കേരളത്തിൽ മഴയെത്തില്ല, തണുപ്പ് കൂടും, ക്രിസ്മസ് പൊടിപൊടിക്കാം, ശക്തമായ കാറ്റിന് സാധ്യതയെന്ന് കാലാവസ്ഥാ വകുപ്പ്

കേരളത്തിൽ വരും ദിവസങ്ങളിലും വരണ്ടകാലാവസ്ഥ തുടരുമെന്ന് അറിയിച്ചിരിക്കുകയാണ് കാലാവസ്ഥാ വകുപ്പ്. ഡിസംബ‍ർ 27 വരെ മഴയ്ക്ക് സാധ്യതയില്ല. എല്ലാ ജില്ലകളിലും വെള്ള അലർട്ടാണ് പ്രഖ്യാപിച്ചിട്ടുള്ളത്. ശബരിമലയിലും മുന്നറിയിപ്പുകൾ നൽകിയിട്ടില്ല. ഇന്നും നാളെയും സന്നിധാനം, പമ്പ, നിലക്കൽ എന്നിവിടങ്ങളിൽ ആകാശം ഭാഗികമായി മേഘാവവൃതമായിക്കും.

ശക്തമായ കാറ്റിന് സാധ്യത

ശക്തമായ കാറ്റിന് സാധ്യതള്ളതിനാൽ മത്സ്യത്തൊഴിലാളികൾക്ക് ജാഗ്രതാ നിർ‍ദേശം നൽകിയിട്ടുണ്ട്. തെക്കൻ തമിഴ്നാട് തീരം, ഗൾഫ് ഓഫ് മന്നാർ, അതിനോട് ചേർന്ന കന്യാകുമാരി പ്രദേശം, മധ്യ പടിഞ്ഞാറൻ അറബിക്കടലിന്റെയും തെക്ക് പടിഞ്ഞാറൻ അറബിക്കടലിന്റെയും പടിഞ്ഞാറൻ ഭാഗങ്ങൾ എന്നിവിടങ്ങളിലാണ് ശക്തമായ കാറ്റിന് സാധ്യതയുള്ളത്. മണിക്കൂറിൽ 45 മുതൽ 55 കിലോമീറ്റർ വരെയും ചില അവസരങ്ങളിൽ മണിക്കൂറിൽ 65 കിലോമീറ്റർ വരെയും കാറ്റ് വീശിയേക്കാം.

തണുപ്പ് കൂടി വരുന്നു, മൂന്നാറിൽ അതിശൈത്യം

കേരളത്തിൽ തണുപ്പ് തുടരുമെന്ന് കാലാവസ്ഥ വകുപ്പ് അറിയിച്ചിട്ടുണ്ട്. സംസ്ഥാനത്തെ മലയോരപ്രദേശങ്ങളിലാണ് തണുപ്പ് കൂടുതൽ അനുഭവപ്പെടുന്നത്. മൂന്നാറിലെ ഉൾപ്രദേശങ്ങളിൽ മരവിപ്പിക്കുന്ന തണുപ്പാണ്.

സീസണിലെ ഏറ്റവും കുറഞ്ഞ താപനിലയാണ് രേഖപ്പെടുത്തിയത്. തിങ്കളാഴ്ച പുലർച്ചെ സൈലന്റ് വാലി, ദേവികുളം, ലക്ഷ്മി എസ്റ്റേറ്റ് എന്നിവിടങ്ങളിൽ താപനില മൈനസ് ഒന്നായി രേഖപ്പെടുത്തിയിരുന്നു. കഴിഞ്ഞ സീസണിൽ പ്രദേശത്തെ ഏറ്റവും കുറഞ്ഞ താപനില മൈനസ് മൂന്ന് ഡിഗ്രി സെൽഷ്യസ് ആയിരുന്നു. ഡിസംബർ 15 മുതലാണ് ഇവിടെ അതിശൈത്യം തുടങ്ങിയത്. വരുംദിവസങ്ങളിൽ താപനില വീണ്ടും കുറഞ്ഞേക്കുമെന്നാണ് സൂചന. അതേസമയം, തണുപ്പ് ആസ്വദിക്കാനായി എത്തുന്ന സഞ്ചാരികളുടെ തിരക്കും കൂടിവരികയാണ്.

English Summary : Strong winds are expected along the southern Tamil Nadu coast and Gulf of Mannar. Fishermen are advised to exercise caution due to potential wind speeds of 45-65 km/h.