നാളെ മുതൽ തുലാവർഷമഴയ്ക്ക് തുടക്കമാകാൻ സാധ്യത; കാലവർഷം പിൻവാങ്ങുന്നു

നാളെ, ഒക്ടോബർ 15 മുതൽ ദക്ഷിണേന്ത്യയിൽ തുലാവർഷമഴയ്ക്ക് തുടക്കമാകാൻ സാധ്യതയുണ്ടെന്ന് കാലാവസ്ഥാ വകുപ്പിന്റെ അറിയിപ്പ്. രാജ്യത്തിന്റെ ശേഷിക്കുന്ന ഭാഗങ്ങളിൽനിന്ന് തെക്കുപടിഞ്ഞാറൻ കാലവർഷം (Southwest Monsoon) പിൻവാങ്ങുന്നതിനും ദക്ഷിണേന്ത്യയിൽ വടക്കുകിഴക്കൻ കാലവർഷമായ തുലാവർഷമഴ (Northeast Monsoon) ആരംഭിക്കുന്നതിനുമുള്ള അനുകൂല സാഹചര്യം ഒരുങ്ങുന്നതായി കേന്ദ്ര കാലാവസ്ഥാ വകുപ്പ് അറിയിച്ചു.

നാളെ നാല് ജില്ലകളിൽ ഓറഞ്ച് അലർട്ടും എട്ട് ജില്ലകളിൽ മഞ്ഞ അലർട്ടും പ്രഖ്യാപിച്ചു. ഒറ്റപ്പെട്ടയിടങ്ങളിൽ അതിശക്തമായ മഴയ്ക്കും ഇടിമിന്നലോടുകൂടിയ മഴയ്ക്കുമാണ് സാധ്യത. പത്തനംതിട്ട, കോട്ടയം, ഇടുക്കി, എറണാകുളം ജില്ലകളിലാണ് നാളെ ഓറഞ്ച് അലർട്ട് പ്രഖ്യാപിച്ചിരിക്കുന്നത്.

മഴ ശക്തമാകാനുള്ള സാഹചര്യത്തിൽ ഉരുൾപൊട്ടൽ, മണ്ണിടിച്ചിൽ, മലവെള്ളപ്പാച്ചിൽ സാധ്യതയുള്ള പ്രദേശങ്ങളിൽ താമസിക്കുന്നവർ അധികൃതരുടെ നിർദേശപ്രകാരം സുരക്ഷിത സ്ഥലങ്ങളിലേക്ക് മാറണം. നദിക്കരകളിലും അണക്കെട്ടുകളുടെ താഴ്ഭാഗങ്ങളിലും താമസിക്കുന്നവരും ജാഗ്രത പാലിക്കണം. ദുരന്തസാധ്യതയുള്ള മേഖലകളിലുള്ളവർ പകൽസമയത്ത് തന്നെ സുരക്ഷിത സ്ഥാനങ്ങളിലേക്ക് മാറാൻ മുൻകരുതലെടുക്കണമെന്ന് നിർദേശമുണ്ട്.

ശക്തമായ മഴയുള്ളപ്പോൾ നദികൾ മുറിച്ചുകടക്കുകയോ ജലാശയങ്ങളിൽ കുളിക്കാനോ മീൻപിടിക്കാനോ മറ്റ് ആവശ്യങ്ങൾക്കോ ഇറങ്ങുകയോ ചെയ്യരുത്. വെള്ളച്ചാട്ടങ്ങൾ, മലയോര മേഖലകൾ, ജലാശയങ്ങൾ എന്നിവിടങ്ങളിലേക്കുള്ള വിനോദയാത്രകളും മഴ മുന്നറിയിപ്പ് നിലനിൽക്കുന്ന സമയത്ത് ഒഴിവാക്കണം.

യാത്രകളിലും കാറ്റിലും ജാഗ്രത വേണം

മഴ ശക്തമാകുന്ന സാഹചര്യത്തിൽ അത്യാവശ്യമല്ലാത്ത യാത്രകൾ ഒഴിവാക്കണം. ജലാശയങ്ങൾ കരകവിഞ്ഞൊഴുകുന്ന റോഡുകളിലൂടെ വാഹനമോടിക്കരുത്. അറ്റകുറ്റപ്പണികൾ നടക്കുന്ന റോഡുകളിലും ജാഗ്രത പാലിക്കണം.

English Summary : The India Meteorological Department (IMD) has announced that the Northeast Monsoon (Thulavarsham) is likely to commence in southern India starting tomorrow, October 15, as the Southwest Monsoon withdraws from the rest of the country