തിരുവനന്തപുരത്ത് അതിശക്തമായ മഴ; രാത്രി ഓറഞ്ച് അലർട്ട്, വീടുകളിൽ വെള്ളം കയറി

തലസ്ഥാനത്ത് അതിശക്തമായ മഴ തുടരുന്നു. മഴയുടെ പശ്ചാത്തലത്തിൽ ജില്ലയിൽ ഇന്ന് രാത്രി ഓറഞ്ച് അലർട്ട് പ്രഖ്യാപിച്ചു. മലയോര, തീരദേശ മേഖലകളിൽ കനത്ത മഴയെ തുടർന്ന് പലയിടത്തും വീടുകളിൽ വെള്ളം കയറി. വിതുര, പൊൻമുടി മേഖലകളിലാണ് ശക്തമായ മഴ തുടരുന്നത്.

വാമനപുരം നദിയുടെ പോഷകനദിയായ മക്കിയാർ കരകവിഞ്ഞൊഴുകുകയാണ്. നദിയിലെ ജലനിരപ്പും ഉയർന്നിട്ടുണ്ട്. മക്കി, മരുതാമല, പേപ്പാറ, ആനപ്പാറ തുടങ്ങിയ മേഖലകളിൽ വീടുകളിൽ വെള്ളം കയറാൻ സാധ്യതയുള്ളതിനാൽ അധികൃതർ ജാഗ്രതാ നിർദേശം നൽകി.

Munnar Weather Alert : മഴ കനത്താൽ പാറ വീഴാൻ സാധ്യത; മൂന്നാറിലേക്കുള്ള യാത്രയ്ക്ക് നിയന്ത്രണം
മൂന്നാറിലേക്കുള്ള വഴിയിൽ വൻപാറ അടർന്നു വീഴാറായ നിലയിൽ കണ്ടെത്തിയതിനെ തുടർന്ന് ഗതാഗതം വഴിതിരിച്ചുവിടുന്നു.
https://metbeatnews.com/munnar-traffic-diverted-due-to-dangerous-boulders

വിതുര പഞ്ചായത്തിലെ മണിതൂക്കി, മരുതാമല വാർഡുകളിൽ വെള്ളം കയറിയ വീടുകളിൽ താമസിച്ചിരുന്നവരെ സുരക്ഷിതമായ മറ്റ് വീടുകളിലേക്ക് മാറ്റിപ്പാർപ്പിച്ചു. പേപ്പാറ ഡാമിന്റെ റിസർവോയറിൽനിന്നുള്ള വെള്ളം റോഡിലേക്ക് കയറിയതോടെ പേപ്പാറ പൊടിയക്കാല ആദിവാസി ഊരിലേക്കുള്ള വഴികൾ പൂർണമായും വെള്ളത്തിനടിയിലായി. ഇതോടെ പൊടിയക്കാല ഊര് ഒറ്റപ്പെട്ട അവസ്ഥയിലാണ്.

വാമനപുരം നദിയിലെ ജലനിരപ്പ് ഉയർന്നതിനെ തുടർന്ന് രണ്ട് ചെറുപാലങ്ങളും വെള്ളത്തിനടിയിലായി. മേഖലയിലെ ചെറിയ തോടുകളും കരകവിഞ്ഞൊഴുകുകയാണ്.

ആറ് ജില്ലകളിൽ യെല്ലോ അലർട്ട്

തിരുവനന്തപുരത്ത് ഓറഞ്ച് അലർട്ട് തുടരുന്നതിനൊപ്പം കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിൽ യെല്ലോ അലർട്ടും പ്രഖ്യാപിച്ചിട്ടുണ്ട്. നാളെ സംസ്ഥാനത്തെ പത്ത് ജില്ലകളിൽ യെല്ലോ അലർട്ടായിരിക്കുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.

കനത്ത മഴ തുടരുന്ന സാഹചര്യത്തിൽ മലയോര മേഖലകളിലേക്കുള്ള യാത്രകൾ ഒഴിവാക്കണമെന്ന് അധികൃതർ നിർദേശിച്ചു. നദിക്കരകളിലും താഴ്ന്ന പ്രദേശങ്ങളിലും താമസിക്കുന്നവർ അതീവ ജാഗ്രത പാലിക്കണമെന്നും മുന്നറിയിപ്പുണ്ട്.

English Summary : Continuous heavy downpours have triggered an Orange Alert for Thiruvananthapuram district, with severe flooding reported in hilly and coastal regions. The Makkiyar tributary of the Vamanapuram river is overflowing, submerging small bridges and cutting off the Podiyakkala tribal settlement near Peppara.