ഒമാന്റെ തനത് വാഴ ഇനം റസാത്തിന്, അന്താരാഷ്ട്ര അംഗീകാരം

ഒമാന്റെ തനത് വാഴ ഇനമായ റസാത്തിന് അന്താരാഷ്ട്ര അംഗീകാരം ലഭിച്ചിരിക്കുന്നു. പുതിയ സസ്യ ഇനങ്ങളുടെ സംരക്ഷണത്തിനായുള്ള അന്താരാഷ്ട്ര സംഘടനയുടെ പട്ടികയിലാണ് റസാത്ത് വാഴ ഇടം നേടിയത്. ഒമാന്റെ കാർഷിക തലത്തിൽ നിർണായകമായ നേട്ടമാണിതെന്ന് അധികൃതർ പറഞ്ഞു. കൃഷി, മത്സ്യബന്ധനം, ജലവിഭവ മന്ത്രാലയത്തിന് കീഴിലെ കാർഷിക, മൃഗ ഗവേഷണ ഡയറക്ടറേറ്റിന്റെ നേതൃത്വത്തിലാണ് റസാത്ത് വാഴയുടെ രജിസ്ട്രേഷൻ നടപടികൾ പൂർത്തിയാക്കിയത്. റോയൽ കോർട്ട് അഫയേഴ്സിന് കീഴിലുള്ള റോയൽ റസാത്ത് ഫാമാണ് വാഴ ഇനം രജിസ്ട്രേഷനായി സമർപ്പിച്ചത്.

സസ്യ ഇനത്തിന്റെ സവിശേഷതകൾ, ഏകീകൃത സ്വഭാവം, സ്ഥിരത എന്നിവ വിശദമായി പരിശോധിച്ച ശേഷമാണ് രജിസ്ട്രേഷൻ അനുവദിച്ചത്. ബന്ധപ്പെട്ട സമിതിയുടെ വിലയിരുത്തലിൽ റസാത്ത് വാഴ ആവശ്യമായ എല്ലാ മാനദണ്ഡങ്ങളും പാലിക്കുന്നതായി കണ്ടെത്തുകയായിരുന്നു.

റസാത്തിന്റെ രജിസ്ട്രേഷൻ ഒരു വാഴ ഇനത്തിന് ലഭിച്ച അംഗീകാരം മാത്രമല്ലെന്നും ഒമാന്റെ തനത് കാർഷിക പൈതൃകത്തെ അന്താരാഷ്ട്രതലത്തിൽ രേഖപ്പെടുത്തുന്ന നടപടിയാണെന്നും മന്ത്രാലയം വ്യക്തമാക്കി. കാർഷിക ഗവേഷണം, ഉൽപാദനം, ജനിതക വിഭവ സംരക്ഷണം, നിയമപരമായ സംരക്ഷണം, നിക്ഷേപം എന്നിവ കൂടുതൽ ശക്തിപ്പെടുത്താനും രജിസ്ട്രേഷൻ സഹായിക്കുമെന്നാണ് വിലയിരുത്തൽ.

നിക്ഷേപ അവസരങ്ങൾ വർധിപ്പിക്കും

ഒമാനിലെ തനത് കാർഷിക ഇനങ്ങൾക്ക് കൂടുതൽ മൂല്യം നൽകുന്നതിനും കാർഷിക മേഖലയിലെ നിക്ഷേപ അവസരങ്ങൾ വർധിപ്പിക്കുന്നതിനും ഇതിലൂടെ വഴിയൊരുങ്ങും. സസ്യ ഇനങ്ങളുടെ സവിശേഷതകൾ ശാസ്ത്രീയമായി രേഖപ്പെടുത്തുന്നതിലൂടെ ഭാവിയിലെ കാർഷിക ഗവേഷണത്തിനും വികസനത്തിനും പ്രയോജനപ്പെടുന്ന വിവരശേഖരവും ഉണ്ടാകും.

പുതിയ സസ്യ ഇനങ്ങളുടെ ഉടമകളുടെ അവകാശ സംരക്ഷണവുമായി ബന്ധപ്പെട്ട 2009ലെ നിയമവും അതിന്റെ അടിസ്ഥാനത്തിൽ പുറപ്പെടുവിച്ച ചട്ടങ്ങളും അനുസരിച്ചാണ് റസാത്ത് വാഴയുടെ രജിസ്ട്രേഷൻ നടപടികൾ പൂർത്തിയാക്കിയത്. ഇതോടെ അന്താരാഷ്ട്രതലത്തിൽ രജിസ്റ്റർ ചെയ്ത ഒമാന്റെ സസ്യ ഇനങ്ങളുടെ പട്ടികയിൽ റസാത്തും ഇടം നേടി.

English Summary : Oman’s indigenous Raszat banana has earned prestigious international recognition by officially entering the registry of the international organization for the protection of new plant varieties. Led by Oman's Ministry of Agriculture, Fisheries and Water Resources along with the Royal Raszat Farm, this registration legally protects Oman’s agricultural heritage, boosts genetic resource conservation, and opens new investment and research opportunities in the agricultural sector.