പാകിസ്ഥാനിലെ പഞ്ചാബ് പ്രവിശ്യയിൽ വെള്ളപ്പൊക്കം വ്യാപകമായതിനെ തുടർന്ന് ഇരുപത് ലക്ഷത്തിലധികം ആളുകളെ ഒഴിപ്പിച്ചതായി അധികൃതർ അറിയിച്ചു.

സിന്ധ് പ്രവിശ്യയിൽ നിന്ന് 150,000 പേരെ കൂടി ഒഴിപ്പിച്ചതായി ദേശീയ ദുരന്ത നിവാരണ മേധാവി ഇനാം ഹൈദർ മാലിക് വ്യാഴാഴ്ച മാധ്യമപ്രവർത്തകരോട് പറഞ്ഞു, "വരും ദിവസങ്ങളിൽ ഈ സംഖ്യ വർദ്ധിച്ചേക്കാം" എന്ന് മുന്നറിയിപ്പ് നൽകിയിട്ടുണ്ട്.

ജൂൺ അവസാനം മുതൽ രാജ്യവ്യാപകമായി മൺസൂൺ മഴയിൽ 900 ൽ അധികം ആളുകൾ കൊല്ലപ്പെട്ടതായി ഇന്റർനാഷണൽ മെഡിക്കൽ കോർപ്‌സിന്റെ വെള്ളിയാഴ്ചത്തെ അപ്‌ഡേറ്റ് പറയുന്നു.

കനത്ത മഴ കാരണം നദികൾ കരകവിഞ്ഞൊഴുകുന്നതിനാൽ വെള്ളപ്പൊക്കം കൂടുതൽ വഷളായി. കൂടാതെ മെച്ചപ്പെട്ട മുന്നറിയിപ്പ് സംവിധാനങ്ങളും അടിസ്ഥാന സൗകര്യങ്ങളും പോലുള്ള ദുരന്ത ലഘൂകരണത്തിൽ സർക്കാറിന് വീഴ്ച സംഭവിച്ചെന്നും ജനങ്ങൾ കുറ്റപ്പെടുത്തി.

നിരവധി വീടുകളും കൃഷിയിടങ്ങളും വെള്ളപ്പൊക്കത്തിൽ നശിച്ചു. മഴക്കെടുതി മൂലം ദുരിതം അനുഭവിക്കുന്നവരിൽ 40% പേരും ദാരിദ്ര്യരേഖയ്ക്ക് താഴെയാണ് ജീവിക്കുന്നത്.

വെള്ളപ്പൊക്ക സാധ്യത ഉണ്ടായിരുന്നിട്ടും നിരവധി കുടുംബങ്ങൾ തങ്ങളുടെ സ്വത്ത് സംരക്ഷിക്കാൻ വീട്ടിൽ തന്നെ തുടരാൻ തീരുമാനിച്ചതായി പഞ്ചാബിലെ വെള്ളപ്പൊക്ക ബാധിത പ്രദേശങ്ങളിലെ താമസക്കാർ കഴിഞ്ഞ മാസം ബിബിസിയോട് പറഞ്ഞു.

ഗ്രാമീണരെയും അവരുടെ കന്നുകാലികളെയും ബോട്ടുകളിൽ മാറ്റിപ്പാർപ്പിക്കാൻ രക്ഷാപ്രവർത്തകർക്ക് വീടുതോറും പോകേണ്ടിവന്നു. ചെറിയ ബോട്ടുകൾക് ശക്തമായ ഒഴുക്കിന് നേരിടാൻ സാധിക്കാത്തതിനാൽ അപകടകരമായ സാഹചര്യങ്ങൾ നിരവധിയുണ്ടായെന്നും ഉദ്യോഗസ്ഥർ പറഞ്ഞു. ചൊവ്വാഴ്ച സിന്ധു നദിയിൽ വെള്ളപ്പൊക്ക ബാധിതരെ വഹിച്ചുകൊണ്ടിരുന്ന ഒരു രക്ഷാ ബോട്ട് മറിഞ്ഞ് ഒമ്പത് പേർ മരിച്ചു. ദിവസങ്ങൾക്ക് മുമ്പ്, ജലാൽപൂർ പിർവാല നഗരത്തിന്റെ പ്രാന്തപ്രദേശത്ത് സമാനമായ ഒരു സംഭവത്തിൽ അഞ്ച് പേർ മരിച്ചു.

