പുതിയ ന്യൂനമര്‍ദം നാളെയോടെ, സെന്‍യാര്‍ ചുഴലിക്കാറ്റായേക്കും

ബംഗാള്‍ ഉള്‍ക്കടലില്‍ നാളെയോടെ രൂപപ്പെടുന്ന ന്യൂനമര്‍ദം ശക്തിപ്രാപിക്കുകയും ചുഴലിക്കാറ്റായി മാറുകയും ചെയ്‌തേക്കും. തമിഴ്‌നാട്, ആന്ധ്രാ തീരങ്ങള്‍ ലക്ഷ്യമാക്കി ചുഴലിക്കാറ്റ് നീങ്ങുമെന്നാണ് പ്രാഥമിക സൂചന. നവംബര്‍ 21-22 തിയതികളിലായി തെക്കുകിഴക്കന്‍ ബംഗാള്‍ ഉള്‍ക്കടലില്‍ ന്യൂനമര്‍ദം രൂപപ്പെടുമെന്നാണ് പ്രവചനം.

സെന്‍യാര്‍ ചുഴലിക്കാറ്റ്, പേരിട്ടത് യു.എ.ഇ

രൂപപെട്ടാൽ സെൻയാര്‍ ചുഴലിക്കാറ്റ് എന്ന പേരിലാണ് ഈ സിസ്റ്റം അറിയപ്പെടുക. സിംഹം എന്നര്‍ഥം വരുന്ന സെന്‍യാര്‍ എന്ന പേര് നിര്‍ദേശിച്ചത് യു.എ.ഇയാണ്. 21 നു രാത്രി വൈകിയോ 22 നും പുലര്‍ച്ചെയോ ന്യൂനമര്‍ദം തെക്കന്‍ ആന്‍ഡമാന്‍ കടലിനോട് ചേര്‍ന്ന് രൂപപ്പെടുമെന്നാണ് ഇപ്പോഴത്തെ നിരീക്ഷണം.

തമിഴ്‌നാട് തീരത്തു കരതൊട്ടേക്കും

നവംബര്‍ 27-29 തിയതികളില്‍ തമിഴ്‌നാട്, ആന്ധ്രാപ്രദേശ് തീരത്തേക്ക് ചുഴലിക്കാറ്റ് അടുക്കുകയും കരതൊടുകയും ചെയ്യും. ഒഡിഷയിലും കരതൊടാന്‍ സാധ്യതയുണ്ട്. വടക്കന്‍ തമിഴ്‌നാട്ടിലെ ചെന്നൈ ഉള്‍പ്പെടെ നിലവിലെ സൂചന പ്രകാരം ചുഴലിക്കാറ്റ് കരതെടാന്‍ സാധ്യതയുള്ള മേഖലകളാണ്.

ചുഴലിയാകാന്‍ സാധ്യത ഏറെ

ബംഗാള്‍ ഉള്‍ക്കടലിലെ കാലാവസ്ഥ നിരീക്ഷിക്കുമ്പോള്‍ സിസ്റ്റം ചുഴലിക്കാറ്റാകാനുള്ള സാധ്യത കൂടുതലാണ്. കാറ്റിന്റെ ഖണ്ഡധാര ( Wind Shear) പെട്ടെന്ന് ചുഴലിക്കാറ്റാകാന്‍ സിസ്റ്റത്തെ സഹായിക്കും. ഒപ്പം സമുദ്രോപരി താപനില (sea suraface temperature- SST) യും ചുഴലിക്കാറ്റിലേക്ക് സിസ്റ്റത്തെ നയിക്കാന്‍ അനുകൂലമായ സാഹചര്യത്തിലാണ്.

മണ്‍സൂണിന് ശേഷം രണ്ടാമത്തെ ചുഴലിക്കാറ്റ്

ബംഗാള്‍ ഉള്‍ക്കടലില്‍ മണ്‍സൂണിന് ശേഷം രൂപപ്പെടുന്ന രണ്ടാമത്തെ ചുഴലിക്കാറ്റാകും ഇത്. നേരത്തെ മന്‍ത ചുഴലിക്കാറ്റാണ് ബംഗാള്‍ ഉള്‍ക്കടലില്‍ രൂപപ്പെട്ടത്. ഇത് ആന്ധ്രാപ്രദേശില്‍ കരകയറി. കഴിഞ്ഞ വര്‍ഷം സമാന മേഖലയില്‍ രൂപപ്പെട്ട ചുഴലിക്കാറ്റ് ഒഡിഷയിലാണ് കരകയറിയിരുന്നത്. ഇത്തവണ ട്രാക്ക് ചെന്നൈ മുതല്‍ പുരി വരെ കരകയറാന്‍ അനുകൂലമാണ്.

കടലില്‍ ദീര്‍ഘ യാത്ര ചെയ്യും

കടലില്‍ ദീര്‍ഘദൂരം യാത്ര ചെയ്യുന്ന സിസ്റ്റമാകും സെന്‍യാര്‍. അതിനാല്‍ ശക്തിപ്രാപിക്കാനും സംഹാരതാണ്ഡവത്തിനുമുള്ള ഊര്‍ജം സിസ്റ്റം കൈവരിക്കും. തെക്ക് മധ്യ ബംഗാള്‍ ഉള്‍ക്കടലില്‍ വച്ച് നവംബര്‍ 24 ഓടെ സിസ്റ്റം തീവ്രന്യൂനമര്‍ദം (Depression) ആകും. തൊട്ടടുത്ത ദിവസം തന്നെ ചുഴലിക്കാറ്റ് ( Cyclonic Storm) ആകാനും സാധ്യത.

കേരളത്തില്‍ മഴ

ഈ സിസ്റ്റം കേരളത്തില്‍ മഴ നല്‍കുമെന്നാണ് പ്രാഥമിക സൂചന. ഈമാസം 24 ഓടെ ഇക്കാര്യത്തില്‍ കൂടുതല്‍ കൃത്യത നല്‍കാനാകും.

English Summary: A low-pressure system is expected to form in the Bay of Bengal, potentially intensifying into a cyclone targeting Tamil Nadu and Andhra coasts by November 21-22.