യുഎഇയിൽ ചിലയിടങ്ങളിൽ മഴയ്ക്ക് സാധ്യത; ചൂട് തുടരും

യുഎഇയിൽ ഇന്ന് ഉച്ചയ്ക്കുശേഷം കിഴക്കൻ മേഖലകളിൽ ഇടിമിന്നലോടുകൂടിയ മേഘങ്ങൾ രൂപപ്പെടാനും മഴ ലഭിക്കാനും സാധ്യതയുണ്ട്. അതേസമയം ഇന്ന്
പൊതുവെ തെളിഞ്ഞതോ ഭാഗികമായയോ മേഘാവൃതമായതോ ആയ കാലാവസ്ഥയായിരിക്കുമെന്ന് ദേശീയ കാലാവസ്ഥാ കേന്ദ്രം (NCM) അറിയിച്ചു.

താപനില ഉയരും

രാജ്യത്ത് താപനില വരും ദിവസങ്ങളിലും ഉയരാനാണ് സാധ്യത. ഇന്ന് രാത്രിയിലും ഞായറാഴ്ച രാവിലെയും തീരപ്രദേശങ്ങളിൽ ഈർപ്പം കൂടും. ചിലയിടങ്ങളിൽ നേരിയ മൂടൽമഞ്ഞിനും സാധ്യതയുണ്ട്.

അതേസമയം ഇന്ന് ദുബൈ, അബുദാബി, ഷാർജ എന്നിവിടങ്ങളിൽ 42 ഡിഗ്രി സെൽഷ്യസ് ആയിരിക്കും ഉയർന്ന താപനില. കുറഞ്ഞ താപനില യഥാക്രമം 32, 31, 31 ഡിഗ്രി സെൽഷ്യസ് വരെയാകുമെന്നാണ് പ്രവചനം.

കാറ്റിന് സാധ്യത

തെക്കുകിഴക്ക് മുതൽ വടക്കുകിഴക്ക് ദിശയിൽ ശക്തമായ കാറ്റിന് സാധ്യതയുണ്ട്. മണിക്കൂറിൽ 10 മുതൽ 25 കിലോമീറ്റർ വരെ വേഗത്തിൽ കാറ്റ് വീശും. മേഘങ്ങൾ രൂപപ്പെടുന്ന സമയത്ത് കാറ്റിന്റെ വേഗം മണിക്കൂറിൽ 40 കിലോമീറ്റർ വരെയാകാനും സാധ്യതയുണ്ട്.

ഇന്നലെ (വെള്ളിയാഴ്ച്ച) രാജ്യത്തെ ഏറ്റവും ഉയർന്ന താപനില 46.3 ഡിഗ്രി സെൽഷ്യസ് ആയി രേഖപ്പെടുത്തി. അൽ ഐനിലെ സ്വീഹാനിൽ പ്രാദേശിക സമയം വൈകിട്ട് 3.30നാണ് ഈ താപനില രേഖപ്പെടുത്തിയത്.

English Summary : The National Center of Meteorology (NCM) predicts cloud formation with potential rainfall and thunderstorms in eastern UAE regions this afternoon.