അതേസമയം ഇന്ത്യയിലും വെള്ളപ്പൊക്കം നാശം വിതച്ചു. കുറഞ്ഞത് 30 പേരുടെ മരണത്തിനിടയാക്കുകയും 354,000-ത്തിലധികം ആളുകളെ ബാധിക്കുകയും ചെയ്തു.

പഞ്ചാബിലെ വെള്ളപ്പൊക്കബാധിത പ്രദേശങ്ങളിലേക്ക് പുതപ്പുകൾ, ടെന്റുകൾ, ജലശുദ്ധീകരണ ഉപകരണങ്ങൾ എന്നിവയുൾപ്പെടെ ടൺ കണക്കിന് ദുരിതാശ്വാസ സാമഗ്രികൾ എത്തിച്ചതായി പാകിസ്ഥാന്റെ ദേശീയ ദുരന്ത നിവാരണ അതോറിറ്റി പറയുന്നു.

നിരവധി ഗ്രാമങ്ങളിലും വയലുകളിലും വെള്ളം ഇപ്പോഴും നിറഞ്ഞുനിൽക്കുന്നതിനാൽ സാധാരണ രീതിയിൽ ജനജീവിതം എത്താൻ ആഴ്ചകൾ എടുക്കുമെന്നും ഉദ്യോഗസ്ഥർ പറഞ്ഞു. ഈ ആഴ്ച, പാകിസ്ഥാന്റെ വെള്ളപ്പൊക്ക പ്രതികരണത്തെ പിന്തുണയ്ക്കാൻ യുഎൻ 5 മില്യൺ ഡോളർ അനുവദിച്ചു.

അതേസമയം യുഎസ് സ്റ്റേറ്റ് ഡിപ്പാർട്ട്മെന്റ് ധനസഹായം അംഗീകരിക്കുകയും ദുരന്ത നിവാരണ ഉദ്യോഗസ്ഥരെ വിന്യസിക്കുകയും ചെയ്തു. ട്രംപിന്റെ രണ്ടാം ഭരണകാലത്ത് ഇത്തരത്തിലുള്ള ആദ്യ സഹായമാണിതെന്ന് എബിസി റിപ്പോർട്ട് ചെയ്തു.

2022-ൽ, പാകിസ്ഥാനിൽ മാസങ്ങളോളം നീണ്ടുനിന്ന കനത്ത മഴയിൽ 1,700-ലധികം പേർ കൊല്ലപ്പെടുകയും 30 ദശലക്ഷത്തിലധികം ആളുകളെ ബാധിക്കുകയും ചെയ്തു. ചരിത്രത്തിലെ ഏറ്റവും മാരകമായ വെള്ളപ്പൊക്ക സംഭവങ്ങളിലൊന്നായി ഇത് മാറി.

വെള്ളപ്പൊക്കത്തിന്റെ ഏറ്റവും പുതിയ തരംഗങ്ങൾക്കിടയിൽ, പാകിസ്ഥാൻ അധികൃതർ ഈ ആഴ്ച കാലാവസ്ഥാ അടിയന്തരാവസ്ഥ പ്രഖ്യാപിച്ചു. കാലാവസ്ഥാ വ്യതിയാനം ഉയർത്തുന്ന വെല്ലുവിളികളെ നേരിടാൻ 300 ദിവസത്തെ പദ്ധതി തയ്യാറാക്കാൻ പ്രധാനമന്ത്രി ഷെഹ്ബാസ് ഷെരീഫ് ഉദ്യോഗസ്ഥരോട് ഉത്തരവിട്ടു.

Metbeat news