ഈ വര്‍ഷത്തെ, ദേശീയ വന്യജീവി വാരാഘോഷത്തോടനുബന്ധിച്ച് കേരളത്തിലെ എല്ലാ വന്യജീവി സങ്കേതങ്ങളിലും ദേശീയോദ്യാനങ്ങളിലും കടുവാസങ്കേതങ്ങളിലും ഒക്ടോബർ രണ്ടു മുതൽ എട്ടു വരെ പൊതുജനങ്ങൾക്ക് സൗജന്യ പ്രവേശനം . കേരളത്തിന്‍റെ പച്ചപ്പും വന്യജീവിതവും അടുത്തറിയാൻ ആഗ്രഹിക്കുന്ന സഞ്ചാരികൾക്ക് ഇത് സുവർണ്ണാവസരമാണ്.

ഈ ആഘോഷത്തിന്‍റെ ഭാഗമായി, യാത്രയെയും പ്രകൃതിയെയും സ്നേഹിക്കുന്നവർക്കായി ആകർഷകമായ മത്സരങ്ങളും സർക്കാർ ഒരുക്കിയിട്ടുണ്ട്. വൈൽഡ് ലൈഫ് ഫോട്ടോഗ്രാഫി, മലയാളത്തിലും ഇംഗ്ലീഷിലുമുള്ള യാത്രാവിവരണ രചന, ഷോർട്ട് ഫിലിം, പോസ്റ്റർ ഡിസൈൻ തുടങ്ങിയ മത്സരങ്ങളാണ് പൊതുജനങ്ങൾക്കായി ഒരുക്കിയിട്ടുള്ളത്.

പ്രായപരിധിയില്ലാത്ത ഈ മത്സരങ്ങളിൽ വിജയിക്കുന്നവർക്ക് 30,000 രൂപ വരെ സമ്മാനം നേടാനുള്ള അവസരവും ഉണ്ട് . മാത്രമല്ല, തിരഞ്ഞെടുക്കപ്പെടുന്ന വിജയികൾക്ക് ഒരു വർഷത്തേക്ക് സംസ്ഥാനത്തെ എല്ലാ സംരക്ഷിത പ്രദേശങ്ങളിലും, തങ്ങൾക്കും അഞ്ച് കുടുംബാംഗങ്ങൾക്കും സൗജന്യ പ്രവേശനം നേടാനുള്ള അവസരവും ലഭിക്കുന്നു.

ഇത് സഞ്ചാരികൾക്ക് കേരളത്തിലെ വന്യജീവി സമ്പത്ത് അടുത്തറിയാൻ പറ്റിയ മികച്ച അവസരമാണ്.

ഇപ്പോള്‍ സന്ദർശിക്കാവുന്ന പ്രധാനപ്പെട്ട ചില വന്യജീവി കേന്ദ്രങ്ങൾ :

പെരിയാർ കടുവാ സങ്കേതം, തേക്കടി: കേരളത്തിലെ ഏറ്റവും പ്രശസ്തമായ കടുവാ സങ്കേതമാണ് ഇത്. ഇവിടെ ആനക്കൂട്ടങ്ങളെയും മ്ലാവുകളെയും പലതരം പക്ഷികളെയും കാണാൻ സാധിക്കുന്നു. പെരിയാർ തടാകത്തിലെ ബോട്ടിംഗ് വഴി വന്യജീവികളെ അടുത്തറിയാൻ സാധിക്കുന്നതാണ് ഇവിടുത്തെ പ്രധാന ആകർഷണം.

ഇരവികുളം ദേശീയോദ്യാനം, മൂന്നാർ: വംശനാശഭീഷണി നേരിടുന്ന വരയാടുകളുടെ ഏക ആവാസകേന്ദ്രമാണ് ഇത്. കൂറ്റൻ പുൽമേടുകളും നീലക്കുറിഞ്ഞിയും ആണ് ഈ ദേശീയോദ്യാനത്തിന്‍റെ പ്രധാന പ്രത്യേകത.

വയനാട് വന്യജീവി സങ്കേതം: കാട്ടാനകളുടെയും കടുവകളുടെയും വലിയൊരു ആവാസകേന്ദ്രമാണ് ഇത്. ഇടതൂർന്ന പച്ചപ്പും വന്യജീവികളുടെ സാന്നിധ്യവും ട്രെക്കിംഗിന് അനുയോജ്യമായ അന്തരീക്ഷവും ഇവിടെ ഉണ്ട്.

പറമ്പിക്കുളം കടുവാ സങ്കേതം, പാലക്കാട്: തമിഴ്‌നാടുമായി അതിർത്തി പങ്കിടുന്ന ഈ സങ്കേതം പ്രകൃതി സൗന്ദര്യത്തിനും സുരക്ഷിതമായ വന്യജീവി കാഴ്ചകൾക്കും പേരുകേട്ട ഇടമാണ്. വനത്തിനുള്ളിലെ താമസ സൗകര്യവും ഇവിടെ ലഭ്യമാണ്.

സൈലന്‍റ് വാലി ദേശീയോദ്യാനം, പാലക്കാട്: നിത്യഹരിത വനങ്ങളുടെ മനോഹാരിത നിലനിൽക്കുന്ന ഈ പ്രദേശം, വിവിധയിനം പക്ഷികളുടെയും അപൂർവ സസ്യങ്ങളുടെയും ആവാസ കേന്ദ്രമാണ്.

Metbeat news