ചരിത്രത്തിലാദ്യമായി റബ്ബർവില 300 രൂപയിൽ; കർഷകർക്ക് പ്രതീക്ഷ

ചരിത്രത്തിലാദ്യമായി റബ്ബർവില കിലോയ്ക്ക് 300 രൂപയെന്ന മാജിക് നമ്പർ തൊട്ടു. കോട്ടയത്ത് വെള്ളിയാഴ്ച്ച ആർ.എസ്.എസ്-4 ഗ്രേഡ് ഷീറ്റ് റബ്ബറിന് കിലോയ്ക്ക് 300 രൂപ നിരക്കിലാണ് വ്യാപാരം നടന്നത്. പഴയ ഓർഡറുകൾ ബാക്കിയുണ്ടായിരുന്ന വ്യാപാരികളാണ് ഈ വിലയ്ക്ക് റബ്ബർ വാങ്ങിയത്. അതേസമയം, റബ്ബർ ബോർഡിന്റെ ഔദ്യോഗിക വില കിലോയ്ക്ക് 298 രൂപയാണ്.

ഈ വർഷം ജനുവരിയിൽ ആർ.എസ്.എസ്-4 റബ്ബറിന്റെ ശരാശരി വില 192 രൂപയായിരുന്നു. ഒൻപത് മാസത്തിനിടെ കിലോയ്ക്ക് 108 രൂപയുടെ വർധനയാണ് രേഖപ്പെടുത്തിയത്. വിപണിയിലെ ഈ മുന്നേറ്റം റബ്ബർ കർഷകർക്കും വ്യാപാരികൾക്കും വലിയ പ്രതീക്ഷയാണ് നൽകുന്നത്. അതേസമയം, അന്താരാഷ്ട്ര വിപണിയിൽ വെള്ളിയാഴ്ച റബ്ബർവില കിലോയ്ക്ക് 268.63 രൂപയായിരുന്നു. ജൂണിൽ അന്താരാഷ്ട്ര വില 300 രൂപ കടന്നിരുന്നെങ്കിലും പിന്നീട് താഴുകയായിരുന്നു.

റബ്ബർ വില ഉയരാൻ കാരണം

ആഭ്യന്തര വിപണിയിലെ ഉൽപാദനക്കുറവും വർധിച്ചുവരുന്ന ആവശ്യകതയുമാണ് റബ്ബർവില ഉയരാൻ പ്രധാന കാരണം. റബ്ബർ ബോർഡിന്റെ കണക്കനുസരിച്ച് രാജ്യത്ത് നിലവിൽ 5.22 ലക്ഷം മെട്രിക് ടൺ റബ്ബറിന്റെ കുറവുണ്ട്. 1.76 ലക്ഷം ഹെക്ടറിൽ ഇപ്പോൾ ടാപ്പിങ് നടക്കുന്നില്ലെന്നും കണക്കുകൾ വ്യക്തമാക്കുന്നു.

കാലാവസ്ഥാ വ്യതിയാനം ഉൾപ്പെടെയുള്ള കാരണങ്ങളാൽ ഇന്ത്യയിലും മലേഷ്യ, തായ്‌ലൻഡ്, ഇന്തോനേഷ്യ തുടങ്ങിയ പ്രമുഖ റബ്ബർ ഉൽപാദക രാജ്യങ്ങളിലും ഉൽപാദനം കുറഞ്ഞിട്ടുണ്ട്.

പശ്ചിമേഷ്യൻ സംഘർഷത്തെത്തുടർന്ന് കപ്പൽ ചരക്കുനീക്കത്തിലുണ്ടായ പ്രതിസന്ധിയും ഇറക്കുമതിച്ചെലവ് വർധിച്ചതും ആഭ്യന്തര റബ്ബർ വിപണിക്ക് അനുകൂലമായി. ക്രൂഡ് ഓയിൽ വില ഉയർന്നതോടെ സിന്തറ്റിക് റബ്ബറിന്റെ വിലയിലുണ്ടായ വർധനയും സ്വാഭാവിക റബ്ബറിന്റെ വില ഉയരാൻ കാരണമായിട്ടുണ്ട്.

കർഷകർ പ്രതീക്ഷയിൽ

വിപണിയിലെ ഈ മുന്നേറ്റം തുടരുമെന്ന പ്രതീക്ഷയിലാണ് റബ്ബർ കർഷകർ. ചരിത്രത്തിലെ ഏറ്റവും ഉയർന്ന വില ലഭിച്ചതോടെ റബ്ബർ മേഖലയിൽ പുതിയ ഉണർവിനും സാധ്യത തെളിയുകയാണ്.

English Summary : Natural rubber prices in India have hit an all-time record high, with RSS-4 grade sheet rubber trading at ₹300 per kilogram in the Kottayam spot market. The surge represents a significant jump from January’s average price of ₹192 per kg—marking an increase of ₹108 per kg (+56.25%) in just nine months.