പകൽ 11 മുതൽ ഉച്ചയ്ക്ക് ശേഷം മൂന്ന് വരെ നേരിട്ട് സൂര്യപ്രകാശം ഏൽക്കുന്നത് പരമാവധി ഒഴിവാക്കണം. ദാഹമില്ലെങ്കിലും ഇടയ്ക്കിടെ വെള്ളം കുടിക്കണം. മദ്യം, കാപ്പി, ചായ, കാർബണേറ്റഡ് സോഫ്റ്റ് ഡ്രിങ്കുകൾ തുടങ്ങിയ നിർജലീകരണത്തിന് കാരണമാകുന്ന പാനീയങ്ങൾ പകൽ സമയത്ത് ഒഴിവാക്കണമെന്നും നിർദേശമുണ്ട്.

അയഞ്ഞതും ഇളം നിറത്തിലുള്ളതുമായ കോട്ടൺ വസ്ത്രങ്ങൾ ധരിക്കണം. പുറത്തിറങ്ങുമ്പോൾ പാദരക്ഷകൾ, കുട, തൊപ്പി എന്നിവ ഉപയോഗിക്കണം. പഴങ്ങളും പച്ചക്കറികളും ധാരാളമായി കഴിക്കുകയും ORS ലായനി, സംഭാരം തുടങ്ങിയവ ഉപയോഗിക്കുകയും ചെയ്യാം.

മാർക്കറ്റുകൾ, കെട്ടിടങ്ങൾ, മാലിന്യശേഖരണ-നിക്ഷേപ കേന്ദ്രങ്ങൾ തുടങ്ങിയ ഇടങ്ങളിൽ തീപിടിത്ത സാധ്യത കൂടുതലായതിനാൽ ഫയർ ഓഡിറ്റും സുരക്ഷാ മുൻകരുതലുകളും ഉറപ്പാക്കണം. വനമേഖലയോട് ചേർന്ന് താമസിക്കുന്നവരും വിനോദസഞ്ചാരികളും കാട്ടുതീ സാധ്യത കണക്കിലെടുത്ത് ജാഗ്രത പാലിക്കണം.

വിദ്യാഭ്യാസ സ്ഥാപനങ്ങളിൽ ശുദ്ധമായ കുടിവെള്ളവും ക്ലാസ് മുറികളിൽ മതിയായ വായുസഞ്ചാരവും ഉറപ്പാക്കണം. കുട്ടികൾക്ക് കൂടുതൽ നേരം വെയിലേൽക്കുന്ന അസംബ്ലികളും മറ്റ് പരിപാടികളും ഒഴിവാക്കുകയോ സമയക്രമീകരണം നടത്തുകയോ വേണം. അംഗൻവാടി കുട്ടികൾക്കും ചൂട് ഏൽക്കാത്ത തരത്തിലുള്ള സംവിധാനങ്ങൾ ഉറപ്പാക്കണം.

കിടപ്പുരോഗികൾ, പ്രായമായവർ, ഗർഭിണികൾ, കുട്ടികൾ, ഭിന്നശേഷിക്കാർ, മറ്റ് രോഗങ്ങളാൽ അവശത അനുഭവിക്കുന്നവർ എന്നിവർ പകൽ 11 മുതൽ മൂന്ന് വരെ നേരിട്ട് വെയിലേൽക്കുന്നത് ഒഴിവാക്കണം. നിർമാണത്തൊഴിലാളികൾ, കർഷകത്തൊഴിലാളികൾ, വഴിയോരക്കച്ചവടക്കാർ, ഓൺലൈൻ ഭക്ഷണ വിതരണക്കാർ തുടങ്ങിയവർ ജോലി സമയം ക്രമീകരിക്കുകയും ആവശ്യമായ വിശ്രമവും കുടിവെള്ളവും ഉറപ്പാക്കുകയും വേണം.

മാധ്യമപ്രവർത്തകരും പോലീസ് ഉദ്യോഗസ്ഥരും ഉൾപ്പെടെ പകൽ സമയത്ത് പുറത്ത് ജോലി ചെയ്യുന്നവരും കുട ഉപയോഗിക്കുകയും നേരിട്ട് വെയിലേൽക്കുന്നത് ഒഴിവാക്കുകയും വേണം. പൊതുപരിപാടികളും സമ്മേളനങ്ങളും കഴിയുന്നതും പകൽ 11 മുതൽ മൂന്ന് വരെ ഒഴിവാക്കണമെന്നും നടത്തേണ്ടിവന്നാൽ ആവശ്യമായ കുടിവെള്ളവും തണലും ഉറപ്പാക്കണമെന്നും ദുരന്ത നിവാരണ അതോറിറ്റി നിർദേശിച്ചു.

ഉച്ചവെയിലിൽ കന്നുകാലികളെ മേയാൻ വിടുന്നതും വളർത്തുമൃഗങ്ങളെ വെയിലത്ത് കെട്ടിയിടുന്നതും ഒഴിവാക്കണം. കുട്ടികളെയോ വളർത്തുമൃഗങ്ങളെയോ പാർക്ക് ചെയ്ത വാഹനങ്ങളിൽ ഇരുത്തി പോകരുതെന്നും മുന്നറിയിപ്പുണ്ട്. അസ്വസ്ഥതകൾ അനുഭവപ്പെട്ടാൽ ഉടൻ വിശ്രമിക്കുകയും വൈദ്യസഹായം തേടുകയും വേണം.

കാലാവസ്ഥാ വകുപ്പിന്റെയും സംസ്ഥാന ദുരന്ത നിവാരണ അതോറിറ്റിയുടെയും ഔദ്യോഗിക മുന്നറിയിപ്പുകൾ ശ്രദ്ധിക്കുകയും നിർദേശങ്ങൾ കർശനമായി പാലിക്കുകയും ചെയ്യണമെന്നും അധികൃതർ അറിയിച്ചു.

English Summary : Rising Temperatures & Sunstroke Incidents Kerala is experiencing a severe spike in daily temperatures, with Palakkad recording 4.7°C and Kottayam recording 4.2°C above normal levels. Several outdoor workers in Kottayam (including Ponad, Allappara, Valavoor, and Kudakkachira in Meenachil taluk) have suffered from mild sunstroke and skin burn symptoms.