മഴ കനത്താൽ പാറ വീഴാൻ സാധ്യത; മൂന്നാറിലേക്കുള്ള യാത്രയ്ക്ക് നിയന്ത്രണം

മൂന്നാറിലേക്കുള്ള വഴിയിൽ വൻപാറ അടർന്നു വീഴാറായ നിലയിൽ കണ്ടെത്തിയതിനെ തുടർന്ന് ഗതാഗതം വഴിതിരിച്ചുവിടുന്നു. പള്ളിവാസൽ പഞ്ചായത്തിൽ രണ്ടാം മൈലിനു സമീപമാണ് അപകടഭീഷണിയുയർത്തി പാറ നിലകൊള്ളുന്നത്. സാഹചര്യം കണക്കിലെടുത്ത് മൂന്നാറിലേക്കുള്ള വാഹനങ്ങൾ ആനച്ചാൽ വഴി തിരിച്ചുവിടുമെന്ന് ഇടുക്കി ജില്ലാ ദുരന്ത നിവാരണ അതോറിറ്റി അറിയിച്ചു. രാത്രിയിൽ മഴയോ ശക്തമായ കാറ്റോ ഉണ്ടായാൽ പാറ അടർന്നു വീണ് വലിയ അപകടമുണ്ടാകാൻ സാധ്യതയുണ്ടെന്നാണ് വിലയിരുത്തൽ. ഇതേത്തുടർന്നാണ് മുൻകരുതൽ നടപടിയായി ഗതാഗതം വഴിതിരിച്ചുവിടുന്നത്.

യാത്രക്കാർ ജാഗ്രത പാലിക്കുക

യാത്രക്കാർ അതീവ ജാഗ്രത പാലിക്കണമെന്നും അധികൃതരുടെ നിർദേശങ്ങൾ കർശനമായി പിന്തുടരണമെന്നും ദുരന്ത നിവാരണ അതോറിറ്റി അറിയിച്ചു. തുടർച്ചയായ അവധി ദിവസങ്ങൾ ലഭിച്ചതോടെ മൂന്നാർ ഉൾപ്പെടെയുള്ള വിനോദസഞ്ചാര കേന്ദ്രങ്ങളിൽ വൻ തിരക്കാണ് അനുഭവപ്പെടുന്നത്. തുലാമഴ കനത്തതോടെ പാറ വീഴാനുള്ള സാധ്യതയും കൂടുതലാണ്. അതുകൊണ്ട് തന്നെ മേഖലയിലെ ഗതാഗത നിയന്ത്രണം വിനോദസഞ്ചാരികൾ ഉൾപ്പെടെയുള്ള യാത്രക്കാർ ശ്രദ്ധിക്കണമെന്ന് അധികൃതർ അറിയിച്ചു.

English Summary : The Idukki District Disaster Management Authority has restricted traffic on the main route to Munnar after a massive, unstable boulder was identified near the 2nd Mile in Pallivasal panchayat. With heavy northeast monsoon (Thulamazha) rains raising concerns of potential landslides and rockfalls, all vehicles heading to Munnar are being diverted via Anachal.