അറബിക്കടലിൽ ന്യൂനമർദം; ബംഗാൾ ഉൾക്കടലിൽ ചുഴലിക്കാറ്റ് ഭീഷണി, കേരളത്തിൽ അതിതീവ്ര മഴയ്ക്ക് സാധ്യത

തെക്കുകിഴക്കൻ അറബിക്കടലിലും അതിനോട് ചേർന്ന ലക്ഷദ്വീപിനും മുകളിലായി ന്യൂനമർദ്ദം സ്ഥിതിചെയ്യുന്നു. ഒക്ടോബർ 25, 26 തീയതികളിൽ സംസ്ഥാനത്ത് ഒറ്റപ്പെട്ട സ്ഥലങ്ങളിൽ അതിതീവ്ര മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഒക്ടോബർ 24 മുതൽ 27 വരെ ഇടിമിന്നലോടുകൂടിയ മഴയ്ക്കും മണിക്കൂറിൽ 30–40 കിലോമീറ്റർ വേഗതയിൽ ശക്തമായ കാറ്റിനും സാധ്യതയുണ്ട്.

തെക്കുകിഴക്കൻ അറബിക്കടലിലും സമീപ ലക്ഷദ്വീപ് മേഖലയിലും ന്യൂനമർദം സ്ഥിതിചെയ്യുകയാണ്. ഇതുമായി ബന്ധപ്പെട്ട ചക്രവാതച്ചുഴിയിൽനിന്ന് കേരളത്തിലൂടെ വടക്കൻ തമിഴ്‌നാട് തീരം വരെ ന്യൂനമർദ പാത്തിയും (Trough) നിലനിൽക്കുന്നു. ഇതിന്റെ സ്വാധീനത്തിൽ കേരളത്തിൽ ശക്തമായ മഴയ്ക്കുള്ള സാഹചര്യം തുടരുകയാണ്.

ബംഗാൾ ഉൾക്കടലിൽ ചുഴലിക്കാറ്റ് രൂപപ്പെടാൻ സാധ്യത

മധ്യകിഴക്കൻ ബംഗാൾ ഉൾക്കടലിലും സമീപ തെക്കുകിഴക്കൻ ബംഗാൾ ഉൾക്കടലിലും ശക്തി കൂടിയ ന്യൂനമർദം തുടരുകയാണ്. ഇത് ഒക്ടോബർ ഇന്ന് തീവ്രന്യൂനമർദമായും ഒക്ടോബർ 25-ന് അതിതീവ്ര ന്യൂനമർദമായും (Deep Depression) ശക്തിപ്രാപിക്കാൻ സാധ്യതയുണ്ട്. തുടർന്ന് ഒക്ടോബർ 26-ന് രാവിലെ മധ്യപടിഞ്ഞാറൻ ബംഗാൾ ഉൾക്കടലിൽ ചുഴലിക്കാറ്റായി മാറിയേക്കുമെന്നാണ് കാലാവസ്ഥാ പ്രവചനം.

പടിഞ്ഞാറ്-വടക്കുപടിഞ്ഞാറൻ ദിശയിൽ നീങ്ങുന്ന സംവിധാനം കൂടുതൽ ശക്തിപ്രാപിച്ച് ഒക്ടോബർ 28-ന് രാവിലെ ആന്ധ്രാപ്രദേശ് തീരത്തിന് സമീപം മധ്യപടിഞ്ഞാറൻ ബംഗാൾ ഉൾക്കടലിൽ എത്തിച്ചേരാനും സാധ്യതയുണ്ട്.

കേരളത്തിൽ രണ്ട് ദിവസം അതിതീവ്ര മഴയ്ക്ക് സാധ്യത

ബംഗാൾ ഉൾക്കടലിലെ ശക്തമായ കാലാവസ്ഥാ സംവിധാനത്തിന്റെയും അറബിക്കടലിലെ ന്യൂനമർദത്തിന്റെയും പശ്ചാത്തലത്തിൽ കേരളത്തിൽ വരും ദിവസങ്ങളിൽ മഴ ശക്തമാകാനിടയുണ്ട്. ഒക്ടോബർ 25, 26 തീയതികളിലാണ് ഒറ്റപ്പെട്ട സ്ഥലങ്ങളിൽ അതിതീവ്ര മഴയ്ക്ക് സാധ്യത.

English Summary : The India Meteorological Department (IMD) has issued a high-alert weather warning due to dual atmospheric disturbances: a low-pressure system over the southeast Arabian Sea near Lakshadweep and a rapidly intensifying deep depression over the Bay of Bengal.