മഴയിലും തണുപ്പിലും പൊടികാറ്റിലും വലഞ്ഞ് ഒമാനും യുഎഇ യും

യു.എ.ഇയിലും ഒമാനിലും വിവിധ മേഖലകളില്‍ മഴ തുടങ്ങി. ദുബൈ, അബൂദാബി, അല്‍ ഐന്‍, ഷാര്‍ജ, റാസല്‍ ഖൈമ എന്നിവിടങ്ങളില്‍ മഴ ലഭിച്ചു. താപനില 20 ഡിഗ്രിയില്‍ കുറവ് രേഖപ്പെടുത്തി. 10 ഡിഗ്രിവരെ തണുപ്പെത്തും. യു.എ.ഇയില്‍ തീരദേശത്തും വടക്കന്‍ മേഖലയിലും ഇന്ന് താപനില കുറയും. മണിക്കൂറില്‍ 45 കി.മി വേഗതയിലുള്ള കാറ്റിനും സാധ്യതയെന്ന് കാലാവസ്ഥാ വകുപ്പ് അറിയിച്ചു. തെക്കുകിഴക്കു നിന്ന് വടക്കുകിഴക്കും ദിശയിലാണ് കാറ്റുണ്ടാകുക. പൊടിക്കാറ്റിനും ചിലയിടങ്ങളില്‍ സാധ്യതയുണ്ട്. ഇടിയോടു കൂടിയ മഴയുണ്ടാകും. കൂമ്പാര മേഘങ്ങളുടെ സാന്നിധ്യമുണ്ട്. യു.എ.ഇക്കും ഒമാനും പുറമേ, വടക്കുകിഴക്കന്‍ കുവൈത്ത്, ഖത്തര്‍, തെക്കു കിഴക്കന്‍ സൗദി അറേബ്യ എന്നിവിടങ്ങളിലും ഇന്നും നാളെയും മഴ സാധ്യത ഉണ്ട്. ഇറാനില്‍ മഞ്ഞു വീഴ്ചയും ഉണ്ടാകും.

ഒമാനിൽ വ്യത്യസ്ത തീവ്രതയുള്ള മഴ പ്രതീക്ഷിക്കുന്നു

ഒമാനിൽ വിവിധ ഗവര്‍ണറേറ്റുകളില്‍ ഡിസംബര്‍ 20 വരെ അസ്ഥിരമായ കാലാവസ്ഥക്ക് സാധ്യതയുണ്ടെന്ന് സിവിൽ ഏവിയേഷൻ അതോറിറ്റി അറിയിച്ചു. വിവിധ ഗവർണറേറ്റുകളിൽ വ്യത്യസ്ത തീവ്രതയിലുള്ള മഴ പ്രതീക്ഷിക്കുന്നുണ്ട്. കനത്ത മഴക്കും വാദികളിലും താഴ്വരകളിലും വെള്ളപ്പൊക്കത്തിനും സാധ്യതയുണ്ടെന്ന് മുന്നറിയിപ്പിൽ പറയുന്നു.

കാലാവസ്ഥ കൂടുതൽ ശക്തമാകും.

ന്യൂനമർദ്ദത്തിന്‍റെ സ്വാധീനം ഉണ്ടാകുമെന്നാണ് അറിയിപ്പ്. ഇടവിട്ടുള്ള മഴ, ശക്തമായ കാറ്റ്, കുറഞ്ഞ ദൃശ്യപരത എന്നിവയ്ക്ക് കാരണമാകും. വാദികൾ നിറഞ്ഞൊഴുകാൻ സാധ്യതയുണ്ടെന്നും അധികൃതർ മുന്നറിയിപ്പ് നൽകിയിട്ടുണ്ട്. ഇന്നും നാളെയും കാലാവസ്ഥ കൂടുതൽ ശക്തമാകും. ബുറൈമി, വടക്കൻ ബാത്തിന, തെക്കൻ ബാത്തിന ഗവർണറേറ്റുകളിൽ 5–15 മില്ലീമീറ്റർ വരെ മഴ ലഭിച്ചേക്കാം. മണിക്കൂറിൽ 10–30 നോട്ട് വേഗതയിൽ ശക്തമായ വടക്ക്-പടിഞ്ഞാറൻ കാറ്റും ഉണ്ടാകാൻ സാധ്യതയുണ്ട്. ചൊവ്വ മുതൽ വ്യാഴം വരെയുള്ള ദിവസങ്ങളിൽ മുസന്ദം, ബുറൈമി, ബാത്തിന ഗവർണറേറ്റുകളിൽ മഴയും അസ്ഥിരമായ കാലാവസ്ഥയും തുടരും. വെള്ളി, ശനി ദിവസങ്ങളിൽ വടക്കൻ ഗവർണറേറ്റുകളിൽ ഭൂരിഭാഗവും കാലാവസ്ഥാ വ്യതിയാനം ബാധിക്കാൻ സാധ്യതയുണ്ട്.

English Summary : The Civil Aviation Authority warns of unstable weather in Oman until December 20, with varying rainfall intensities and potential flooding in low-lying areas.